پش اپس ؛گانے چاہیں یا نہیں …. پی سی بی نے وضاحت کر دی

اسلام آباد، لاہور (سپورٹس رپورٹر) قومی اسمبلی کی قائمہ کمیٹی برائے بین الصوبائی رابطہ میںقومی کر کٹ ٹیم کے انگلینڈ کیخلاف ٹیسٹ سیریز میں میچز کے بعد پش آپس لگانے پر ارکان پارلیمنٹ برہم ہوگئے،کمیٹی ارکان رانا محمد افضل خان اور چوہدری نذیر نے کہا کہ کھلاڑی جیت کر تو پش اپس لگاتے ہیں لیکن ہارنے پر خاموشی کیوں اختیار کرتے ہیں، کھلاڑی پش اپس لگا کر دنیا کو کیا پیغام دینا چاہتے ہیں؟ کھلاڑی جیت کر شکرانے کے نوافل ادا کرتے تو زیادہ بہتر ہوتا جس پر پاکستان کرکٹ بورڈ کی ایگزیکٹوکمیٹی کے چیئرمین نجم سیٹھی نے کہا کہ ٹیم نے کاکول میں پاک فوج سے تربیت حاصل کی اور پش اپس کا مقصد پاک فوج کو خراج عقیدت پیش کرنا تھا، مصباح الحق نے سنچری بنانے کے بعد اپنی فٹنس ثابت کرنے کےلئے پش اپس لگائے اور دیگر کھلاڑیوں نے انہیں فالو کیا ،بورڈ نے کھلاڑیوں کو پش اپس لگانے سے منع کر دیا ہے۔ بدھ کو کمیٹی کا اجلاس چیئرمین عبدالقہار خان ودان کی زیر صدارت پارلیمنٹ ہاﺅس میں ہوا۔ اجلاس میں ارکان کمیٹی ،پی سی بی و دیگر حکام نے شرکت کی۔ اجلاس میں حکومتی رکن رانا محمد افضل خان نے قومی کھلاڑیوں کے پش اپس لگانے پر اعتراض کرتے ہوئے کہا کہ کھلاڑی جیت کر تو پش اپس لگاتے ہیں لیکن ہارنے پر خاموشی کیوں اختیار کرتے ہیں، کھلاڑی پش اپس لگا کر دنیا کو کیا پیغام دینا چاہتے ہیں جبکہ چوہدری نذیر نے رائے دی کہ کھلاڑی جیت کر شکرانے کے نوافل ادا کرتے تو زیادہ بہتر ہوتا۔ پاکستان کرکٹ بورڈ کی ایگزیکٹوکمیٹی کے چیئرمین نجم سیٹھی کا کہنا تھا کہ قومی ٹیم کے کھلاڑیوں نے کاکول میں پاک فوج سے تربیت حاصل کی اور پش اپس کا مقصد پاک فوج کو خراج عقیدت پیش کرنا تھا جبکہ مصباح الحق نے سنچری بنانے کے بعد اپنی فٹنس ثابت کرنے کے لئے پش اپس لگائے اور دیگر کھلاڑیوں نے انہیں فالو کیا لیکن اب کھلاڑیوں کو پش اپس لگانے سے منع کر دیا گیا ہے۔قومی اسمبلی کی کمیٹی کے رکن رانا محمد اقبال نے پی سی بی حکام سے پوچھا کہ پی ایس ایل کی تقریب پاکستان میں کیوں منعقد نہیں کرائی گئی جس پر نجم سیٹھی نے کہا کہ پی ایس ایل کی تقریب یو اے ای میں کرانا ہماری مجبوری تھی، غیر ملکی کھلاڑی پاکستان نہیں آنا چاہتے تھے۔ ان کا کہنا تھا کہ کور کمانڈر کراچی کو پی ایس ایل میں شرکت کی دعوت دی گئی لیکن انہوں نے شرکت نہیں کی، کور کمانڈر کراچی نے کہا ہے کہ پی ایس ایل کراچی میں کرائیں، بھرپور سیکیورٹی فراہم کریں گے، غیر ملکی ٹیمیں پاکستان آنا چاہتی ہیں لیکن اندرونی مسائل حل کرنا ہوں گے۔ نجم سیٹھی نے کمیٹی کو مزید بتایا کہ کرکٹ کھیلنے کے لئے سفارشوں کی بھرمار ہے، تلخ حقائق ان کیمرا اجلاس میں پیش کر سکتا ہوں۔بعد ازاں حکومتی رکن رانا محمد افضل خان نے میڈیا سے گفتگو کر تے ہوئے کہا کہ کرکٹ میں ایک نئی چیز ہوئی تھی جو مجھے ذاتی طور پر اچھی نہیں لگی جس پر میں نے سوال پوچھا جو میرا حق ہے، اگر پورے پاکستان کو اچھی لگی تو مجھے اس پر کوئی اعتراض نہیں ہے لیکن کرکٹ میں اگر کھلاڑی امپائر کو گھور کر بھی دیکھتا ہے تو اس کا بھی کوئی مطلب ہوتا ہے اور اگر یہ کرکٹ کے علاوہ کبڈی یا اس طرح کو کوئی دوسرا کھیل ہوتا تو مجھے کوئی اعتراض نہیں ہوتا۔ پی سی بی کے چیئرمین ایگزیکٹو کمیٹی نجم سیٹھی نے سوشل میڈیا کا استعمال کرتے ہوئے ایم این اے رانا افضل کے بیان پروضاحت کرتے ہوئے ٹویٹ کیا ہے کہ انگلینڈ کے خلاف میچ جیت کر قومی ٹیم کا پش اپس لگانا یا سجدہ کرنا محض اتفاق اور وقتی خوشی کے زیر اثر تھااس کو اتنا سنجیدہ نہیں لینا چاہیے ۔ پاکستان کرکٹ بورڈ پاک آرمی کی ٹریننگ کوقابلیت کو قدرکی نگاہ سے دیکھتا ہے اور گزشتہ چھ سالوں میں تین مرتبہ قومی ٹیم کے کھلاڑی آرمی سے فٹنس ٹریننگ لے چکے ہیں۔ میڈیا کو چاہیے کہ وہ اس معاملے کو سیاسی رنگ نہ دے۔ یاد رہے کہ مصباح الحق نے انگلینڈ کے خلا ف ٹیسٹ سنچری کرنے کے بعد پش اپس لگا کر پاک فوج کے ٹرینرز کو خراج تحسین پیش کیا تھا جس کے بعد ٹیم کے کھلاڑیوں نے میچ جیتنے کے بعد پش اپس لگائیں جو کرکٹ کی تاریخ میں انوکھا واقعہ بن گیا۔ دوسری طرف پاکستان کرکٹ بورڈ کے ترجمان نے کہا ہے کہ کھلاڑیوں کو پش اپس لگانے سے منع نہیں کیا ۔ پش اپس جو لگائی گئیں وہ ایک خوشی کا اظہار اور پاک فوج کے ٹرینرزکو خراج تحسین پیش کرنا تھا۔ فیصل آباد سے تعلق رکھنے والے ایم این اے رانا افضل نے قومی اسمبلی کی سٹینڈنگ کمیٹی میں اعتراض اٹھایا تھا کہ قومی ٹیم کے کھلاڑی جیتنے پر تو پش اپس لگاتے ہیں اور ہارنے پر خاموش بیٹھ جاتے ہیں تو یہ کیا بات ہے۔