خان پور (میاں مجیب اللہ سے) بااثر زمیندار کے پاس 3 سال تک محنت و مشقت برداشت کرنیوالا مظلوم خاندان کو مزدوری کی رقم تک نہ مل سکی، ظالم زمیندار نے محنت کش خاتون کی 2جواں سالہ بیٹیاں بیچ ڈالیں، مظلوم خاندان درخواست لیکر تھانے گیا تو ایس ایچ او کے سامنے زمیندار کی مظلوم خاندان کو دھمکیاں، دھکے دیکر پولیس نے تھانے سے نکال دیا، متاثرین پر الٹا جھوٹا چوری کا مقدمہ بھی درج، متاثرین خاندان کی خبریں ہیلپ لائن سے تحفظ و انصاف کی اپیل۔ خان پور کے محلہ غریب آباد کی رہائشی 50 سالہ خاتون ساجدہ بی بی نے اپنا اور اپنے بچوں کا پیٹ پالنے کے لئے خان پور کے نواحی چک 30 کے بااثر زمیندار نمبر دار چودھری خالد پرویز کے پاس اس کی 40 ایکڑ فصل گنا کی کاشتکاری کے لئے محنت مزدوری شروع کر دی، 3 سال تک ساجدہ بی بی اپنے 2 بیٹے اور3 بیٹیوں کے ساتھ محنت و مشقت کی مگر اس مظلوم خاندان کو ا ن کی محنت کا معاوضہ تو مل نہ سکا بلکہ بااثر زمیندار خالد پرویز نے متاثرہ ساجدہ بی بی کی 12سالہ بیٹی زبیدہ بی بی اپنے اس ملازم سجاد عرف سجو کے حوالے کر کے انہیں نامعلوم مقام پر منتقل کرا کے زبیدہ بی بی کی والدہ ساجدہ بی بی کو اپنے پاس قید کر لیا جبکہ اس سے قبل اسی بااثر نمبردار نے ساجدہ بی بی کی ایک اور بیٹی زنیرہ بی بی نوید نامی اپنے اس ملازم کو ا یک لاکھ روپے میں بیچ ڈالی جس کی دو لاکھ روپے مزدوری کی رقم مذکورہ نمبردار خورد برد کر چکا تھا اور اسے اپنے پاس ملازمت پر یہی لالچ دیکر کھڑا کیا تھا کہ اسی لڑکی سے اس کا نکاح کرائے گا۔ متاثرہ ساجدہ بی بی نے اپنے دو بیٹوں ندیم ا ور امین کے ہمراہ خبریں ہیلپ لائن میں بتایا کہ میں نے چودھری خالد پرویز کے پاس جونہی ملازمت اختیار کی تو اس دوران میں نے ا پنی بڑی بیٹی سنیرہ کا رشتہ خان پور کے رہائشی رفاقت علی نامی نوجوان سے کر دیا جب وہ رخصتی لینے کے لئے بارات لیکر ساجدہ بی بی کے پاس آئے تو ظالم نمبردار خالد پرویز نے لالچ میں آ کر ان کی بارات روک دی اور ساجدہ بی بی کی بیٹی سنیرہ کی رخصتی بالآخر 52 ہزار روپے بھتہ لیکر کر دی۔ ساجدہ بی بی نے کہا کہ کیونکہ ہم محنت مزدوری کے سلسلہ میں چودھری خالد پرویز کے پاس رہائش پذیر تھے اور اس کے حکم کے بغیر ہمیں کوئی کام کرنے کی اجازت نہ ملتی خلاف ورزی کی صورت میں ہمیں قید کر کے جان سے مار دینے کی دھمکی دی جاتی جس کی وجہ سے ہم بے حد خوفزدہ تھے۔ متاثرہ خاتون نے یہ بھی بتایا کہ ظالم چودھری خالد پرویز نے جب ہماری 12 سالہ بیٹی زبیدہ اپنے ملازم کے حوالے کیا تو ہم نے بالآخر تنگ آ کر ظالم جاگیردار چودھری خالد پرویز کی غلامی سے آزادی حاصل کر لی اور میں نے اپنی 12 سالہ بیٹی زبیدہ بی بی کی بازیابی کے لئے ظالم نمبردار خالد پرویز کے خلاف ایس ایچ او تھانہ سٹی چودھری محمد یونس کو درخواست پیش کی جس پر ایس ایچ او نے ہمیں جب تھانے طلب کیا اور ہم ایس ایچ او کے کمرہ میں گئے تو وہاں ایک کرسی پر ظالم چودھری خالد پرویز براجمان تھا جس نے ایس ایس او چودھری یونس کے سامنے ہمیں نہ صرف زندہ درگور کر دینے کی دھمکیاں دیں بلکہ یہ بھی ایس ایچ او کے سامنے کہہ ڈالا کہ یہ پولیس والے میرا کچھ نہیں بگاڑ سکتے اور ہوا بھی وہی کہ ایس ایچ او چودھری یونس نے مجھے پولیس اہلکاروں کے ہاتھوں دھکے دلوا کر تھانے سے نکلوا دیا۔ متاثرہ خاتون نے کہا کہ میں نے اپنے ساتھ ہونیوالی ظلم و جبر کی داستانیں لیے اے ایس پی فاروق بجارانی اور پھر ڈی پی او رحیم یار خان ذیشان اصغر کے پاس گئی لیکن کسی نے ہماری نہ سنی۔ الٹا ایس ایچ او تھانہ سٹی خانپور چودھری محمد یونس نے چودھری خالد پرویز کی مدعیت پر میرے بیٹوں ندیم اور امین کے خلاف ہراساں و پریشان کرنے کےلئے چوری کا مقدمہ نمبری439/17 زیر دفعات 381/379 درج کر دیا۔ خاتونی نے بتایا کہ اب ہم نے اپنی 12سالہ بیٹی زبیدہ کی بازیابی کے لئے ہائیکورٹ بہاولپور میں رٹ پٹیشن دائر کر رکھی ہے جس میں چودھری خالد پرویز سمیت ایس ایچ او تھانہ سٹی خانپور چودھری محمد یونس اور ڈی پی او رحیم یار خان ذیشان اصغر فریق ہیں جن کو عدالت نے 17 اکتوبر کو طلب کر لیا ہے جبکہ اس سے قبل 4اکتوبر کو ہائیکورٹ کے حکم پر ایس ایچ او چودھری یونس پیش ہوا تو وہاں بھی ایس ایچ او مذکورہ ظالم نمبردار خالد پرویز کی صفائیاں پیش کرتا رہا ہے۔ ظلم کی شکار متاثرہ ساجدہ بی بی اور ان کے مظلوم بیٹوں نے روزنامہ خبریں ہیلپ لائن کے توسط سے ا رباب اختیار سے تحفظ و انصاف کی اپیل کی ہے۔ خبریں نے جب ظالم نمبردار خالد پروزی سے مو¿قف دریافت کرنے کےلئے اس کے موبائل نمبر0303-6118608 پر رابطہ کیا تو انہوں نے مکمل احوال سن لینے کے بعد اپنا موبائل فون بند کر دیا جبکہ ایس ایچ او چودھری محمد یونس سے رابطہ کرنے پر انہوں نے کہا کہ متاثرین اگر ہائیکورٹ نہ جاتے تو ان پر چوری کا مقدمہ درج نہ ہوتا۔
