کوئٹہ(آئی این پی )پاکستان کسٹمز کوئٹہ نے منشیات کی اسمگلنگ کی ایک بڑی کوشش ناکام بناتے ہوئے سرانان سے 115 کلوگرام افیون برآمد کر لی ۔ حکام کے مطابق پاکستان کسٹمز، کلکٹریٹ آف کسٹمز انفورسمنٹ، کوئٹہ نے منشیات کی اسمگلنگ کی ایک بڑی کوشش ناکام بناتے ہوئے سرانان کے علاقے میں خفیہ مقام سے 115 کلوگرام افیون برآمد کی ہے ۔ضبط کی جانے والی منشیات کی تخمینہ شدہ بین الاقوامی مارکیٹ مالیت 58 کروڑ 52 لاکھ روپے بنتی ہے۔یہ کامیاب کارروائی کسٹمز موبائل اسکواڈ بلیلی نے ایک مصدقہ خفیہ اطلاع کی بنیاد پر عمل میں لائی۔ اطلاع موصول ہوئی تھی کہ سرانان میں منشیات کی بھاری کھیپ خفیہ طریقے سے چھپائی گئی ہے جسے بعد ازاں کوئٹہ اسمگل کیے جانے کا منصوبہ تھا۔اطلاع ملتے ہی کسٹمز کی ٹیم نے فوری طور پر مذکورہ مقام پر چھاپہ مارا اور دوپہر تقریبا 12:30 بجے پیکنگ سمیت 115 کلوگرام افیون اپنی تحویل میں لے لی۔ برآمد شدہ منشیات کو قانون کے مطابق محفوظ تحویل میں دے کر اسٹیٹ ویئر ہاس، کوئٹہ میں جمع کرا دیا گیا ہے۔محکمہ کسٹمز کے حکام کا کہنا ہے کہ یہ کارروائی منشیات کی اسمگلنگ کے خلاف ان کی مسلسل نگرانی اور مثر اقدامات کا منہ بولتا ثبوت ہے۔ پاکستان کسٹمز نے قومی سلامتی اور عوامی مفاد کے تحفظ کے لئے ممنوعہ اشیا کی اسمگلنگ کے خلاف کارروائیاں مزید تیز کرنے کے عزم کا اعادہ کیا ہے۔
