زرداری ، مشرف ملاقات بارے اہم خبر سے کھلبلی مچ گئی

دبئی(خصوصی رپورٹ) آئندہ دو روز کے دوران دبئی میں ہونے والی دو سماجی تقریبات سندھ خصوصاً کراچی کی سیاسی کشمکش میں اہمیت اختیار کر رہی ہے،تقریبات میں شرکت کیلئے سابق صدر پاکستان پرویز مشرف کی بھی امریکہ سے آمد کی اطلاعات ہیں جبکہ سابق صدر آصف علی زرداری کی 23 دسمبر کو پاکستان واپسی کا پروگرام ان دو روز پاکستان کی سیاست میں ہلچل کا سبب بن رہا ہے وہ شادی میں شرکت کیلئے دبئی میں رک گئے ہیں اور اب ان کاشادی میں شرکت کے بعد 23 دسمبر کو پاکستان جانے کا امکان ہے۔ سابق گورنر سندھ ڈاکٹر عشرت العباد خان کے بیٹے ڈاکٹر اربازالعباد خان کی دعوت ولیمہ 22 دسمبر کی رات اساطیر اٹلانٹک پام دبئی میں منعقدہو رہی ہے، ڈاکٹر اربازالعباد خان کی شادی عطاءالرحمن خٹک کی صاحبزادی سے طے پائی ہے۔ اس تقریب میں ناصرف کراچی، اسلام آباد سمیت ملک بھر بلکہ دبئی، لندن، یورپ، امریکہ، کینیڈا اور دیگر ممالک سے بھی اہم سیاسی، سماجی اور مذہبی شخصیات کو مدعو کیا گیا ہے۔ ممکنہ طور پر یہ تقریب سیاسی گفتگو کے حوالے سے اہمیت اختیار کرگئی ہے۔ اس کے اگلے ہی روز 23 دسمبر کو متحدہ قومی موومنٹ کے مرکزی رہنما سلیم شہزاد کی صاحبزادی شادی کی تقریب بھی دبئی کے شیرٹن ہوٹل میں ہورہی ہے۔ اس تقریب میں بھی، کراچی سمیت پاکستان، دبئی، لندن، امریکہ، برطانیہ، کینیڈا اور دیگر ممالک سے مہمان مدعو کیے گئے ہیں۔ سلیم شہزاد نے واضح طور پر ایم کیو ایم کے کسی بھی دھڑے کے ساتھ الحاق نہیں کیا، یوں توقع کی جارہی ہے کہ ایم کیو ایم لندن، ایم کیو ایم پاکستان، پاک سر زمین پارٹی اور ایم کیو ایم کے دیگر خاموش رہنما بھی اس تقریب میں شریک ہوں گے جبکہ دیگر سیاسی، مذہبی و سماجی رہنماﺅں کی آمد بھی متوقع ہے۔ یہی وہ دن ہے یعنی 23 دسمبر سابق صدر پاکستان اور پیپلز پارٹی پارلیمنٹرین کے سربراہ آصف علی زرداری بھی امریکہ، لندن اور دبئی میں طویل قیام کے بعد پاکستان واپس جانے کا اعلان کرچکے ہیں۔ تو یوں 22 اور 23 دسمبر کے ایام کراچی اور پاکستان کے حوالے سے دبئی میں انتہائی اہمیت کے دن رہیں گے۔ اب دیکھنا یہ ہے کہ دبئی میں ہونے والی یہ تقریبات کراچی کی سیاست میں کیا تبدیلیاں لاتی ہیں؟