اسلام آباد: (ویب ڈیسک) کراچی کے اراکین قومی اسمبلی نے وزیراعظم عمران خان کی قیادت پر مکمل اعتماد کا اظہار کیا ہے۔
شہر قائد کے اراکین قومی اسمبلی نے اعتماد کا اظہار وزیراعظم عمران خان سے ہونے والی ملاقات میں کیا۔
ملاقات میں گورنر سندھ عمران اسماعیل، وزیر دفاع پرویز خٹک، وفاقی وزیر برائے بحری امور سید علی حیدر زیدی اور وزیراعظم کے معاون خصوصی ملک محمد عامر ڈوگر بھی موجود تھے۔
ہونے والی ملاقات میں آفتاب صدیقی، سیف الرحمان، عطا اللہ، اکرم چیمہ، فہیم خان، اسلم خان، عالمگیر خان، عبدالشکور شاد، کیپٹن جمیل، آفتاب جہانگیر، صائمہ ندیم اور نصرت وحید شامل تھیں۔
ذرائع کے مطابق کراچی سے پاکستان تحریک انصاف کے بانی رکن و رکن قومی اسمبلی انجینئر نجیب ہارون اور عامر لیاقت حسین وزیراعظم سے ہونے والی ملاقات میں شامل نہیں تھے۔
اس ضمن میں ذرائع کا کہنا ہے کہ وزیراعظم عمران خان نے عامر لیاقت حسین کو بھی آج ہی ملاقات کے لیے بلایا تھا۔ ذرائع کے مطابق عامر لیاقت حسین وزیراعظم سے ون ٹو ون ملاقات کرنے کے خواہش مند ہیں۔
ذرائع کے حوالے سے بتایا ہے کہ ہونے والی ملاقات میں کراچی میں وفاقی حکومت کی جانب جاری ترقیاتی منصوبوں پر بھی تفصیلی بریفنگ دی گئی اور گفتگو ہوئی۔
واضح رہے کہ گزشتہ دنوں رکن قومی اسمبلی عامر لیاقت کو منانے کے لیے گورنر سندھ عمران اسماعیل ان کے گھر بھی گئے تھے۔
پی ٹی آئی کے بانی رکن نجیب ہارون جنہوں نے بحیثیت رکن قومی اسمبلی اپنی تنخواہ نہ لینے کا اعلان کیا تھا، کچھ عرصہ قبل اپنی ناراضگی کا اظہار کرتے ہوئے اپنی نشست سے مستعفی بھی ہوگئے تھے اور استعفیٰ بھیج دیا تھا لیکن وہ منظور نہیں کیا گیا تھا۔
واضح رہے کہ نجیب ہارون کا شمار ان اراکین قومی اسمبلی میں ہوتا ہے جنہوں نے سب سے زیادہ ٹیکس ادا کیا تھا۔

اسلام آباد: (ویب ڈیسک) مسلم لیگ ن کے رہنما کیپٹن (ر) صفدر کا کہنا ہے کہ 28 مارچ کو وزیر اعظم عمران خان سے استعفیٰ لیا جائے گا، سیاسی شہدا وہ ہوتے ہیں جن کے نظریات ہوں۔
صحافیوں سے گفتگو کرتے ہوئے کیپٹن (ر) صفدر نے کہا کہ 28 مارچ کو پوری قوم ڈی چوک پہنچے گی اور وزیر اعظم عمران خان سے استعفیٰ لے گی، خیبر پختونخوا کے لوگ عمران خان کے استعفے سے خوش ہوں گے۔
ایک سوال کے جواب میں انہوں نے کہا کہ سیاسی شہدا وہ ہوتے ہیں جن کے نظریات ہوں، موجودہ حکومت کے سر پر کبوتر بٹھا دیا تھا لیکن اب کبوتر بھی پریشان ہے کہ کہاں بیٹھ گیا ہے۔
کیپٹن (ر) صفدر کا کہنا تھا کہ گندم جب گھر کی ہے تو آٹا کیوں مہنگا ہوا؟ شہباز شریف نے آٹے کی سمگلنگ روکی ہوئی تھی، ملک میں آٹے کی قیمت ایک تھی، موجودہ حکومت نے اپنی گندم باہر بھیج دی ہے، تین ہزار روپے من آٹا لینے والا کہہ رہا ہے کہ وزیر اعظم کو غرق کرو اور ہمیں سستا آٹا دو۔

اسلام آباد: (ویب ڈیسک) وزیر اعظم عمران خان کے معاون خصوصی برائے سیاسی ابلاغ ’شہباز گِل‘ چند روز پہلے دیے گئے اپنے نازیبا بیان پر قائم ہیں۔
اس حوالے سے اپنے بیان میں شہباز گِل کا مؤقف ہے کہ انہوں نے کچھ غلط نہیں بولا، انہوں نے پنجابی زبان کے الفاظ استعمال کیے جو گالی نہیں۔
خیال رہے کہ شہباز گِل نے گزشتہ دنوں نجی ٹی وی چینل پر بیٹھ کر اپنی جماعت کے منحرف رکن قومی اسمبلی رمیش کمار کو گالی دی تھی۔
ٹاک شو میں شہباز گل اور ان ہی کی پارٹی کے رکن قومی اسمبلی رمیش کمار کے درمیان بحث و مباحثہ جاری تھا۔
اس دوران شہباز گل کا کہنا تھا کہ رمیش کمار مخصوص نشست پر پاکستان تحریک انصاف میں آئے تھے، اب یہ عمران خان خان سے استعفیٰ مانگ رہے ہیں، ان میں شرم و حیا ہوتی تو یہ پہلے خود ہی استعفیٰ دے دیتے۔
انہوں نے الزام عائد کیا کہ یہ کرپٹ آدمی ہیں کینسر کی جعلی دوا بیچنے پنجاب آئے تھے۔
شہباز گِل نے جب یہ بات کی تو رمیش کمار بیچ میں بات کرنے لگے اور اسی دوران مشتعل ہوکر شہباز گل نے رمیش کمار کے خلاف غیرپارلیمانی الفاظ استعمال کیے اور کئی مرتبہ گالی بھی دی۔
آج جب ایک صحافی نے ان سے رمیش کمار کیلئے نازیبا لفظ استعمال کرنے سے متعلق سوال کیا تو انہوں نے کہا کہ انہوں نے جو لفظ استعمال کیا وہ گالی نہیں۔
شہباز گل کا مزید کہنا تھا کہ پنجابی زبان میں اس مخصوص لفظ کو گالی نہیں سمجھا جاتا، اس کی مثال دیتے ہوئے شہباز گل نے ایک اور نازیبا لفظ استعمال کیا اور کہا کہ یہ لفظ بھی پنجابی میں گالی کےزمرے میں نہیں آتا۔

اسلام آباد: (ویب ڈیسک) وفاقی وزیر اطلاعات فواد چوہدری کا کہنا ہے کہ اگر 21کواجلاس نہیں ہوا تو 3 دن بعد ہوجائے گا کون سی قیامت آگئی۔
فواد چودھری نے کہا کہ مولانا فضل الرحمان سے کوئی پوچھ لیں مذہب کے نام پر کیا کیا؟ مولانا فضل الرحمان نے دین فروشی کےسوا کچھ نہیں کیا، اوآئی سی کی تاریخ 6 ماہ پہلے طے ہوئی تھی، عمران خان ڈٹ کرکھڑے ہیں، منحرف اراکین کے پاس موقع ہے واپس آجائیں، منحرف ارکان اپنے بچوں کومنہ دکھانےکے قابل نہیں، ارکان کے گھروں سے ہمیں ٹیلیفون آئے ہیں۔
انہوں نے کہا کہ اجلاس 22 کےبجائے 25 مارچ کوہورہا ہےتوکیا قیامت آگئی؟ عمران خان کی حکومت مافیاز کیخلاف کھڑی ہے،شرم کی بات ہے ،کہتےہیں اوآئی سی کاانعقاد کرکے دکھائیں، اس لڑائی میں فتح حق اورسچ کی ہو گی، یہ معاملہ اب منطقی انجام تک پہنچے گا، آرٹیکل 63اے آئین کابنیادی حصہ ہے، ن لیگ میڈیا سیل اداروں کے خلاف پی ٹی آئی کا نام استعمال کررہا ہے۔

صدر پاکستان ڈاکٹر عارف علوی نے وزیراعظم پاکستان عمران خان کی ہدایت پر 23 مارچ کے موقع کی مناسبت سے پنجاب بھر کی جیلوں میں مقید قیدیوں کے لیے 90 دن کی سزاوں میں کمی کا اعلان کر دیا۔
قیدیوں کی سزاوں میں کمی آئین پاکستان 1973 کے آرٹیکل 45 کے تحت کی جائے گی۔
سزاوں میں کمی کا اطلاق ان تمام قیدیوں پر ہوگا جو اپنی سزا کا 2/3 حصہ کاٹ چکے ہیں سوائے انکے جن کو دہشت گردی، منشیات اور حدود آرڈیننس کی دفعات کے تحت سزا ہوئی ہوں۔
مرد قیدی جن کی عمر 65 سال سے اور خواتین قیدی جن کی عمر 60 سال سے زائد ہے اور اپنی سزا کا 1/3 حصہ کاٹ چکے ہیں ان پر بھی سزاوں میں کمی کا اطلاق ہوگا۔
سزاوں میں کمی کا اطلاق 18 سال سے کم عمر والے قیدیوں پر بھی ہوگا اگر وہ اپنی سزا کا 1/3 حصہ کاٹ چکے ہوں گے۔
مالی غبن اور قومی خزانے کو نقصان پہنچانے والے قیدیوں پر ان سزاوں میں کمی کا اطلاق نہیں ہوگا۔
سزاوں میں کمی کے اعلان پر پنجاب بھر کی جیلوں میں مقید قیدیوں اور ان کے ورثاء نے خوشی کا اظہار کیا اور صدر پاکستان اور وزیراعظم پاکستان کا شکریہ ادا کیا۔

اسلام آباد: (ویب ڈیسک) وزیراعظم عمران خان نے کہا ہے کہ یہ جو بنا ہوا ہے کہ سینیئر ہی اوپر آئے گا ٹھیک نہیں، تقرری اور ترقی میرٹ پر ہونی چاہیے۔
وفاقی دارالحکومت اسلام آباد میں پمز اسپتال کے نئے ایمرجنسی وارڈ کے سنگ بنیاد کی تقریب سے خطاب میں عمران خان کا کہنا تھاکہ پمز کی نئی ایمرجنسی بین الاقوامی معیار کے مطابق قائم کی جائے گی۔
انہوں نے کہا کہ 1985 کے بعد پہلی مرتبہ اسلام آباد میں نئے اسپتال کا قیام عمل میں لایا جا رہا ہے۔
ان کا مزید کہنا تھاکہ یہ جو بنا ہوا ہے کہ سینیئر ہی اوپر آئے گا ٹھیک نہیں، اگر سینیئر اچھا چیف ایگزیکٹو نہیں بن سکتا تو جو بہترین ہے اسے اوپر لے کر آنا چاہیے، تقرری اور ترقی میرٹ پر ہونی چاہیے۔
وزیراعظم کا کہنا تھاکہ جتنا میرٹ پر لوگوں کو رکھیں گے اتنا معیار بلند ہوگا، میرٹ کی بالادستی یقینی بنائی جائے تو سرکاری ادارے بھی معیاری خدمات فراہم کر سکتے ہیں۔
انہوں نے کہا کہ ہماری حکومت پہلی حکومت ہے، جس نے معیشت، صحت اور تعلیم پر بے مثال کام کیا۔