کراچی (ویب ڈسک)کے علاقے رئیس گوٹھ میں انصار الشریعہ سے تعلق رکھنے والے دہشتگردوں کی موجودگی کی اطلاعات پررینجرزاورپولیس کی بھاری نفری نے کارروائی کی، اس دوران دہشت گردوں نے اہلکاروں پر فائرنگ کردی جس کے نتیجے میں رینجرز کے 2 اور سی ٹی ڈی کا ایک اہلکار زخمی ہوگیا جب کہ جوابی کارروائی میں انصارالشریعہ کے امیرسمیت 8 دہشت گرد ہلاک ہوگئے۔ رات کی تاریکی کا فائدہ اٹھاتے ہوئے کچھ دہشت گرد فرار ہونے میں کامیاب ہوگئے۔ کارروائی کے دوران دہشت گردوں کے ٹھکانے سے اسلحہ، بارود اور دیگر سامان بھی آمد کرلیا گیا ہے۔ترجمان رینجرزکے مطابق ہلاک دہشتگردوں کی شناخت کا عمل جاری ہے جن میں سے 2 دہشتگردوں کی شناخت ہو گئی ہے، اس گروہ کے سرغنہ کا نام شہر یارالدین عرف ڈاکٹر عبداللہ ہاشمی تھا۔ یہ انصار الشریعہ کا امیراور تمام دہشتگردی کے حملوں کا ماسٹر مائنڈ تھا جب کہ دوسرا دہشت گرد ارسلان بیگ انصار الشریعہ کی ٹارگٹ کلنگ ٹیم کا حصہ تھا۔

ر اولپنڈی(ویب ڈیسک ) ر اولپنڈی میں پیرودہائی میں رینجرزکومبنگ آپریشن کے دوران بدنام زمانہ ملزم کے ڈیرے سے غیر قانونی گیٹ وے ایکسچینج پکڑا گیا۔ راولپنڈی کے علاقے پیرودہائی میں رینجرز نے کومبنگ آپریشن کے دوران بدنام زمانہ ملزم کے ڈیرے پر بھی چھاپہ مارا اورکارروائی کے دوران ڈیرے سے غیر قانونی گیٹ وے ایکسچینج پکڑ لیا گیا۔میڈیا رپورٹس کے مطابق غیرقانونی گیٹ وے ایکسچینج پی ایس ایل اور بین الاقوامی کرکٹ میچزپرجوا اورحوالہ و ہنڈی کے لیے استعمال کیا جاتا تھا، اس کے علاوہ یہاں سے ہی بے نظیر انکم سپورٹ کے جعلی میسجز کے ذریعے سادہ لوح لوگوں سے رقم ہتھیائی جاتی تھی۔ اس کے علاوہ آپریشن کے دوران 9 پستول اورایک ایس ایم جی بھی برآمد کر لی گئی جسے تھانہ پیر ودہائی منتقل کردیا گیا ۔

حیدر آباد (ویب ڈیسک ) حیدر آباد بڑی تباہی سے بچ گیا ، رینجرز کی کارروائی میں خود کش حملہ آور مارا گیا۔ ذرائع کے مطابق رینجرز کو اطلاع ملی تھی کہ امانی شاہ قبرستان کے قریب ملک دشمن عناصر موجود ہیں جس پر انہوں نے علاقہ میں سرچ آپریشن شروع کیا۔ اسی دوران ایک مشکوک شخص کو روکا گیا تو اس نے رینجرز پر فائرنگ کر دی ، رینجرز کی جوابی کارروائی میں دہشتگرد مارا گیا ، تلاشی لینے پر اس کے قبضے سے ایک خودکش جیکٹ بھی برآمد ہوئی جسے ناکارہ بنا دیا گیا ، رینجرز نے ملزم کے مزید ساتھیوں کی تلاش کیلئے علاقہ میں سرچ آپریشن شروع کر دیا ہے۔ بتایا گیا ہے کہ رینجرز نے دو مشکوک افراد کو امام بارگاہ باب علی میں گھسنے سے روکا تو انہوں نے فائرنگ کر دی ، رینجرز نے جوابی کارروائی کی تو ملزموں نے فرار ہونے کی کوشش کی ، اسی دوران فائرنگ کے تبادلے کے دوران ایک ملزم موقع پر گولی لگنے سے مارا گیا جبکہ اس کا ساتھی فرار ہونے میں کامیاب ہوگیا جس کی تلاش کیلئے چھاپے مارے جا رہے ہیں۔ رینجرز نے مرنے والے دہشتگرد کی تلاشی لی تو اس کے پاس سے ایک خودکش جیکٹ بھی برآمد ہوئی جسے ناکارہ بنا دیا گیا جبکہ اس کے فرار ہونے والے ساتھی کی تلاش کا کام شروع کر دیا گیا ہے۔