ڈونلڈ ٹرمپ صدر ….غیر قانونی تارکین وطن کیلئے ایک بڑا سوال ….آگے کیا ہو گا ؟

نیویارک (خصوصی رپورٹ) ریپبلکن پارٹی کے ڈونلڈ ٹرمپ کے منگل کو صدر منتخب ہونے کے بعد امریکہ میں موجود گیارہ ملین سے زائد غیر قانونی تارکین وطن کے سامنے ایک بڑا سوال کھڑا ہو گیا ہے کہ اب ان کا کیا بنے گا۔ یہ تارکین وطن صدارتی الیکشن 2016کی انتخابی مہم کے دوران اس وقت سے پریشانی کا شکار تھے کہ جب انہوں نے صدارتی ا میدوار ڈونلڈ ٹرمپ کا ان کی امریکہ میں موجودگی اور ممکنہ ڈیپورٹیشن پر سخت موقف بار بار سنا ۔ واضح رہے کہ ڈونلڈ ٹرمپ کا کہنا تھا کہ وہ اگر صدر منتخب ہو گئے تو امریکہ میں موجود غیر قانونی تارکین وطن کو امریکہ چھوڑ کر واپس جانا ہوگا اور لیگل طریقے سے ملک میں آنا ہوگا تاہم انتخابی مہم کے آخری مرحلے پر انہوں نے اپنے اس موقف میں کچھ نرمی اختیار کی تھی ۔