کشمیریوں کا بھارتی فوج کیخلاف خطرناک اقدام,سکیورٹی فورسز میں خوف وہراس

اسلام آباد (خصوصی رپورٹ) کشمیری حریت پسندوں کی بھارتی سکیورٹی اور پولیس اہلکاروں سے ان کے ہتھیار چھیننے کی نئی حکمت عملی نے بھارتی فوجی اسٹیبلشمنٹ اور میڈیا میں تشویش کی لہر دوڑا دی اور اسے بڑا خطرناک رجحان قرار دیا گیا ہے۔ بھارتی ذرائع ابلاغ کے مطابق گزشتہ چار ماہ میں کشمیری حریت پسندوں نے بھارتی فوج سے 137ہتھیار چھینے۔ ہتھیار چھیننے کی زیادہ تر وارداتیں جنوبی مقبوضہ کشمیر میں ہوئیں۔ 3اکتوبر کو ضلع کلگام میں حریت پسند پولیس چوکی سے 5 خودکار رائفلیں چھین کر لے گئے جبکہ 16 اکتوبر کو بھی دوسری جگہ بھی اتنی ہی تعداد میں رائفلیں چھینی گئیں جس سے سکیورٹی حکام میں تشویش کی لہر دوڑ گئی ہے۔ لیفٹیننٹ جنرل ستیش کا کہنا ہے کہ ان واقعات کی روک تھام کیلئے پولیس کے ساتھ مل کر اقدامات کئے جائیں گے۔