کراچی: (ویب ڈیسک) گورنر سندھ عمران اسماعیل کا کہنا ہے کہ صدر نے کہا تو گورنر راج لگانا ہوگا،وزیر اعلیٰ سندھ نے کہا ہے کہ عدم اعتماد کی تحریک میں ملک کا نقصان نہیں ہوگا۔
گورنر سندھ عمران اسماعیل نے وزیر اعلیٰ سندھ کے ہمراہ مزار قائد پر حاضری کے بعد میڈیا سے گفتگو میں کہا ہے کہ صدر مملکت میرے باس ہیں وہ جو کہیں گے مجھے کرنا ہوگا، گورنر راج لگانے کا کہا تو لگانا ہو گا۔عدم اعتماد کا معاملہ چل رہا ہے ،یہ مناسب نہیں ہے کہ آپ لوگ ہمیں ساتھ کھڑا کر کے سیاسی سوالات کریں،اب گورنر راج والی بات کو یہیں ختم کردیں۔
گورنر سندھ عمران اسماعیل کا کہنا ہے کہ ایم کیو ایم ، ق لیگ اور باپ پارٹی اپنا فیصلہ کرنے میں آزاد ہیں۔منحرف اراکین نے جو کیا میرے نزدیک وہ غداری ہے۔ایسی قانون سازی ہونی چاھیے کہ وہ ایسی جرات نہ کریں۔
صحافی نے گورنر سندھ اور وزیر اعلیٰ سے سوال کیا کہ سیاسی قوتوں کی لڑائی میں اگر جمہوریت کا نقصان ہوا تو کون ذمہ دار ہوگا ؟گورنر سندھ عمران اسماعیل نے وزیر اعلیٰ سندھ کی جانب اشارہ کردیا۔
وزیر اعلیٰ سندھ نے جواب دیا کہ جمہوریت کو کوئی نقصان نہیں ہوگا اگر آئین پر عمل درآمد کیا جائے گا۔ اس عدم اعتماد کی تحریک میں ملک کا نقصان نہیں ہوگا۔
ان کا کہنا ہے کہ تحریک عدم اعتماد کامیاب ہوگی،ہم یہ چاہتے ہیں یہ ملک آئین کے مطابق چلائیں،شہید محترمہ بے نظیر بھٹو کے خلاف جب عدم اعتماد پیش ہوا تو چند دنوں میں اس پر ووٹنگ ہوئی تھی۔
وزیر اعلیٰ سندھ کا کہنا ہے کہ گورنر سندھ نے یہ بات صحیح کہی کہ اگلا سال زیادہ بہتر سال ہوگا،ایم کیو ایم کے ساتھ بات چیت ہو رہی ہے ،انھوں نے اپنے نکات بلاول بھٹو زرداری کو پیش کیئے ہیں۔ ہماری ایم کیو ایم کے ساتھ جو بات ہوئی ہے جو ضروری ہوگا اس کی قانون سازی کرینگے۔

اسلام آباد: (ویب ڈیسک) وزیر اعظم عمران خان نے کہا ہے کہ ہمیں قائد اعظم کے سنہری اصولوں ایمان، اتحاد، تنظیم پر کاربند ہونے کی ضرورت ہے۔
وزیر اعظم عمران خان نے یوم پاکستان کے موقع پر جاری کردہ اپنے پیغام میں کہا کہ 23 مارچ تخلیق پاکستان کے حقیقی مقاصد پر کاربند رہنے اور عزم کی تجدید کا دن ہے۔ بابائے قوم، تحریک آزادی کے رہنماؤں کو خراج عقیدت پیش کرتے ہیں۔
انہوں نے کہا کہ نوجوانوں کے لیے یہ جاننا ضروری ہے کہ پاکستان طویل جدوجہد کے بعد وجود میں آیا۔ استحکام اور ترقی کی کلید محنت، دیانت داری، اخلاقیات میں مضمر ہے۔
عمران خان نے کہا کہ ہمیں خود کو ریاست مدینہ کی طرز پر حقیقی فلاحی ریاست کے لیے وقف کرنا چاہیے اور ہمیں بحیثیت قوم درپیش چیلنجزکا ادراک کرنا چاہیے۔ حکومت نےغربت کے خاتمے اور انصاف کے لیے اصلاحات متعارف کرائیں اب ہماری توجہ معاشرے کے نظر انداز طبقے اور مساوی مواقع پر مرکوز ہے۔
انہوں نے کہا کہ کامیاب پاکستان پروگرام زبردست اقتصادی فوائد کا حامل ہے اور قومی صحت کارڈ کے فلیگ شپ پروگرام تاریخ میں بے مثال پروگرام ہے۔ ماضی کی حکومتوں نے قومی مفاد پر ذاتی مفادات کو ترجیح دی لیکن ہم اپنی عظمت رفتہ کی بحالی کی شاہراہ پر گامزن ہیں۔

لاہور: (ویب ڈیسک) وزیراعلی پنجاب سردار عثمان بزدار نے کہاہےکہ اپوزیشن جماعتوں کو موجودہ حالات میں ہوش کے ناخن لینے چاہئیں۔ اپوزیشن او آئی سی وزرائے خارجہ کے اجلاس کے موقع پر بھی منفی سیاست سے باز نہیں آئی۔
وزیراعلیٰ پنجاب سردار عثمان بزدارسے صوبائی وزیر اوقاف پیر سید سعید الحسن نے ایوان وزیراعلی میں ملاقات کی جس میں سیاسی صورتحال، ترقیاتی منصوبوں اور چیف منسٹر ڈسٹرکٹ ڈویلپمنٹ پیکیج پر گفتگو کی گئی، عثمان بزدار کا کہنا تھا کہ عوام وزیراعظم عمران خان کے شانہ بشانہ کھڑے ہیں۔ وطن عزیز کے مسائل کا حل اتحاد و اتفاق میں مضمر ہے۔ پاک دھرتی کی مٹی ہم سب سے بھائی چارے، مذہبی رواداری اور بین المذاہب ہم آہنگی کا تقاضا کرتی ہے۔ سب کو وطن کا یہ قرض اتارنے کیلئے اپنا فرض ادا کرنا ہوگا۔
عثمان بزدار نے کہاکہ سیاست کیلئے آگے بہت وقت ہے۔ اپوزیشن رہنماؤں نے اس اہم ترین موقع پر بھی پوائنٹ سکورنگ کی کوشش کی۔ اپوزیشن بند گلی میں پھنس چکی ہیں۔ اپوزیشن تحریک عدم اعتماد کے بعد بھی روتی رہے گی۔
صوبائی وزیر پیر سید سعید الحسن نے وزیراعلیٰ عثمان بزدار کے سیاسی اور ترقیاتی ویژن کو سراہا، صوبائی وزیر کا کہنا تھا کہ وزیراعظم عمران خان حقیقی لیڈرہیں۔ وزیراعلیٰ عثمان بزدار کے ساتھ کھڑے ہیں اورساتھ کھڑے رہیں گے۔

لاہور: (ویب ڈیسک) مسلم لیگ ق کے قائدین چودھری شجاعت حسین، پرویزالٰہی اورمونس الٰہی نے کہا ہے کہ جس جذبے کے ساتھ 23 مارچ 1940ء کو قرارداد پاکستان منظور ہوئی تھی اسی جذبے کو آج دوبارہ تازہ کرنے کی ضرورت ہے۔
یوم پاکستان پر پیغام میں سابق وزیراعظم چوہدری شجاعت حسین کا کہنا تھا کہ ذاتی، سیاسی و جماعتی مفادات سے بالاتر ہو کر قومی یکجہتی کا مظاہرہ کرنا ہو گا، انسانیت کو لاحق انتہا پسندی اور غربت کے خطرات پر قابوپانا ہو گا۔ آج کے دن ایک بار پھر بانی پاکستان قائداعظم محمد علی جناح اور مصور پاکستان علامہ اقبال کو خراج عقیدت پیش کرتے ہیں۔
سپیکر پنجاب اسمبلی چوہدری پرویز الہی کا کہنا تھا کہ مسلح افواج اور دفاعی اداروں کی ملکی بقا کی خاطر قربانیوں کو کبھی فراموش نہیں کیا جا سکتا، پاکستان کا بچہ بچہ آزادی کی جدوجہد میں کشمیری بھائیوں کے شانہ بشانہ کھڑا ہے، یوم پاکستان قوم کیلئے انتہائی اہمیت کا حامل دن ہے۔ پاکستان کی مسلح افواج اور ملکی دفاعی و قانون نافذ کرنے والے اداروں کی قربانیوں کو فراموش نہیں جا سکتا۔
وفاقی وزیر مونس الہی کا کہنا تھا کہ آج کا دن ہندو اکثریت کے ظلم و جبر اور غلامی کی زنجیروں سے چھٹکارا حاصل کرنے کا دن ہے۔ مقبوضہ کشمیر کے بہن بھائیوں سے اظہار یکجہتی کرتے ہیں۔ کشمیری بھائی عرصہ دراز سے غیر انسانی لاک ڈاؤن میں زندگی بسر کر رہے ہیں۔