اسلام آباد: (ویب ڈیسک) پیپلزپارٹی نے کسانوں کے مسائل پر آواز اٹھانے کے لیے ملک بھر میں ٹریکٹر مارچ کا اعلان کر دیا۔ نوید قمر اور شازیہ مری کا کہنا تھا کہ واشنگٹن کی سوچ رکھنے والوں کو یہاں کے کسان کے مسائل کا علم ہی نہیں، کھاد والا ٹرک گزرتا ہے تو لوٹ مار شروع ہو جاتی ہے۔
سید نوید قمر اور شازیہ مری نے اسلام آباد میں پریس کانفرنس کرتے ہوئے کہا کہ حکومت نے چینی کی طرح کھاد کا بھی بحران پیدا کر دیا، انہیں کسانوں کے مسائل کا ادراک ہی نہیں۔ رکن قومی اسمبلی شازیہ مری نے کہا کہ پیپلزپارٹی منی بجٹ کیخلاف احتجاج کا ہر جمہوری طریقہ اختیار کرے گی، مہنگائی کے مارے عوام کو اس سے نجات دلائیں گے۔ پیپلز پارٹی رہنماؤں کا کہنا تھا کہ حکومت مکمل طور پر ناکام ہو چکی۔

لاہور: (ویب ڈیسک) سپیکر پنجاب اسمبلی چودھری پرویز الہی نے کہا ہے کہ مہنگائی کنٹرول کرنے اور عوام کو ریلیف دینے کیلئے فوری اقدامات کرنا ہونگے، جمہوری حکومت کی مضبوطی کیلئے عوام کی پریشانیوں کو کم کرنا ہوگا۔
سپیکر پنجاب اسمبلی چودھری پرویز الٰہی لاہور میں جنرل سیکرٹری مسلم لیگ پنجاب سینیٹر کامل علی آغا کی رہائش گاہ پر پہنچے اور کامل علی آغا کے بڑے بھائی ڈاکٹر کاظم علی آغا کی وفات پر اظہار تعزیت کیا۔ اس موقع پر سابق ارکان اسمبلی وقاص حسن موکل اور آمنہ الفت سمیت مسلم لیگی رہنما و کارکن بھی موجود تھے۔ چودھری پرویز الٰہی نے کاظم علی آغا کے درجات کی بلندی کیلئے فاتحہ خوانی پڑھی اور لواحقین کیلئے صبر جمیل کی دعا کی۔
اس موقع پر گفتگو میں چودھری پرویز الہی کا کہنا تھا کہ عوام کو ریلیف دیئے بغیر جمہوری حکومت کی بنیاد نہیں رکھی جا سکتی، ہمیں اندازہ ہے اس وقت ملک میں مہنگائی کا شدید طوفان برپا ہے، روز بروز اشیائے ضروریہ کی قیمتوں میں اضافے سے عوام پریشان ہے، حکومت کو چاہیے عوام کی مشکلات اور پریشانیوں کو فوری حل کرے، حکومت مہنگائی کم نہیں کر سکتی تو بڑھنے بھی نہ دے۔

کراچی: (ویب ڈیسک) بے رحم لٹیروں نے خوشیاں ماتم میں بدل دیں، کراچی میں چند روز قبل شادی کرنے والا ڈکیتی مزاحمت پر قتل کر دیا گیا، کشمیر روڈ پر ڈاکو شاہ رخ کی والدہ اور بہن سے چوڑیاں اتروانے کی کوشش کرتے رہے۔
کراچی والے مکمل طور پر ڈاکوؤں کے رحم و کرم پر، ایک ہی دن میں تین افراد ڈکیتی مزاحمت پر قتل کر دیئے گئے۔ کشمیر روڈ پر گھر کی دہلیز پر ڈاکوؤں کی فائرنگ سے 28 سالہ نوجوان شاہ رخ جاں بحق ہوگیا۔ مقتول اسپتال پہنچنے سے قبل ہی دم توڑ گیا۔ خاندانی ذرائع کے مطابق 2 روز بعد مقتول کا ولیمہ تھا۔ واقعہ کی سی سی ٹی وی فوٹیج کے مطابق مقتول کی والدہ اور بہن رکشے میں گھر پہنچی، مقتول نے دروازے کھولا اور مزاحمت کرنے پر ملزمان کی گولی کا نشانا بنا۔
کلفٹن میں ڈاکوؤں نے بینک سے رقم لے کر نکلنے والے ویر بھان نامی شہری سے 73 لاکھ روپے لوٹ لئے۔ مزاحمت پر ملزمان نے فائرنگ کر کے متاثرہ شہری کو قتل کر دیا۔ لوٹ مار کے دوران مقتول اپنے بھائی کے ہمراہ موجود تھا۔ سی سی ٹی وی فوٹیج میں بینک کے اندر ملزمان کو متاثرہ شہری کا انتظار کرتے دیکھا جاسکتا ہے۔ ڈکیتی کا ایک اور واقعہ سپر ہائی وے بسم اللہ سینٹر کے قریب پیش آیا جہاں مزاحمت پر 55 سالہ عبدالقادر جان سے ہاتھ دھو بیٹھا۔
دوسری جانب پپری کے علاقے میں گھر میں فائرنگ سے خاتون سمیت دو افراد جاں بحق ہوئے۔ پولیس کے مطابق مقتولین آپس میں رشتہ دار تھے۔ ابتدائی طور پر واقعہ غیرت کے نام پر قتل کا معلوم ہوتا ہے، تاہم واقعہ میں مقتولہ کے شوہر اور اس کے بھائی کے ملوث ہونےکا شبہ ہے۔