کوئٹہ(ویب ڈیسک) ارباب کرم خان روڈ پر ہونے والی فائرنگ سے بلوچ نیشنل پارٹی مستونگ کے رہنما ملک نوید دہوار اپنے محافظ سمیت جاں بحق ہوگئے۔ کوئٹہ کے علاقے ارباب کرم خان روڈ پر نامعلوم افراد کی فائرنگ سے بلوچ نیشنل پارٹی کے رہنما ملک نوید دہوار اپنے محافظ سمیت جاں بحق ہوگئے ہیں۔پولیس نے بتایا کہ ملک نوید دہوار بلوچستان کے علاقے مستونگ میں بلوچ نیشل پارٹی کے رہنما ہیں اور آج صبح کوئٹہ میں موجود اپنی رہائش گاہ سے شوروم پر جارہے تھے کہ ارباب کرم خان روڈ پر موٹرسائیکل پر سوار نامعلوم مسلح افراد نے ان کی گاڑی پر فائرنگ کردی جس کے نتیجے میں ملک نوید اور ان کا محافظ شدید زخمی ہوگئے۔ واقعے کی اطلاع ملتے ہی پولیس اور ایف سی کی بھاری نفری جائے حادثہ پر پہنچ گئی تاہم ملک نوید دہوار اور ان کا محافظ موقع پر ہی دم توڑ چکے تھے۔ دونوں افراد کی لاشیں سول اسپتال کوئٹہ منتقل کردی گئی ہیں جب کہ پولیس نے علاقے کو گھیرے میں لے کر سرچ آپریشن شروع کردیا ہے۔

لاہور (خصوصی رپورٹ) صوبائی دارالحکومت سمیت ملک بھر میں جعلی نوٹوں کی بھرمار ہے جبکہ ملکی و غیر ملکی مالیاتی اداروں اور اے ٹی ایم مشینوں سے بھی جعلی کرنسی برآمد ہونے کا انکشاف ہوا ہے۔ ذرائع کے مطابق پولیس اور بینک کے عملے کی ملی بھگت سے شہرمیں جعلی کرنسی کا کاروبار عروج پر ہے، عیدالفطر سے ایک ماہ قبل افغانستان سے کروڑوں روپے کی جعلی کرنسی پنجاب لائی گی۔ ذرائع کا کہنا ہے کہ جعلی کرنسی کے سمگلروں کے افغانستان اور علاقہ غیر کے سمگلروں کے ساتھ گہرے مراسم ہیں، ان افراد کے بعض پولیس و کسٹم افسروں سے بھی مراسم بتائے جاتے ہیں، یہ گینگ طویل عرصہ سے پورے ملک میں جعلی کرنسی کا کاروبار کر رہا ہے۔ ذرائع کے مطابق سمگلرز ایک کروڑ مالیتی جعلی نوٹ بیس لاکھ روپے کے عوض دیتے ہیں۔ ذرائع کا مزید کہناہے کہ جعلی کرنسی کی پہچان کرنا انتہائی مشکل ہے یہاں تک کہ اگر جعلی نوٹوں کومشین میں بھی چیک کرنے کیلئے ڈال دیا جائے تو مشین بھی اوکے کی تصدیق کرتی ہے۔

لاہور ((خصوصی رپورٹ)ایم ڈی واسا نے واسا ملازمین کے لئے خصوصی پیکج کا اعلان کر دیا ہے۔ اس پیکیج کے تحت سینٹری ورکرز اور سیور مینوں کی تنخواہ میں 5 ہزار روپے ماہانہ اضافہ کرنے کا فیصلہ کیا گیا ہے۔ تنخواہ کے ساتھ ساتھ ہر ماہ سینٹری ورکرز اور سیور مینوں کو 5 ہزار اضافی رسک الانس دیا جائے گا جبکہ تمام ملازمین کو ڈرائی یونیفارم الگ سے دی جائے گی۔ تمام افسروں کی جدید خطوط پر ٹرینگ کی جائے گی جس کا آغاز آج سے کیا جا رہاہے۔ تفصیلات کے مطابق واسا ملازمین کے لئے واسا کی تاریخ کی سب سے بڑی خوشخبری کا ایم ڈی نے اعلان کر دیا ہے جس کے تحت واسا کے سینٹری ورکرز اور سیورمینوں کو خطرناکی سپیشل رسک الانس دیا جائے گا۔ ہر ماہ ملازمین کی تنخواہ میں 5 ہزار فی کس کے حساب سے اضافی سپیشل رسک الانس دیا جائے گا۔ اسی طرح واسا درجہ چہارم کے ملازمین کی 10 فیصد تنخواہ میں اضافہ کے ساتھ 5 ہزار مزید رسک الانس کی صورت میں تنخواہ میں اضافہ کیا جا رہا ہے جس کے لئے ایم ڈی واسا زاہد عزیز نے اس الانس کی منظوری دیتے ہوئے سمری تیار کرنے کا حکم جاری کر دیا ہے۔ سمری کے لئے ڈائریکٹر فنانس میاں منیر اور ڈائریکٹر ایڈمن محمود احمد بھٹی کو ٹاسک ایم ڈی نے سونپ دیا ہے جو سمری تیار کر کے ایم ڈی کو ایک ہفتہ کے اندر پیش کریں گے جو ایم ڈی منظوری کے لئے 9 جولائی کو ایل ڈی اے اتھارٹی کے ہونے والے اجلاس میں پیش کر کے فائنل منظوری لیں گے۔ اس اہم خبر کے ساتھ ہی واسا کے 8 ہزار سینٹری ورکرز اور سیور مینوں میں خوشی کی لہر دوڑ گئی ہے۔ انہوں نے ایم ڈی واسا کی اس غریب اور ملازم دوستی جیسے اقدام کو واسا کی تاریخ کا سب سے بڑا ملازم دوست اقدام قرار دے دیا ہے اور ایم ڈی کو زبرست الفاظ میں خراج تحسین پیش کیا ہے۔ اس حوالے سے واسا کی سی بی اے یونین کے صدر فاروق چودھری اور سیکرٹری جنرل شاہد چودھری نے کہا ہے کہ ایم ڈی نے سینٹری ورکرز کے لئے 5 ہزار سپیشل رسک پیکج جاری کر کے ایک تاریخی فیصلہ کیا ہے جس پر ہم ایم ڈی زاہد عزیز کے مشکور ہیں۔ بتایا گیا ہے کہ ایم ڈی واسا نے واسا کے زیر زمین درجنوں فٹ گہرے سیوریج سسٹم سمیت دیگر نالوں ، گٹروں کی صفائی کرنے والے سیور مینوں اور سینٹری ورکرز کے لئے خطرناکی کے نام سے خصوصی سپیشل پیکج دینے کا اعلان کر دیا ہے۔ جس کے تحت ہر سینٹری ورکز اور سیور مین کو تنخواہ کے علاوہ 5 ہزار ماہوار رسک الانس دیا جائے گا۔ دوسری طرف واسا کے سینٹری ورکرز اور سیور مین کے لئے ڈرائی یونیفارم دی جائے گی۔ یہ یونیفارم گندے پانی یا بارش میں کام کرتے وقت استعمال کی جائے گی یہ یونیفارم بھی پاکستان میں پہلی مرتبہ لاہور واسا میں دی جائے گی۔ اس وردی کے پہننے سے واسا ملازم کے کپڑے نہ گندے ہونگے اور نہ ہی ان پر پانی اثر کرے گا۔ دریں اثنا ایم ڈی نے آج سے واسا کے تمام ایکسئین اور ایس ڈی اوز کی تربیت کا کام بھی شروع کر دیا ہے۔ اس کے تحت آج سے ٹریننگ کا آغاز کیا جا رہا ہے۔ ٹریننگ پنجاب میونسپل ڈویلپمنٹ ایجنسی دے گی۔ آج پہلا سیشن ایم ڈی واسا میں ہو گا۔ ٹریننگ ورکشاپ سے واسا ملتان کے سابق ایم ڈی عاشق چودھری خطاب کریں گے۔ آج کے سیشن میں ایم ڈی لاہور زاہد عزیز مہمان خصوصی ہونگے۔ اس حوالے سے ایم ڈی واسا زاہد عزیز نے گفتگو کرتے ہوئے تصدیق کی ہے کہ واسا کی تاریخ میں پہلی مرتبہ واسا کے ملازمین اور افسروں کو خصوصی حوصلہ افزائی الانسز دئیے جا رہے ہیں۔ تمام افسروں کی تربیت کا آغاز آج سے کیا جا رہا ہے جبکہ ملازمین کو تاریخ میں پہلی مرتبہ ڈرائی یونیفارم دی جا رہی ہے۔ سپیشل رسک الانس کی مد میں 5 ہزار فی کس ملازم دیا جا رہا ہے۔ ایم ڈی نے کہا کہ عوام کو ریلیف فراہم کرنے کے لئے شب و روز ایک کرنے والے ملازمین کی حوصلہ افزائی کی جائے گی جبکہ کام چوروں اور ڈنگ ٹپاپالیسی پر کام کرنے والے افسروں کے لئے محکمہ میں کوئی جگہ نہیں ہے۔ کام کرنے والوں کو سینے سے لگایا جائے گا جبکہ کام چوروں کو کیک آٹ کیا جائے گا جس کے لئے فہرستیں تیار کر لی گئی ہیں۔

لاہور (خصوصی رپورٹ) پنجاب حکومت کی طرف سے دارالحکومت لاہور کے بعد صوبہ کے دیگر 6 بڑے شہروں سرگودھا، راولپنڈی، گوجرانوالہ، ملتان، فیصل آباد اور بہاولپور میں بھی 40 ارب روپے لاگت کے سیف سٹی منصوبے شروع کرنے کا نیا مرحلہ شروع ہوگیا، جبکہ ذرائع کی تحقیقات اورمتعلقہ حکام سے انٹرویوزکے دوران انکشاف ہوا کہ ٹھیکوں میں شفافیت اور ایمانداری کی دعویدار پنجاب سیف سٹی اتھارٹی نے ایک ایسی چینی کمپنی زیڈ ٹی ای کو بھی پیشکش جمع کرانے کی اجازت دیدی جسے امریکہ میں تجارتی قوانین کی سنگین خلاف ورزیوں پر بعض سخت پابندیوں اورجرمانے کا سامنا کرنا پڑا، اس کمپنی نے سیف سٹی اتھارٹی کو دنیا کے کسی ملک میں تجارتی پابندی اور بلیک لسٹ نہ ہونے کا مبینہ طور پر جعلی سرٹیفکیٹ بھی جمع کرا دیاکہ جس سے اسلام آباد میں چینی سفارتخانہ کے کمرشل قونصلر نے بھی لاعلمی ظاہرکی۔ معلوم ہواکہ پنجاب کے 6بڑے شہروں میں کیمروں کی تنصیب ،ٹریفک کا نظام بہتر بنانے اور سٹریٹ کرائم روکنے کے علاوہ پولیس اور تھانہ کلچر تبدیل کرنے کے لحاظ سے شروع کردہ اپنی نوعیت کے اس اہم ترین منصوبہ کیلئے پنجاب حکومت نے سپلائر کریڈٹ طریقہ کار تحت 35 کروڑ ڈالر کا غیر ملکی قرض لینے کا فیصلہ کیاجبکہ خواہشمند 14 کمپنیوں میں سے 9 کو 8 جولائی 2017 تک اپنی پیشکشیں جمع کرانے کی ہدایت کی گئی،ان 9 کمپنیوں میں چین کی زیڈ ٹی ای کارپوریشن بھی شامل ہے جس کو امریکہ میں تجارتی قوانین کی خلاف ورزی پر مجرم قرار دیکر اسی سال مارچ میں 89 کروڑ 23 لاکھ 60 ہزار ڈالر کا کریمنل اور سول جرمانہ عائد کیا گیا جبکہ7 برسوں کیلئے کمپنی پر مختلف تجارتی پابندیاں بھی لگا دی گئیں،امریکہ کے محکمہ انصاف کیساتھ طے پانیوالے معاہدے کا اعتراف زیڈ ٹی ای کے صدر دفتر شین زن سے جاری کی گئی ایک پریس ریلیز میں بھی 7 مارچ 2017 کو کیا گیا،کمپنی کے چیئرمین ڈاکٹر ژا شن منگ نے اپنے بیان میں کہاتھاکہ امریکی محکمہ انصاف سے کئے گئے معاہدے کے تحت ہم اپنی غلطی تسلیم کرتے ہیں اور آئندہ کمپنی کے معاملات شفاف طور پر چلائے جائیں گے۔ دستیاب دستاویزات کے مطابق ناروے کے بینک نے بھی سنگین کرپشن کے الزامات کے تحت گزشتہ برس زیڈ ٹی ای کو گلوبل پنشن فنڈ میں سرمایہ کاری کرنیوالی کمپنیوں کی فہرست سے خارج کردیا تھا۔ ادھر پنجاب سیف سٹی اتھارٹی کے بڈنگ ڈاکیومنٹس کی شق3.4کے مطابق سیف سٹی کے منصوبوں میں ایسی کوئی کمپنی نا صرف حصہ نہیں لے سکتی بلکہ اس پر غور ہی نہیں کیا جائیگا،جو پاکستان یا دنیا کسی بھی ملک کے علاوہ بین الاقوامی اداروں،عالمی بینک،آئی ایم ایف ،اقوام متحدہ وغیرہ سے کاروبار کیلئے نا اہل یا بلیک لسٹ ہوچکی ہو، دوسری جانب زیڈ ٹی ای پر امریکہ نے آزادانہ تجارت بند کر رکھی اور اس پر کاروبار کیلئے پیشگی اجازت ، آڈٹ رپورٹس کی معمول سے ہٹ کر فراہمی سمیت کڑی پابندیاں لگی ہوئی ہیں۔اسکے علاوہ جن دیگر 8 کمپنیوں کو پیشکشیں جمع کرانے کی اجازت دی گئی، ان میں نوکیا، میٹرولا، حئی سن، ہواوے ، سی ای ٹی سی ،ایف سی آئی ایسل،ایس اے این اور آئرن کرٹن شامل ہیں،جن کے درمیان پنجاب کے 6 شہروں میں ٹھیکے کا مقابلہ ہے ، لیکن زیڈ ٹی ای کو غیر معمولی طور پر ٹھیکے کی کارروائی میں حصہ لینے کی اجازت دینا اس بات کا اشارہ ہے کہ نون لیگ حکومت کی کوئی طاقتور شخصیت اسکی سفارشی بنی ہوئی ہے ۔اس سلسلہ میں سیف سٹی اتھارٹی کے منیجنگ ڈائریکٹر ڈی آئی جی پولیس علی عامر سے رابطہ کیا گیا تو انکا کہنا تھا کہ زیڈ ٹی ای کی طرف سے چائنہ چیمبر آف کامرس کاکلیئرنس سرٹیفکیٹ چینی سفارتخانہ کی مہر کیساتھ اتھارٹی کو جمع کرایا گیا،اب اسکی تصدیق کی جارہی ہے اور کمپنی کے امریکہ یاکسی دوسرے ملک میں بلیک لسٹ یا نااہل ہونے کی تحقیقات بھی لیگل شعبہ کررہا ہے ،زیڈ ٹی ای پر الزامات ثابت ہوگئے تو اتھارٹی کے پاس اختیار ہے کہ وہ کسی بھی سٹیج پراسے ٹھیکے کے عمل سے باہر کردے ۔مزیدبرآں صحافتی اقدار اورذرائع کی غیرجانبداری برقرار رکھنے کیلئے زیڈ ٹی ای کے صدر دفتر شین زن چین سے بھی رابطہ کیا گیا،جس کے حکم پر کمپنی کے پاکستان میں مقیم ڈپٹی چیف ایگزیکٹو آفیسر مسٹر ایلیکس نے لاہور میں اپنا بیان ریکارڈ کراتے ہوئے کہا کہزیڈ ٹی ای کی طرف سے اتھارٹی کو جمع کرایا گیا سرٹیفکیٹ چینی سفارتخانہ سے تصدیق شدہ ہے ،تاہم یہ نہیں بتایاجا سکتاکہ سفارتخانے کے اکنامک اور کمرشل قونصلر کی طرف سے اسکی تصدیق کیوں نہیں کی گئی۔ انکا دعوی تھا کہ امریکہ سمیت دنیا کے کسی بھی ملک میں زیڈ ٹی ای بلیک لسٹ نہیں۔یادرہے کہ ذرائع نے گزشتہ برس سیف سٹی کے پہلے مرحلہ میں ہی خبر بریک کردی تھی کہ زیڈ ٹی ای کو امریکہ میں وہاں سے چین میں استعمال کے بہانے درآمد کئے گئے ٹیلی کمیونی کیشن آلات اپنی 4 ذیلی کمپنیوں کے ذریعے ایران کو ری ایکسپورٹ کرنے کے الزامات کا سامنا ہے ،چنانچہ امریکی حکومت زیڈ ٹی ای کی اس حرکت کو اپنی قومی سلامتی کیلئے خطرہ اور دہشتگردی کی معاونت کے مترادف خیال کررہی ہے ،یہ آلات ایرن کو اس وقت درآمد کئے گئے جب اس پر اقوام متحدہ کی پابندیاں عائد تھیں۔

فیصل آباد (رپورٹ:یونس چوہدری، تصاویر: کاوش علی) خون سفید ہو گیا، کروڑوں روپے کی جائیداد تھیانے کی خاطر فیصل آباد گلبرگ کے علاقہ میں بدبخت بیٹوں نے ساتھیوں کی مدد سے گن پوائنٹ پر حقیقی باپ کو اغواءکر کے وحشیانہ تشدد کا نشانہ بنا ڈالا۔ باپ کی داڑھی و مونچھیں مونڈ ڈالی، اس کے سر اور کولہوں پر تین سو چھتر مارے۔ 20لاکھ سے زائد کی رقم اور لاکھوں مالیت کے 25تولے زیورات لوٹ لیے۔ پانچ لاکھ روپے تاوان وصول کیا اور بیٹوں نے اپنے والد کو کئی یوم تک حبس بےجا میں رکھا جبکہ اپنے سگے بیٹوں اور دیگر خونیں رشتوں کے بے پناہ ظلم و تشدد کا شکار ہونےوالے 56سالہ شخص کا کہنا ہے کہ مجھے مار کر کروڑوں کی جائیداد پر قبضہ کرنے کا منصوبہ بنایا جا رہا ہے مجھے پاگل قرار دے رہے ہیں میری بیوی تقریباً ڈیڑھ سال قبل انتقال کر گئی اور میرے تینوں بیٹے اور دو بیٹیاں میری دوسری شادی میں رکاوٹ بن گئے ہیں میرے اوپر جینے کےلئے زمین تنگ کر دی گئی ہے اللہ کے بعد میرا کوئی سہارا نہیں واقعہ کا مقدمہ درج، یہ بات گورونانک پورہ کے رہائشی مختار احمد ولد چوہدری شہاب الدین نے ”روزنامہ خبریں“ کو بتائی۔ اس نے بتایا کہ میرا گڈز کا کاروبار ہے ڈیڑھ سال قبل میری بیوی بشیراں بی بی فوت ہو گئی میں نے مریم نامی خاتون سے دوسری شادی کر لی اور بچوں کے کہنے پر تھوڑے عرصہ بعد اسے طلاق دےدی۔ اس نے بتایا کہ رمضان المبارک 14جون کو مجھے اغواءکر کے تقریباً 14یوم تک قید رکھا گیا میری ہمشیرہ نے مجھے رہائی دلوائی جس کے بعد 30جون کو پھر میرے بیٹوں امتیاز، شعیب مختار نے اپنے ساتھیوں کا مران عرف کامی، فہدگجر، یونس اور ساجد کی مدد سے اسلحہ کے زور پر گھر سے مجھے اغواءکر لیا مانانوالہ لےجا کر کمرے میں بند کر کے مجھے ڈنڈوں سوٹوں اور چھتروں سے بےہمانہ تشدد کا نشانہ بنایا اور مجھے رسیوں سے باندھ کر قید میں رکھا گیا اور میری داڑھی مونڈ ڈالی۔ اس نے بتایا کہ میرے بیٹے جائیداد ہڑپ کرنے کی خاطر مجھے پاگل قرار دے رہے ہیں اور مجھے پاگل خانہ میں داخل کروائے رکھا۔ میرے بیٹے کروڑوں کی پراپرٹی کے لالچی ہو گئے ہیں۔ میں نے میڈیکولیگل حاصل کر کے تھانہ گلبرگ پولیس کو مقدمہ کے اندراج کےلئے درخواست دی جس پر پولیس نے مقدمہ درج کر کے دو بندے گرفتار کر لیے ہیں۔ ایک سوال کے جواب میں اس نے بتایا کہ میرے تین بیٹے اور دو بیٹیاں ہیں اور میر ے ساتھ ایسا واقعہ پانچ بار ہو چکا ہے۔ میرے خونیں رشتے میری جان و مال کے دشمن بن گئے ہیں میری جان کو خطرہ ہے اس امر پر بدبخت بیٹوں اور ان کے ساتھیوں کے ہاتھوں اغواءکے بعد ظلم و ستم کا نشانہ بننے والے باپ نے وزیراعظم، وزیراعلیٰ پنجاب، آئی جی پنجاب،آر پی او اور سی پی او فیصل آباد سے خبریں کی وساطت سے مطالبہ کیا ہے کہ نوٹس لےکر ملزمان کو گرفتار کر کے منطقی انجام تک پہنچا کر انصاف و تحفظ فراہم کیا جائے۔

اسلام آباد (خصوصی رپورٹ )پارلیمانی کمیٹی برائے احتساب قانون میں قومی احتساب کمیشن کے دائرہ کار اتفاق نہ ہو سکا اپوزیشن جماعتوں نے عسکری اداروں اور عدلیہ کے بھی مجوزہ قومی احتساب کمیشن کے دائرہ کارمیں لانے کا مطالبہ کردیا جبکہ سندھ اسمبلی کی جانب سے نیب قانون کو حذف کرنے کے معاملے پر وفاق اور صوبہ آمنے سامنے آگئے وفاق کی جانب سے واضح کر دیا گیا ہے کہ آئین کے تحت گورنر سندھ دس دنوں میں صوبائی بل کو نظر ثانی کے لیے حکومت کو واپس بھجوا سکتے ہیں صوبائی بل کالعدم قراردلوانے کو انتباہ بھی کردیا گیا پارلیمانی کمیٹی نے مجموعی طور پر بشمول پاکستان پیپلز پارٹی کے اراکین سینیٹ نے سندھ میں نیب قانون منسوخ ہونے پر گہری تشویش کا اظہا رکیا ہے اور سندھ پر آئین کی خلاف ورزی کا الزام عائد کر دیا اس امر کا اظہار وزیر قانون و انصاف و کمیٹی کے چیئرمین زاہد حامد نے کمیٹی اجلاس کے بعد میڈیا کو بریفنگ دیتے ہوئے کیا قومی احتساب کمیشن کی زد میںآنیوالے عوامی و سرکاری عہدیداروں کا تعین ہو سکا ہے نا کمیشن کے دائرہ کار پر پیشرفت ہو سکی ہے اپوزیشن جماعتوں نے نئے احتساب قانون کا اطلاق عسکری اداروں اور عدلیہ پر بھی کرنے کا مطالبہ کر دیا ہے جس پر کمیشن کے دائرہ اختیار پر کوئی اتفاق رائے نہ ہو سکا اس سے متعلق سیکشنز کی خواندگی التواءکا شکار ہو گئی مجوزہ قانون کی دیگر تمام 51سیکشنز کا جائزہ مکمل کر لیا گیا ہے اجلاس کے بعد میڈیا سے بات چیت کرتے ہوئے زاہد حامد نے کہا کہ مجوزہ احتساب قانون کی پہلی خواندگی مکمل ہو گئی ہے قانون کے 53سیکشنز ہیں دو سیکشنز کا جائزہ رہ گیا ہے ان میں پبلک ہولڈرز کی تعین اور بدعنوانی و بدعنوان عمل کی تشریح کرنا رہ گئی ہے باقی تمام سیکشنز پر مکمل اتفاق رائے ہے کمیٹی نے مجموعی طور پر اس رائے کا اظہار کیا ہے کہ سندھ میں نیب قانون کو حذف کرنے کا قانون آئینی طو رپر غلط ہوا ہے یہ کنکرنٹ لسٹ کا معاملہ ہے اور سندھ حکومت نے آئین کی شق 143کی خلاف ورزی کی ہے فیڈرل قانون کو کوئی صوبہ نہیں چھیڑ سکتا پارلیمینٹ کے اختیار میں مداخلت کی کوشش کی گئی ہے اس حوالے سے سندھ حکومت آئین کی شق 142-Bکو پڑھ لیں کنکرنٹ لسٹ کا ہی ادراک ہو جائے گا ۔

لاہور (مانیٹرنگ ڈیسک) چینل۵ کے تجزیوں و تبصروں پر مشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا ہے کہ 5 جولائی کی اصل حیثیت برقرار ہے، اس دن جمہوریت پر شب خون مارا گیا۔ جنرل ضیا نے ذوالفقار بھٹو کی حکومت کا تختہ الٹا۔ چشم دید گواہ ہوں کہ اس وقت پاکستان قومی اتحاد جس کے سربراہ مولانا فضل الرحمن کے والد مفتی محمود تھے، انہوں نے الیکشن میں دھاندلی کے خلاف تحریک چلائی۔ جس کے نتیجے میں سعودی عرب کی کوششوں سے دونوں طرف مذاکرات کئے گئے۔ اس وقت خبریں بھی شائع ہوئی تھیں کہ ”اتفاق رائے ہو گیا بھٹو نے کہا کہ جن سیٹوں پر دھاندلی کا الزام لگاتے ہو ان پر دوبارہ انتخابات کرانے کو تیار ہوں۔“ پھر آج تک صیغہ راز میں ہے کہ اچانک ذوالفقار علی بھٹو مذاکرات کو نامکمل چھوڑ کر 7 ملکوں کے دورے پر چلے گئے۔ بھٹو سے کچھ لوگوں نے جنرل ضیا کے بغاوت کر جانے کے خدشے کا اظہار بھی کیا تھا جس پر انہوں نے کہا کہ ”یہ بندر“ بھٹو کی واپسی پر ضیاءالحق نے حکومت پر قبضہ کر لیا کیونکہ معاہدے کی تفصیل و تکمیل نہیں ہوئی تھی، دوبارہ انتخابات کی تاریخ نہیں آئی تھی اسی دوران ضیاءالحق نے حکومت کا تختہ الٹ دیا۔ جس کے بعد طویل مارشل لاءکا دور شروع ہوا۔ مریم نواز کو وزیراعظم کی بیٹی ہونے کی وجہ سے میڈیا نے 5 جولائی سے زیادہ اہمیت دی۔ مریم نواز کی پیشی بھٹو کی حکومت کو بزور قوت ختم کرنے اور مارشل لاءکے نفاذ سے بڑا واقعہ نہیں ہے۔ مریم نواز 3,2 بار اپنا بیان تبدیل کر چکی تھی جس کی وجہ سے جے آئی ٹی نے بلایا تھا۔ پہلے ان کا نام ”مریم صفدر“ ہوتا تھا پھر خبریں آئیں کہ لندن میں قیام کے دوران انہوں نے سفارتخانے سے رجوع کر کے اپنا نام تبدیل کر کے ”مریم نواز“ رکھ لیا ہے۔ اس زمانے میں یہ بھی مشہور تھا کہ ان کے اپنے شوہر کے ساتھ تعلقات زیادہ اچھے نہیں رہے۔ انہوں نے کہا کہ نوازشریف کی سیاست سے اتفاق یا اختلاف ہو سکتا ہے لیکن ان کی بیٹی کی عزت کرتا ہوں۔ سب بیٹیوں کا بہت عزت و احترام کرتا ہوں۔ انہوں نے کہا کہ مریم نواز کی سیاسی پوزیشن ایسی ہے جیسی بے نظیر کی اپنے گھر میں تھی۔ ان کے بھی مرتضیٰ بھٹو اور شاہنواز بھٹو دو بھائی تھے لیکن ذوالفقار بھٹو نے ہمیشہ اپنی بیٹی کو اپنا سیاسی وارث سمجھا۔ وزارت خارجہ میں ڈپٹی ڈائریکٹر کے طور پر محترمہ کو تربیت دلوائی اور ہر غیر ملکی دورے پر اپنی بیٹی کو ساتھ لے کر جاتے تھے کبھی بھی کسی بیٹے کو ساتھ لے کر نہیں گئے۔ پھر مرتضیٰ بھٹو نے جو راستہ اختیار کیا دہشتگردانہ کارروائیوں کو فروغ دیا، خود جہاز اغوا کر کے کابل بھی پہنچایا اسی سلسلے میں کچھ عرصہ کابل میں بھی رہے ان کے دوست راجہ انور بھی سرکردہ رہنما تھا جنہوں نے مرتضیٰ سے اختلاف کے بعد ان کے بارے میں کتاب لکھی جس کا اُردو میں ترجمہ ”دہشتگرد شہزادہ“ کے نام سے ہوا۔ بھٹو کی طرح نوازشریف نے بھی اپنے صاحبزادوں کے بجائے صاحبزادی کو اپنا سیاسی وارث رکھا۔ حسین نواز کافی عرصہ یہاں رہے، جاتی امراءمیں میڈیکل یونیورسٹی و ہسپتال ان کی نگرانی میں بنا لیکن نوازشریف نے کبھی ان کو سیاسی وارث کے طور پر پروموٹ نہیں کیا۔ خود مریم نواز نے مجھے بتایا تھا کہ ”میں والد کے سب سے زیادہ قریب ہوں، وہ میرے ساتھ تمام معاملات زیر بحث لاتے ہیں۔ سب جانتے ہیں کہ نوازشریف اپنے بعد مریم نواز کو وزیراعظم دیکھنا چاہتے ہیں۔ سیاسی وارث کے طور پر مریم نواز کے لئے نوازشریف آئیڈیل ہیں۔ وہ والد کے اقتدار کی روشنی میں خود کو وزیراعظم دیکھ رہی ہیں۔ خاندان و پارٹی میں اس کی مخالفت موجود ہے لیکن نوازشریف نے کبھی نہیں چھپایا کہ وہ مریم نواز کو آگے لانا چاہتے ہیں۔ جوڈیشل اکیڈمی کے باہر مریم کی میڈیا سے گفتگو کو اس انداز میں لینا چاہئے کہ وہ والد سے والہانہ پیار کرتی ہیں اور سیاسی جانشین ہیں۔ انہوں نے کہا کہ شریف خاندان اوار نون لیگی رہنماﺅں سے گزارش ہے کہ صبر و تحمل سے کام لیتے ہوئے عدالتی فیصلے کا انتظار کریں، جے آئی ٹی پر تنقید اور ان کے خلاف دھمکی آمیز رویہ مناسب نہیں۔ جے آئی ٹی میں عدالت کے نامزد سرکاری اہلکار ہیں جن کو مخصوص سوالات کے جوابات حاصل کر کے رپورٹ پیش کرنے کا حکم دیا گیا ہے۔ شریف فیملی جے آئی ٹی کے پیچھے ڈنڈا لے کر یوں پڑی ہے جیسے سارا ظلم یہ ہے۔ نوازشریف اتنی معصومیت سے کہتے ہیں کہ میں نے جے آئی ٹی سے پوچھا کہ ”پوچھنا کیا چاہتے ہو“ ایسے بیانات نہیں دینا چاہئیں ساری دنیا جانتی ہے کہ وہ کیا پوچھنا چاہتے ہیں۔ نوازشریف ان کے صاحبزادوں اور صاحبزادی نے جو طرز عمل اختیار کر رکھا ہے وہ مناسب نہیں ہے۔ انہوں نے کہا کہ جب کوئی معاملہ بگڑ جاتا تھا تو پیپلزپارٹی دور میں رحمان ملک اور نون لیگ کے دور میں اسحاق ڈار کو معاملہ سلجھانے والا سمجھا جاتا ہے۔ اسحاق ڈار پڑھے لکھے، شائستہ و ٹھنڈے دل و دماغ کے آدمی ہیں لیکن چند روز قبل جب ان کو جے آئی ٹی پر گرجتے و برستے دیکھا تو اپنے کانوںپر یقین نہیں آیا۔ ڈار صاحب اس میں کیا قیامت آ گئی وہ آپ سے سوال پوچھیں گے آپ جواب دے دیں اور پھر عدالتی فیصلے کا انتظار کریں۔ اسی ملک میں میں نے شاہی قلعہ میں 3 دن مار کھائی اور 14 دن گزارے وہاں ایک منٹ گزارنا بڑا مشکل تھا لیکن میں نے کبھی بھٹو پر تنقید نہیں کی، اس کو بنیاد بنا کر کسی کو گالی نہیں دی، کسی کے خلاف قلم نہیں اٹھایا۔ انہوں نے کہا کہ بے نظیر کی بھی خواہش تھی اب زرداری نے بھی کہنا شروع کر دیا ہے کہ آصفہ سیاست کو آگے بڑھائے گی۔ بلاول سے زیادہ پرامید نہیں یا پھر آپس میں خیالات نہیں ملتے۔ بلاول تھوڑا جذباتی جبکہ زرداری مفاہمت، جوڑ توڑ کی سیاست اور مطلب و فائدے کے لئے مخالف سے بھی مذاکرات کی پالیسی پر عملدرآمد کرتے ہیں اور کرتے آئے ہیں۔ تحریک انصاف کے رہنما فواد چودھری نے کہا ہے کہ مریم نواز سرکاری افسر نہیں، پیشی پر آنے کے لئے اتنا پروٹوکول اور ایس پی کا سلیوٹ مارنا سمجھ سے بالاتر ہے۔ وہ بحیثیت ملزم پیشی کے لئے آتی تھیں۔ پورا اسلام آباد لاک ڈاﺅن کر دیا گیا۔ شریف خاندان کو پہلی بار منی لانڈرنگ کیس کا سامنا کرنا پڑ رہا ہے۔ انہوں نے کہا کہ عمران خان بنی گالہ میں ہیں جس کو گرفتار کرنا ہے کر لے۔ الیکشن کمیشن میں اپنا جواب جمع کرا دیا ہے اب فیصلہ انہوں نے کرنا ہے۔ ایک ہی کیس عدالت عظمیٰ اور الیکشن کمیشن دونوں جگہ پر چل رہا ہے۔ سپریم کورٹ نے بنچ تشکیل دیدیا ہے 11 تاریخ کو سماعت ہے۔ انہوں نے کہا کہ عمران خان کبھی اقتدار میں رہے نہ ہی کبھی قومی خزانہ ان کی دسترس میں رہا۔ ساری دنیا جانتی ہے کہ وہ کرکٹ کھیلتے تھے، انہوہں نے لندن میں کرکٹ کھیلی وہاں سے پیسے ملے تو اپارٹمنٹ خرید لیا پھر اس کو فروخت کر کے پیسہ پاکستان لے آئے۔ ان کی تعریف کرنے کے بجائے الٹا ان پر کیس ڈال دیا۔ انہوں نے کہا کہ نون لیگ کنفیوژ ہے، ان کو جے آئی ٹی کو کڑی تنقید کا نشانہ بنانے کا نقصان پہنچنا شروع ہو چکا ہے۔ مریم نواز کی پیشی پر سینئر رہنما چودھری نثار، پرویز رشید، ظفر الحق، رانا تنویر وغیرہ میں سے کوئی بھی موجود نہیں تھا۔ طلال چودھری، دانیال عزیز کا سٹیٹس الگ ہے وہ لیڈر شپ کی نمائندگی نہیں کر سکتے۔ پیپلزپارٹی کے رہنما نوید چودھری نے کہا ہے کہ بے نظیر کے ساتھ مریم نواز کا موازنہ کرنا ہی غلط ہے۔ محترمہ وزیراعظم رہیں اور اس کے بعد بھی بچوں کے ساتھ جے آئی ٹیز اور عدالتوں میں پیش ہوتی رہیں۔ مریم نواز کی پیشی نون لیگ کی انتخابی مہم دکھائی دے رہی ہے۔ انہوں نے کہا کہ جے آئی ٹی سے جو باہر آتا ہے پوچھے گئے سوالات کے بجائے الٹا اپنا سوال بتاتا ہے کہ میں نے یہ کہا۔ یہ جے آئی ٹی سے سوال کر ہی نہیں سکتے۔ پانامہ لیکس کے ذریعے الزام تو پہلے ہی لگ چکا ہے۔ مریم نواز کے بیانات میں تضادات کا سوال ہے۔ نون لیگ نے فیصلے سے پہلے ہی شور مچا رکھا ہے۔ ان کے ساتھ اتنا ظلم ہو رہا ہے کہ مریم نواز 13 گاڑیوں کے قافلے کے ساتھ پیشی کے لئے آتی ہیں۔ خاتون ایس پی مریم نواز کو پینسل اٹھا کر دیتی ہے۔ حکمران شہنشاہ بنے بیٹھے ہیں۔