اسلام آباد (صباح نیوز) پاکستان پیپلز پارٹی کے چیئرمین بلاول بھٹو زرداری نے قمر زمان کائرہ کو پیپلز پارٹی وسطی پنجاب کا صدر ندیم افضل چن کو جنرل سیکریٹری وسطی پنجاب مقرر کر دیا ہے،تفصیلات کے مطابق لاہور میں بلاول بھٹو کی زیر صدارت پیپلز پارٹی پنجاب کی کوآرڈی نیشن کمیٹی کا اجلاس ہوا جس میں پنجاب کی تنظیم سازی کے بارے میں مشاورت کی گئی۔ اجلاس میں کیا گیا جبکہ مصطفٰی نواز کھوکھر کو سیکریٹری اطلاعات منتخب کیا گیاہے مزکزی کوارڈینیشن کمیٹی نے ناموں کی توثیق کر دی ہے اور بلاول بھٹو کی منظوری کے بعد باضابطہ طور پر ان عہدیداروں کا اعلان کر دیا گیا بالاخر وسطی پنجاب میں پیپلز پارٹی کو فعال بنانے کا چیلنج قمر زمان کائرہ اور ندیم افضل چن کو تفویض کیا گیا ہے،اجلاس کے بعد میڈیا سے گفتگو کرتے ہوئے قمرزماں کائرہ کا کہنا تھا کہ وہ اس اعتماد پر پارٹی لیڈران کے بے حد شکر گزار ہیں۔ انہوں نے کہا کہ پیپلز پارٹی ملک کی روایت ہے۔ باقی جماعتیں وقت کے ساتھ ساتھ آئیں اور ختم ہوگئیں لیکن پیپلز پارٹی قائم ہے۔انہوں نے کہا کہ پیپلز پارٹی اپنے روایتی رنگ میں واپس آرہی ہے۔ مشکل وقت آتے رہتے ہیں۔ کسی اور جماعت نے اتنے مشاورتی عمل نہیں کیے جتنے پیپلز پارٹی نے کیے۔ انہوں نے بتایا کہ بقیہ عہدوں کے لیے بھی مشاورت جاری ہے جن کا بہت جلد اعلان کردیا جائے گا۔
