اسلام آباد(آئی این پی) وزیراعظم نے بلوچستان کے ضلع مستونگ میں فتنہ الہندوستان کے دہشتگردوں کے خلاف آپریشن ردالفتنہ-3 کے تحت سکیورٹی فورسز کی دو کامیاب کارروائیوں میں 15 دہشتگردوں کو جہنم واصل کرنے پر سیکیورٹی فورسز کی پیشہ ورانہ صلاحیتوں اور جرات کو سراہا ہے۔ وزیراعظم نے کہا کہ دہشتگردی کے مکمل خاتمے کیلئے سکیورٹی فورسز کی قربانیاں اور عزم قابلِ تحسین ہیں۔ پوری قوم دہشتگردی کے خلاف جنگ میں اپنی بہادر سیکیورٹی فورسز کے شانہ بشانہ کھڑی ہے۔ ملک دشمن عناصر کے ناپاک عزائم کبھی کامیاب نہیں ہونے دیں گے اور بلوچستان سمیت ملک کے ہر حصے سے دہشتگردی کے مکمل خاتمے تک ہماری کوششیں جاری رہیں گی۔ پاکستان سے آخری دہشت گرد کے خاتمے تک دہشت گردی کے خلاف جنگ جاری رہے گی۔ادھر وفاقی وزیر داخلہ محسن نقوی نے مستونگ میں فتنہ الہندوستان کے دہشتگردوں کیخلاف کامیاب آپریشنز پر سکیورٹی فورسز کی ستائش کی ہے۔ وزیرداخلہ نے 15 خوارجیوں کو جہنم رسید کرنے پر سکیورٹی فورسز کے عزم اور پیشہ وارانہ صلاحیتوں کو سراہا۔ محسن نقوی نے کہا کہ خوارجیوں کے مذموم عزائم ناکام بنانے والے سکیورٹی فورسز کے بہادر سپوتوں پر فخر ہے۔انہوں نے کہا کہ سکیورٹی فورسز کی کارروائیاں قومی سلامتی کے تحفظ کے عزم کی عکاس ہیں، وطن کے بہادر سپوتوں کو خراج تحسین پیش کرتا ہوں۔ قوم دہشتگردی کے خلاف جنگ میں سکیورٹی فورسز کے ساتھ کھڑی ہے ۔ وزیراعظم شہباز شریف نے سعودی عرب کے دارالحکومت ریاض میں کنگ عبداللہ فنانشل ڈسٹرکٹ پر حوثی حملے کی شدید مذمت کرتے ہوئے کہا ہے کہ پاکستان مشکل کی اس گھڑی میں اپنے برادر ملک سعودی عرب اور اس کے عوام کے ساتھ کھڑا ہے۔ سماجی رابطے کی ویب سائٹ ایکس پر اپنے پیغام میں وزیراعظم نے کہا کہ شہری بنیادی ڈھانچے اور معاشی تنصیبات کو نشانہ بنانے کے لیے کی جانے والی جارحانہ کارروائیاں کسی صورت قابل قبول نہیں۔ ایسے غیرذمہ دارانہ اقدامات خطے کے امن اور استحکام کے لیے خطرہ ہیں۔شہباز شریف کا کہنا تھا کہ پاکستان سعودی عرب کی خودمختاری اور علاقائی سالمیت کے تحفظ کے حق کی بھرپور حمایت کرتا ہے۔

