وزیرِ اعظم عمران خان سے معاونِ خصوصی  سیاسی امور و چیف وہیپ ملک عامر ڈوگر کی ملاقات ہوئی جس میں گذشتہ روز منعقد ہونے والے قومی اسمبلی کے اجلاس اور قانون سازی پر گفتگو کی گئی۔

ملاقات میں وزیرِ اعظم نے پارٹی اور اتحادی جماعتوں کے اراکین کا اہم ملکی امور اور سپلیمنٹری فنانس بل کی منظوری پر شکریہ ادا کیا جبکہ وزیراعظم نے ملک عامر ڈوگر کی کوششوں کو بھی سراہا۔

اس موقع پر وزیرِ اعظم عمران خان نے اجلاس میں ممبران کی شرکت اور قانون سازی کے حوالے سے کارکردگی پر بھی رپورٹ طلب کی جبکہ عمران خان نے ملکی ترقی کیلئے پارلیمنٹ کے کردار کو مضبوط کرنے اور مؤثر قانون سازی کی اہمیت پر بھی زور دیا۔

وزیرِ اعظم عمران خان نے ممبران کے حلقہ جات کے مسائل کے حل، ترقیاتی بجٹ کی فراہمی اور عوامی فلاح کے منصوبوں کی معینہ مدت میں تکمیل کو یقینی بنانے کی ہدایات جاری کیں۔

اسلام آباد: (ویب ڈیسک) شیخ رشید نے کہا ہے کہ نواز شریف آنا چاہتے ہیں آئیں، نہیں آنا چاہتے نہ آئیں، پاکستانی سیاست سے چاروں شریف مائنس ہیں، یہ چاہتے ہیں جو ہاتھ عمران خان کے سر پر رکھا گیا ان پر بھی رکھا جائے، وہ ہاتھ ان کی گردن پر تو آئے گا ان کے سر پر نہیں۔
وفاقی وزیر داخلہ شیخ رشید نے اسلام آباد میں نیوز کانفرنس کرتے ہوئے کہا کہ اپوزیشن 2، 2 لانگ مارچ کر رہی ہے، اپوزیشن ایک ہی مارچ کرے تاکہ ٹوکرا آپ پر رکھ دیا جائے، 23 مارچ کو تاریخی پریڈ ہونے جا رہی ہے، او آئی سی کے مہمان بھی پریڈ دیکھنے آئیں گے۔ انہوں نے کہا کہ خوشی سے کوئی بھی آئی ایم ایف نہیں جاتا، خزانے کو اتنا لوٹا گیا کہ آئی ایم ایف کی سخت شرائط بھی ماننا پڑیں، حکومت کا چوتھا سال ویسے ہی نکل جائے گا، پانچواں سال الیکشن کا ہوگا۔
شیخ رشید کا کہنا تھا کہ وزیراعظم عمران خان آئندہ ماہ چین کا دورہ کریں گے، آج بھی وزیراعظم کو آٹے کی قیمتوں میں اضافے سے متعلق آگاہ کیا، 3 سے 4 ماہ میں مہنگائی پر قابوپالیں گے، لوگ عمران خان سے چوروں کو جیل بھیجنے کی توقع کرتے ہیں، عمران خان کی حکومت 5 سال پورے کرے گی۔

اسلام آباد: (ویب ڈیسک) وزیراعظم عمران خان سے آرمی چیف کی ون آن ون ملاقات ہوئی، جس میں ملک کی سکیورٹی اور افغانستان کی صورتحال پر بات چیت کی گئی۔
قبل ازیں وزیر اعظم کے زیر صدارت اپیکس کمیٹی کا اجلاس ہوا، جس میں آرمی چیف جنرل قمر جاوید باجوہ اور ڈی جی آئی ایس آئی بھی شریک ہوئے۔ سینئر وزراء بھی اجلاس میں موجود تھے۔ اجلاس میں افغانستان کی صورتحال پر تفصیلی طور پر بات چیت کی گئی۔

اسلام آباد: (ویب ڈیسک) حکومت نے انسداد کورونا کی بوسٹر ویکسین کی عمر کی حد کم کر کے 18 سال کر دی، مذکورہ فیصلہ این سی او سی کے آج ہونے والے اجلاس میں کیا گیا۔
بوسٹر ویکسین کے لیے عمر کی حد میں کمی ،این سی او سی کے مطابق 15 جنوری سے 18 سال کی عمر کے افراد بوسٹر ویکسین لگوا سکتے ہیں۔ بوسٹر ویکسین پہلی ویکسی نیشن مکمل ہونے کے 6 ماہ بعد لگوائی جا سکتی ہے۔
حکومت نے عوام کی سہولت کیلئے کورونا کی بوسٹر خوراک بھی بلا معاوضہ رکھی ہے تا کہ غریب شہری بھی کورونا وبا سے محفوظ رہ سکیں۔ واضح رہے کہ اس سے پہلے بوسٹر خوراک لگوانے والے شخص کو ایک ڈوز کے بدلے 1270 روپے ادا کرنا پڑتے تھے۔

پشاور: (ویب ڈیسک) خیبرپختونخوا اسمبلی کا اجلاس اراکین کی عدم دلچسپی کے باعث کورم کی نذر ہوگیا، سپیکر نے حکومتی اور اپوزیشن اراکین کے غیر حاضر ہونے پر اجلاس ملتوی کردیا۔
خیبرپختونخوا اسمبلی کا اجلاس ڈپٹی سپیکر محمود جان کی زیر صدارت ہوا جس میں اراکین اسمبلی کی عدم دلچسپی کے باعث کرسیاں خالی رہیں، رکن اسمبلی ثوبیہ شاہد نے کورم کی نشاندہی کرائی، گھنٹیاں بھی بجتی رہیں، سپیکر نے اجلاس پانچ منٹ کے لئے ملتوی کر دیا۔
اجلاس دوبارہ شروع ہوا تو اراکین کی تعداد 19 رہی، اجلاس میں وقفہ سوالات کے دوران اراکین کی عدم موجودگی کے باعث سوالات بھی لیپس ہوئے، اجلاس میں اراکین اور صوبائی وزراء کے عدم موجودگی سے نہ صرف بل کی منظوری بلکہ تحریک التواء پر بھی بحث نہ ہو سکی، خیبر پختونخوا اسمبلی کا اجلاس بروز پیر دوپہر دوبجے تک ملتوی کردیا گیا۔