جمیکا (این این آئی) ویسٹ انڈیز کرکٹ ٹیم کے سلیکٹرز نے بھارت کے خلاف واحد ٹی ٹوئنٹی میچ کےلئے جارح مزاج بلے باز کرس گیل کو اسکواڈ میں شامل کرلیا ہے۔ کرس گیل اور کرکٹ بورڈ کے درمیان مالی معاملات پر تنازع چلا آرہا تھا جس کی وجہ سے گیل قومی ٹیم کی نمائندگی نہیں کر رہے تھے۔ تاہم سلیکٹرز نے ایک مرتبہ پھر کرس گیل پر اعتماد کرتے ہوئے انہیں بھارت کے خلاف 9 جولائی کو کھیلے جانے والے واحد ٹی ٹوئنٹی میچ کےلئے طلب کرلیا ۔بھارت اور ویسٹ انڈیز کے درمیان واحد ٹی ٹوئنٹی میچ کنگسٹن کے سبینا پارک اسٹیڈیم میں کھیلا جائے گا جس کے لئے لینڈل سیمنز کی جگہ کرس گیل کو ٹیم میں شامل کیا گیا ہے۔کرس گیل نے آخری مرتبہ 2016 کے ٹی ٹوئنٹی ورلڈ کپ کے فائنل میں انگلینڈ کے خلاف ویسٹ انڈیز کی نمائندگی کی تھی جس کے بعد سے وہ ٹیم سے باہر ہیں۔ٹی ٹوئنٹی طرز کی کرکٹ میں کرس گیل ویسٹ انڈیز کی جانب سے سب سے زیادہ رنز بنانے والے بلے باز ہیں جنہوں نے 2 سنچریوں کی بدولت 35اعشاریہ32 کی اوسط سے 1519 رنز بنائے ہیں جبکہ ان کا اسٹرائیک ریٹ 145اعشاریہ49 ہے۔ویسٹ انڈیز کرکٹ کے چیئرمین سلیکٹرز کارٹنی براﺅن کا کہنا ہے کہ کرس گیل کو ایک مرتبہ پھر ٹیم میں شامل ہونے پر انہیں خوش آمدید کہتے ہیں اور ان کی شمولیت سے ویسٹ انڈیز کے ٹاپ آرڈر کو مضبوط بنانے میں مدد ملے گی۔بھارت کے خلاف واحد ٹی ٹوئنٹی کے لئے ویسٹ انڈیز کا 13 رکنی اسکواڈ کپتان کارلوس بریتھ ویٹ، سیمول بدری، کرس گیل، رونس فورڈ بیٹن، ایون لیوس، جیسن محمد، سنیل نارائن، کیرون پولارڈ، رومین پاویل، مارلن سیموئلز، جیروم ٹیلر، چیڈوک والٹن اور کیسرک ولیم پر مشتمل ہے۔

لیسسٹر(سپورٹس ڈیسک) آئی سی سی ویمنزورلڈکپ میں دفاعی چمپئن آسٹریلیا نے پاکستان کو باآسانی 159 رنز سے مات دیدی۔یہ ثناءمیرالیون کی میگا ایونٹ میں مسلسل چوتھی شکست ہے ۔ لیسسٹرمیں کھیلے گئے میچ میں آسٹریلیا نے8وکٹوں کے نقصان پر290رنزبنائے۔ایلزی پیری نے66رنزکی اننگز کھیلی۔ثناءمیرنے3کھلاڑیوں کوپویلین کی راہ دکھائی۔جواب میں پاکستانی ٹیم مقررہ 50اوورزمیں131رنزبناکرآﺅٹ ہوگئی۔ثناءمیر 45 رنز کیساتھ نمایاں رہیں۔کرسٹن بیمزاورایشلیگ گارڈنر نے 3،3وکٹیں حاصل کیں۔

لاہور (نیوزایجنسیاں)سابق کپتان پاکستان کرکٹ ٹیم رمیزراجا نے آئی سی سی کو تجویز دی ہے کہ ٹیسٹ کرکٹ کو صرف 2ماہ کے لیے مخصوص کردیا جائے ۔رمیز راجا لارڈزمیں ایم سی سی ورلڈکرکٹ کمیٹی کی اجلاس میں شرکت کرنے کے بعد میڈیاسے گفتگو کررہے تھے۔اس دوران ان کا کہنا تھا کہ ان2ماہ کے دوران سواءٹیسٹ کرکٹ کے ہرطرح کی کرکٹ روک دینی چاہیے۔رمیز راجہ نے مزید کہا کہ 2مہینے ٹیسٹ کرکٹ کے لیے مخصوص کر نے سے بہترین کھلاڑی ٹیسٹ کرکٹ کے لیے دستیاب ہوں گے۔ان کا کہنا تھا کہ ٹیسٹ کرکٹ میں شائقین کی دلچسپی اسی طرح برقراررکھی جاسکتی ہے، جیسے انگلینڈمیں شائقین کی ٹیسٹ کرکٹ میں دلچسپی برقرارہے۔ایشیامیں شائقین کی ٹیسٹ کرکٹ میں دلچسپی کم ہوتی جارہی ہے اور دلچسپی کم ہونےکی وجہ میچزکی خراب شیڈولنگ ہے۔واضح رہے کہ رمیز راجہ، رکی پونٹنگ، برینڈن مک کولم، سارو گنگولی اور کمار سنگا کارا جیسے کھلاڑیوں پر مشتمل ایم سی سی ورلڈ کرکٹ کمیٹی طویل دورانیہ کی اس کرکٹ میں مزید دلچسپی پیدا کرنے کے لیے ٹیسٹ میچوں کے دورانیے کو 5 دن سے کم کر کے 4 دن تک کرنے کی تجویز کی بھی مخالفت کر چکی ہے۔اس کمیٹی کے چیئرمین مائیک بریرلے کا کہنا تھا کہ گذشتہ اجلاس کے دوران کچھ کمیٹی ارکان 4 روزہ ٹیسٹ میچ کرانے کے حق میں تھے۔ان کا یہ بھی کہنا تھا کہ گذشتہ برس تقریباً تمام ہی ٹیسٹ مقابلوں کا نتیجہ آخری دن آیا تھا، لہٰذا کمیٹی چاہتی ہے کہ ٹیسٹ میچ کا دورانیہ 5 دن ہی رہنا چاہیے۔

لندن(نیوزایجنسیاں)پاکستان ہاکی فیڈریشن نے خدشہ ظاہر کیا ہے کہ اگر کوچز کو برطرف کیا تو فیڈریشن کی اپنی کارکردگی پر بھی سوالیہ نشان اٹھیں گے ¾ ٹیم مینجمنٹ خود مستعفی ہونے کی خواہش مند ہے۔لندن میں ہونے والی ہاکی ورلڈ لیگ میں پاکستان ہاکی ٹیم نے ناقص ترین کارکردگی کا مظاہرہ کیا۔ قومی ٹیم نے دس ٹیموں کے ایونٹ میں ساتویں پوزیشن حاصل کی اور ورلڈ کپ کے لیئے کوالیفائی کرنے کا براہ راست موقع بھی گنوا دیا۔ہاکی ٹیم کی ناقص ترین کارکردگی کی وجہ سے فیڈریشن اور ٹیم انتظامیہ کو سخت تنقید کا سامنا ہے اور فیڈریشن پر تبدیلیوں کے لیئے دباو بڑھنے لگا ۔ذرائع کے مطابق فیڈریشن خواہش مند ہے کہ ٹیم انتظامیہ خود مستعفی ہو جائے تاکہ فیڈریشن کو برطرف کرنے کا موقع نہ ملے ¾اگر برطرف کیا گیا تو فیڈریشن پر اس کی اپنی کارکردگی کی وجہ سے کئی سوالات اٹھیں گے۔دوسری جانب فیڈریشن کچھ سینئر کھلاڑیوں کو بھی واپس لانا چاہتی ہے تاہم سینئر کھلاڑی موجودہ کوچز کے ساتھ کام کرنے لیے رضا مند نہیں۔دوسری جانب پی ایچ ایف کی سلیکشن کمیٹی کے رکن اولمپئن وسیم فیروز نے کہاکہ لندن میں منعقدہ عالمی کپ کے کوالیفائنگ رانڈ میں پاکستان ہاکی ٹیم کی ناقص کارکردگی ذمے دار ٹیم مینجمنٹ ہے، منیجر حنیف خان اور کوچ خواجہ جنید کو اپنی ناکامی کا اعتراف کرتے ہوئے فوری طور عہدوں سے استعفی دے دینا چاہیے۔وسیم فیروز نے عالمی کپ میں پاکستان کی رسائی کا دعوی کرتے ہوئے کہا کہ اپنی ذمے داری پوری کرنے والی پی ایچ ایف اور سلیکشن کمیٹی کے مستعفی ہونے کا کوئی جواز نہیں۔ قومی ہاکی ٹیم کے لیے ماضی میں گراں قدر خدمات انجام دینے والے قومی سلیکٹر نے میڈیاسے گفتگو کرتے ہوئے کہا کہ عالمی کپ کے کوالیفائنگ راﺅنڈ میں پاکستان کی ناقص پر فارمنس کی تمام تر ذمے داری ٹیم مینجمنٹ پر عائد ہوتی ہے، ایونٹ مین ٹیم کے منیجر اولمپئن حنیف خان اور کوچ اولمپئن خواجہ جنید نتائج دینے میں ناکام رہے، مناسب گیم پلان ترتیب نہیں دیاگیا جبکہ نئے کھلاڑیوں کو اپنی صلاحیتوں کے اظہار کے مواقع بھی نہیں دیے گئے۔اولمپئن نے کہا کہ ایونٹ سے قبل قومی تربیتی کیمپ میں صرف 21 کھلاڑیوں کو طلب کیا گیا جبکہ عام طور پر کسی بھی ایونٹ کے لیے ٹرائلز میں25 سے 26 کھلاڑیوں کورکھا جاتا ہے، راشد، رضوان، توثیق، عمران بٹ جیسے سینئرکھلاڑی لیگ کھیلنے چلے گئے ۔وسیم فیروز نے الزام عائدکیاکہ حنیف خان اورخواجہ جنید ٹیم کی تشکیل اور دیگر معاملات میں اپنی من مانیاں کرتے رہے، یہ ہی وجہ ہے کہ اولمپئن قمرابراہیم ابتدا ہی میں دستبردار ہوگئے، قومی کپتان حسیم خان نے خود اعتراف کیا ہے کہ قومی اسکواڈ کے کھلاڑیوں میں جان نہیں تھی، کھلاڑیوں کی فٹنس پر کام کرنا ٹیم سلیکشن کمیٹی نہیں بلکہ ٹیم مینجمنٹ کی ذمے داری تھی جو اس نے پوری نہ کی اور پاکستان کو آخری نمبروں پر جانا پڑا، انھوں نے کہا کہ اب ذمے داروں کے گھر جانے کا وقت آگیا ہے، ایک سوال کے جواب میں وسیم فیروز نے کہا کہ تیکنیکی طور پر پاکستان عالمی کپ میں کھیلنے حق پاچکاہے، یہ پی ایچ ایف اورسلیکشن کمیٹی کی کامیابی ہے، ہم اپنے عہدوں سے مستعفی ہونے کا کوئی ارادہ نہیں رکھتے۔دوسری جانب لاہور میں سابق اولمپئن پرائیڈ آف پرفارمنس دانش کلیم نے بھی فوری طور پر ٹیم مینجمنٹ کو برطرف کرنے کا مطالبہ کر دیا، ان کے مطابق پاکستان ہاکی فیڈریشن نے اگر ٹیم مینجمنٹ اور شکست کے ذمہ داروں کے خلاف کوئی ایکشن نہ لیا تو سڑکوں پر نکل کر ہاکی کو بچانے کے لیے سب کو متحرک کرینگے۔