نئی دہلی (خصوصی رپورٹ)نئی دہلی کے تہاڑ جیل میں قید حزب المجاہدین کے کمانڈر صلاح الدین کے بیٹے شاہد یوسف کو شدید تشدد کا نشانہ بنایا جارہا ہے ۔ شاہد یوسف کے وکیل نے ان کی خون آلود شرٹ عدالت میں پیش کردی۔ وکیل نے بتایا جیل کی حفاظت پر مامور تامل ناڈوفورس کے اہلکاروں نے شاہد یوسف کو بدترین تشدد کا نشانہ بنایا ہے۔ اہل خانہ نے بتایا کہ شاہد کو بدترین تشدد کا نشانہ بنانے کا واقعہ 21نومبر کو پیش آیا ۔ شاہد یوسف کو فنڈنگ کیس میں 24اکتوبر کو نیشنل انویسٹی گیشن ایجنسی نے گرفتار کیا تھا۔ شاہد نے وکیل کو بتایا انہیں اور جیل میں موجود دیگر افراد کو بغیرکسی وجہ کے انتہائی بے دردی سے ماراگیا۔ اہل خانہ نے بتایا شاہد کو سر اور کندھے پر زخم آئے اور تہاڑ جیل میں اس کی جان کو خطرہ ہے۔ کشمیری ہونے کے باعث شاہد کو سرینگر جیل میں منتقل کیا جائے۔ عدالت پیشی کے موقع پر ہمیں شاہد سے صرف 5منٹ ملاقات کاموقع دیاگیا اس دوران شاہد شدید تکلیف ور صدمے میں تھا۔ دریں اثنا نئی دہلی کی پٹیالہ عدالت نے شاہد کی جوڈیشل حراست میں 22دسمبر تک توسیع کردی۔ شاہد یوسف کے وکیل نے تہاڑ جیل میں دیگر قیدیوں پر تشدد کی تصاویر بھی عدالت کو دکھائیں۔