پنجگور(مانیٹرنگ ڈیسک)بلوچستان کے ضلع پنجگور کے علاقے شنگر میں دہشت گردوں کی فائرنگ سے فرنٹیر کور کے کرنل عامر وحید سمیت 3 ایف سی اہلکار شہید اور 3 زخمی ہوئے جب کہ حملہ آور فرار ہونے میں کامیاب ہو گئے۔ تفصیلات کے مطابق پنجگور کے علاقے شنگر میں شرپسند عناصر کی جانب سے فرنٹیر کور کے اہلکاروں پر فائرنگ کی گئی ،جس کے نتیجے میں کرنل عامروحید اور دو اہلکار نائیک مسعود ،سپاہی عرفان شہید ہوگئے جبکہ ایک افسر شجیع اللہ ،حوالدار عطائ الرحمن اور سپاہی سعود زخمی ہوگئے۔ حملے میں زخمی ہونے والے اہلکاروں کو فوری طور پر قریبی اسپتال منتقل کیا گیا جہاں ان کا علاج جاری ہے۔فائرنگ کے بعد شرپسند فرار ہونے میں کامیاب ہوگئے تاہم سیکیورٹی فورسز کی بھاری نفری نے علاقے کا محاصرہ کر کے ملزمان کی گرفتاری کے لئے سرچ آپریشن شروع کر دیا ہے۔ وزیراعظم شاہد خاقان عباسی ، وزیر داخلہ احسن اقبال اور وزیر اعلیٰ بلوچستان نواب ثناءاللہ زہری نے پنجگور میں سیکیورٹی اہلکاروں پر حملے کی شدید الفاظ میں مذمت کرتے ہوئے زخمیوں کو بہترین طبی سہولیات فراہم کرنے کی ہدایت بھی کی۔
dailykhabrain.com.pk
