اسلام آباد: (ویب ڈیسک) اسلامی تعاون تنظیم (او آئی سی) وزرائے خارجہ کے48 ویں اجلاس کے حوالے سے متحدہ اپوزیشن نے مشترکہ اعلامیہ جاری کردیا۔
متحدہ اپوزیشن کی جانب سے جاری اعلامیے میں اسلامی دنیا کے وزرائے خارجہ، مندوبین اور دیگر شخصیات کی آمدکا خیر مقدم کیا ہے۔
اعلامیے میں کہا گیا ہےکہ معزز مہمانوں کی آمد ہمارے لیے باعث افتخار ہے، او آئی سی مہمانوں کی موجودگی کے دوران خوش گوار ماحول کے لیے کردار یقینی بنائیں گے، ایسی فضا کے لیے بھرپور حصہ ڈالیں گے جس میں معزز مہمان اپنے امور پوری توجہ سے انجام دے سکیں۔
اعلامیے کے مطابق او آئی سی کے معزز مہمانوں کی تکریم کے لیے متحدہ اپوزیشن نے لانگ مارچ کی تاریخوں میں تبدیلی کی، معزز مہمانوں کی تکریم کے لیے متحدہ اپوزیشن نےکارکنان کو 25 مارچ سے پیشتر اسلام آباد نہ آنےکی ہدایت کی ہے۔
اعلامیے میں کہا گیا ہےکہ پاکستان کے داخلی سیاسی حالات اور سیاسی کشمکش کو اوآئی سی پر اثر انداز نہیں ہونے دیا جائےگا، امیدکرتے ہیں کہ معزز مہمان اچھی یادیں لے کر وطن واپس تشریف لے جائیں گے۔
خیال رہے کہ پاکستان پیپلزپارٹی کے چیئرمین بلاول بھٹو زرداری نے کہا ہےکہ قومی اسمبلی کے اسپیکر اسد قیصر پیر کے دن عدم اعتماد پیش نہیں کرتے تو ہم ایوان سے نہیں اٹھیں گے اور دیکھتے ہیں آپ او آئی سی کی کانفرنس کیسےکرتے ہیں؟ ہم وہاں اسی فلورپربیٹھے رہیں گے جب تک ہمارا حق نہیں دیا جاتا۔
اپوزیشن لیڈر شہباز شریف نے بھی بلاول کے اعلان کی تائید کرتے ہوئے ایوان میں دھرنےکا اعلان کیا ہے، ان کا کہنا ہے کہ اجلاس بلانا اسپیکرکی ذمہ داری ہے، اگر اسپیکر نے ہاؤس کا بزنس نہ چلایا تو ہم اسمبلی ہال میں دھرنے دینے پر مجبور ہوں گے۔

اسلام آباد: (ویب ڈیسک) وزیراعظم عمران خان نے کہا ہے کہ ملک کے غدار جال میں پھنس رہے ہیں۔
سماجی رابطوں کی ویب سائٹ ٹوئٹر پر وزیر اعظم عمران خان نے حامیوں اور کارکنوں کیلئے صوفی بزرگ شمس تبریزی کا قول شیئر کیا ہے۔
قول میں لکھا ہے کہ” چال بازیوں اور چال بازوں کی پریشانی مت لو، اگر کچھ لوگ آپ کو پھنسانے اور تکلیف پہنچانے کی کوشش کر رہے ہیں تو اللہ انہیں بھی جال میں پھنسا رہا ہے۔ گڑھا کھودنے والے خود ہی گڑھے میں گرتے ہیں، کوئی برائی ایسی نہیں جس کو سزا نہ ملتی ہو اور کوئی اچھائی ایسی نہیں جس کو انعام نہ ملے، اس لیے انصاف پر یقین رکھو اور انتظار کرو۔”

کراچی: (ویب ڈیسک) گورنر سندھ عمران اسماعیل اپوزیشن کی طرف سے دئیے گئے او آئی سی اجلاس روکنے کے بیان پر سیخ پا ہوگئے۔ انہوں نے اپوزیشن کو چیلنج دیتے ہوئے کہا دیکھتے ہیں کہ کون مائی کا لعل او آئی سی اجلاس روکتا ہے۔
متحدہ اپوزیشن کی نیوز کانفرنس کے ردِ عمل میں میڈیا سے گفتگو کرتے ہوئے عمران اسماعیل کا کہنا تھا جو سندھ ہاؤس میں ہوا وہ قابل مذمت ہے،لوگ اراکین اسمبلی سے ضمیرفروشی پر جواب طلب کرنا چاہتے ہیں۔دو تین دنوں سے سندھ ہاؤس میں تماشہ لگا ہوا ہے۔منحرف ارکان کے پاس سات دن کا وقت ہے وہ معافی مانگ کر واپس آ سکتے ہیں۔
گورنر سندھ نے کہا کہ بلاول بھٹو کا او آئی سی اجلاس کے حوالے سے دھمکی دینا افسوس ناک عمل ہے،15سال بعد او آئی سی کا اجلاس ہو رہا ہے، یہ کیوں اس کو سبوتاژ کرنا چاہتے ہیں۔عمران اسماعیل نے اپوزیشن کو چیلنج کرتے ہوئے کہا دیکھتے ہیں کون مائی کا لعل او آئی سی اجلاس روک سکتا ہے۔
خیال رہے کہ پاکستان پیپلز پارٹی کے چیئرمین بلاول بھٹو زرداری نے حکومت کو دھمکی دی تھی کہ اگر پیر کے روز قومی اسمبلی میں تحریک عدم اعتماد پیش نہ کی گئی تو پھر وہ دیکھ لیں گے کہ او آئی سی کانفرنس کیسے ہوتی ہے۔ اپوزیشن لیڈر شہباز شریف نے کہا تھا کہ اگر تحریک عدم اعتماد پیش نہ کی گئی تو قومی اسمبلی کے اندر ہی دھرنا دے دیا جائے گا۔

اسلام آباد: (ویب ڈیسک) وزیر اطلاعات و نشریات فواد چودھری نے کہا ہے کہ شطرنج بھی ہمارے پاس، چالیں اور مستقبل بھی ہمارے پاس ہے، یہ لوگ بادشاہ کو گرانے نکلے تھے لیکن انہیں پتہ نہیں تھا راستے میں کتنی مشکلات آئیں گی۔عمران خان کے بغیر پاکستان کی سیاست مکمل نہیں اور تحریک انصاف کے بغیر پاکستان کی حکومت مکمل نہیں۔
ان خیالات کا اظہار انہوں نے بنی گالا میں میڈیا سے گفتگو کرتے ہوئے کیا۔ اس موقع پر وفاقی وزیر توانائی حماد اظہر بھی موجود تھے۔
وزیر اطلاعات نے کہا کہ ہمارے سیاسی مخالفین کو ہوش آگیا ہے اور انہیں لگ پتہ گیا ہے کہ عمران خان اور پی ٹی آئی عوام میں کتنے مقبول ہیں۔ وزیراعظم کی زیر صدارت اجلاس میں وزیر توانائی حماد اظہر کا بجلی کی قیمت میں پانچ روپے کمی کرنے پر شکریہ ادا کیا گیا۔ پٹرول اور بجلی کی قیمتوں میں کمی کو ہر طبقہ ہائے فکر کے لوگوں نے سراہا ہے۔
انہوں نے کہا کہ پاکستان میں کل پرامن احتجاج کے لئے جو لوگ نکلے وہ پاکستان کے ہیرو ہیں، ہمیں اچھائی اور بدی میں فرق کرنا ہے، امر بالمعروف و نہی عن المنکر ہماری سوسائٹی کی بنیاد ہے۔ ڈی چوک جلسے کا تھیم ”امر بالمعروف” ہوگا۔
فواد چودھری نے کہا کہ ضمیر فروشوں کو نوٹسز جاری کر دیئے ہیں، ہم نے انہیں سات دن دیئے ہیں وہ واپس آ سکتے ہیں۔ ایک صاحب کے بھائی کا فون آیا اور کہا کہ ان کے بھائی کی حرکت پر ہمارا خاندان شرمندہ ہے۔ سندھ ہائوس کے باہر سندھ پولیس کا پہرا لگا ہوا ہے، ہم کسی کو قید میں نہیں چھوڑیں گے، سب لوگوں کو باہر آنے کا موقع ملے گا۔
انہوں نے کہا کہ اتحادیوں کے ساتھ معاملات جلد طے ہو جائیں گے، لوگوں کی واپسی کا سفر آپ سب دیکھیں گے۔ حکومت نہ پہلے کہیں جا رہی تھی، نہ اب کہیں جا رہی ہے اور نہ آئندہ کہیں جائے گی۔ جن لوگوں کا عمران خان کے ساتھ گذارا نہیں اور ان کے پیٹ میں درد ہے تو ہم انہیں دوائی دینے کو تیار ہیں، لیکن گذارا عمران خان کے ساتھ ہی کرنا پڑے گا۔ ہماری کوشش ہے کہ معاملات جلد طے ہوں اور ہم معیشت کی بہتری کی جانب لوٹ سکیں، کہیں ایسا نہ ہو کہ سیاست کی وجہ سے معیشت کو نقصان پہنچے۔
فواد چودھری نے کہا کہ آصف زرداری اور بلاول بھٹو شہباز شریف کے ساتھ بیٹھے ہیں، مذاکرات ہو رہے ہیں کہ پیٹ پھاڑ کر ہم نے پیسے کیسے واپس لینے ہیں۔ اپنی قوم پر فخر ہے، قوم نے ثابت کیا ہے کہ یہ 1989ء یا 1990ء کی دہائی نہیں ہے، یہاں برے کو برا کہنے والے لوگ موجود ہیں۔ وزیراعظم کا پیغام دینا چاہتا ہوں کہ پرامن احتجاج ہمارا حق ہے لیکن اس احتجاج میں تشدد نہیں ہونا چاہئے، احتجاج ہر ذی شعور کا آئینی حق ہے۔ ہارس ٹریڈنگ کے حوالے سے پیر کو ریفرنس دائر کر دیں گے، سپریم کورٹ میں یہ معاملہ جائے گا۔
انہوں نے کہا کہ سارے شیخ چلی اکٹھے ہو چکے ہیں، ان کے خواب روز بنتے اور ٹوٹتے ہیں۔ شہباز شریف نے 60 کی دہائی کے سوٹ نکال رکھے ہیں، کہیں اب ہیٹ پہن کر ہاتھ میں پائپ بھی نہ پکڑ لیں، جتنا وہ خود کو دکھانا چاہتے ہیں کہ میں گورا ہوں، ایسا لگ نہیں رہا۔ گورا بننے کے لئے وہ دوائیاں اور کریمیں بھی استعمال کر رہے ہیں۔ اپنی اوقات کے مطابق بندہ بات کرتے ہوئے اچھا لگتا ہے، میرا ووٹ بینک عمران خان کی وجہ سے ہے۔