اسلام آباد: (ویب ڈیسک) جمہوریہ چیک کی ماڈل ٹیریزا کو سپریم کورٹ سے بڑا ریلیف مل گیا، عدالت عظمی نے ہائی کورٹ کی جانب سے ماڈل کو بری کرنے کے فیصلے کے خلاف کسٹم کی اپیل خارج کر دی۔
سپریم کورٹ کے جسٹس اعجاز الاحسن نے ہائی کورٹ کے فیصلے کے خلاف کسٹم کی اپیل پر سماعت کی، سپریم کورٹ نے ہیروئین سمگلنگ کیس میں کسٹمز کی اپیل ابتدائی سماعت کے بعد خارج کر دی، جسٹس اعجاز الا حسن نے استفسار کیا کہ کیا ہیروئن سیمپل قانون کے مطابق لیب بھیجے گئے تھے؟
وکیل کا کہنا تھا کہ ٹرائل کورٹ نے سیمپلز کی ترسیل درست قرار دی تھی، ٹیریزا نے 23 اپریل کو چیک ری پبلک واپس جانا ہے، عدالت ماڈل ٹیریزا کا نام سٹاپ لسٹ میں ڈالے۔
جسٹس اعجاز الاحسن نے کہا کہ کیس بنتا ہوگا تو ہی نام سٹاپ لسٹ میں شامل کرینگے، اسلام آباد ہائیکورٹ کا ملزمہ کو بری کرنے کا فیصلہ درست ہے، جمہوریہ چیک کی ماڈل ٹیریزا کو ہیروئن بیرون لے جاتے گرفتار کیا گیا تھا۔

اسلام آباد: (ویب ڈیسک) شہباز شریف اور آصف زرداری کی کوششیں کامیاب ہو گئیں، بی این پی مینگل کو کابینہ کا حصہ بننے پر رضا مند کر لیا۔
ذرائع کے مطابق بلوچستان نیشنل پارٹی مینگل کے دو اراکین کابینہ کا حصہ ہونگے، مسلم لیگ ق کے چوہدری سالک حسین کو بھی کابینہ میں شامل ہونے کی پیشکش کی گئی ہے، ن لیگ کے جاوید لطیف بھی کابینہ میں شامل ہونگے۔ تقریب حلف برداری بھی آج متوقع ہے۔
ذرائع نے مزید بتایا کہ بی این پی مینگل چاغی واقعہ پر جوڈیشل کمیشن کے مطالبے پر دستبردار ہوگئی ہے،وفد نے وزیراعظم سے ملاقات میں مطالبات تسلیم ہونے پر شمولیت کا فیصلہ کیا۔ آغا حسن بلوچ کو وفاقی وزیرسائنس اینڈ ٹیکنالوجی بنایا جائے گاجبکہ ہاشم نوٹزئی کو وزیرمملکت برائے توانائی بنایا جائے گا۔ چاغی واقعے پرانکوائری کمیٹی تشکیل دے دی گئی ہے، انکوائری کمیٹی حقائق میں ناکام رہی تو جوڈیشل کمیشن بنایا جائے گا،حکومت اور بی این پی کے مابین اتفاق رائے کے مطابق آئی جی ایف سی کے ماتحت شکایت سیل قائم کیا جائے گا۔

وفاقی وزیر داخلہ رانا ثنا اللہ کا پی ٹی آئی کے رہنما اسد عمر کی پریس کانفرنس پر ردعمل

عمران نیازی کو اپنی نا اہلی، کرپشن اور لوٹ مار کی عوام سے باجماعت معافی مانگنی چاہئے، وزیر داخلہ

عمران نیازی کو سیاسی مقابلے کے بعد ہی عدم اعتماد کے ذریعے پارلیمنٹ سے باہر کیا، وفاقی وزیر داخلہ

عمران نیازی سیاست کے میدان سے بھاگے ہوئے ہیں، وفاقی وزیر داخلہ

معاشی دہشت گرد قومی مجرم ہیں ، وزیر داخلہ

ایگزٹ کنٹرول لسٹ (ای سی ایل) دوبارہ مرتب ہو رہی ہے، جنہوں نے معاشی دہشت گردی کی ہے، انہیں بھاگنے نہیں دیا جائے گا، رانا ثناء اللہ

اسلام آباد: (ویب ڈیسک) وزیر اعظم شہباز شریف نے طارق فاطمی سے خارجہ امور کی ذمہ داریاں اوراحسان مزاری سے انسانی حقوق کے وفاقی وزیر کا قلمدان واپس لے لیا، طارق فاطمی معاون خصوصی برقرار رہیں گے، ان کا عہدہ وزیرمملکت کے برابر ہوگا۔
پہلے جاری نوٹیفکیشن میں طارق فاطمی کو وزیرمملکت کا عہدہ نہیں دیا گیا تھا۔ معاون خصوصی طارق فاطمی کو وزیر مملکت کے برابرمراعات ملیں گی، وزیراعظم نے گزشتہ روز طارق فاطمی کو معاون خصوصی خارجہ امورتعینات کیا تھا۔
دوسری جانب احسان مزاری سے انسانی حقوق کا قلمدان واپس لے کر انہیں بین الصوبائی رابطہ کا قلمدان دیدیا۔ وزیر اعظم کی منظوری کے بعد قلمدان میں تبدیلی کا نوٹیفکیشن جاری کردیا گیا۔

لاہور: (ویب ڈیسک) زندہ دلان شہرلاہور میں تحریک انصاف کے پاور شو کے لیے میدان سج گیا۔
مینار پاکستان گراونڈ میں پی ٹی آئی کے جلسے کی تیاریوں کو حتمی شکل دے دی گئی۔ پنڈال میں کارکنوں کی جلسہ گاہ آمد جاری ہے۔ چئیرمین پی ٹی آئی اور سابق وزیراعظم عمران خان کھلاڑیوں سے خطاب کریں گے۔
جلسے کے لیےایک سو بیس فٹ لمبا اور چالیس فٹ اونچا اسٹیج بھی لگ گیا۔ انتظامیہ کی جانب سے پنڈال میں شرکاء کیلئے پچاس ہزار کرسیاں لگانے کا دعوی کیا گیا ہے۔
جلسہ میں عمران خان کی تقریر دکھانے کیلئے پندرہ بڑی سکرین نصب کر دی گئیں ہیں۔25 لاوڈ اسپیکر، 900 روشنیوں کے ٹاور بھی نصب کئیے گئے ہیں۔
چئیرمین عمران خان کی آمد پر جلسہ گاہ میں پندرہ منٹ تک آتشبازی کی جائے گی۔جلسہ گاہ کے شرکاء میں 3 لاکھ جھنڈے بھی تقسیم کیے جائیں گے۔
جلسہ انتظامیہ نے انٹرنیٹ بند ہونے کی اطلاعات کے باعث جلسہ گاہ میں تین مقامات پر انٹرنیٹ بوسٹرز بھی نصب کر دیے ہیں۔
جلسے کے شرکاء کو فول پروف سکیورٹی مہیا کرنے کے لیے پنجاب پولیس نے بھی تیاری کر لی ہے۔سیاسی جلسہ پر 4 ہزار سے زائد پولیس افسران اور جوان فرائض سر انجام دیں گے۔10 ایس پیز،25 ایس ڈی پی اوز،59 ایس ایچ اوز،207 اَپر سب آرڈینیٹس،234 لیڈیز پولیس اہلکار شامل ہوں گے
سی سی پی او کے مطابق شہریوں کی سہولت اور ٹریفک کی روانی کے لئے مربوط ٹریفک پلان وضع کیا گیا ہے۔660 سے زائد ٹریفک افسران و اہلکار فرائض سر انجام دیں گے۔
جلسہ کے شرکا کی گاڑیوں کے لئے مختلف مقامات پر مخصوص پارکنگ زونز بنائے گئے ہیں۔سیف سٹی اتھارٹیز کے کیمروں کے ذریعے بھی مسلسل مانیٹرنگ کی جائے گی۔

اسلام آباد: (ویب ڈیسک) سابق وفاقی وزیر اطلاعات اور پاکستان تحریک انصاف (پی ٹی آئی) کے رہنما فواد چودھری نے کہا ہے کہ مغرب کے غلاموں کا سورج ڈوبتا نظر آ رہا ہے۔
سابق وزیر اطلاعات اور پی ٹی آئی کے رہنما فواد چودھری نے سماجی رابطے کی ویب سائٹ ٹوئٹر پر لکھا کہ قائد اعظم نے 23 مارچ 1940 کو جو سفر شروع کیا اس کی تکمیل کی جدوجہد کی ابتدا آج ہے اور عمران خان کی قیادت میں قوم حقیقی آزادی کے لیے کمر بستہ ہو چکی ہے۔
انہوں نے کہا کہ مغرب کے غلاموں کا سورج ڈوبتا ہوا نظر آرہا ہے اور آج کے تاریخی اجتماع میں لاکھوں لوگ عمران خان کی خود داری کے نعرے پر لبیک کہیں گے۔