لاہور(مانیٹرنگ ڈیسک)سابق ٹیسٹ کرکٹر اکرم رضا نے کہا ہے کہ جب بیرون ملک سے ٹیمیں پاکستان میچ کھیلنے آتی ہیں تو اس سے پوری دنیا کو ایک مثبت پیغام جائیگا ، چینل ۵ کے پروگرام گگلی میں گفتگو کرتے ہوئے انہوں نے کہا کہ میرے خیال میں اب مزید ٹیمیں پاکستان آئیں گی اور یہ سلسلہ اب شروع ہوچکا ہے ، نجم سیٹھی نے جو بھی فیصلے کئے ان پر پورا اترے ، وہ بولڈ فیصلے کررہے ہیں ، ساتھ ہی انہیں اداروں کی جانب سے مدد بھی مل رہی ہے ، امید ہے جلد کراچی میں بھی میچ ہوگا، کرکٹ کمپیئر راجہ اسد علی خان نے کہا کہ میں سمجھتا ہوں کرکٹ کو سیاست میں نہیں لینا چاہئے، افغانستان کرکٹ ٹیم اگر پاکستان آتی ہے تو یہ اچھی بات ہے ، نجم سیٹھی نے کرکٹ کیلئے بہت کام کیا ہے ، یہ سارا کریڈٹ نجم سیٹھی کو جاتا ہے اور انکو ملنابھی چاہئے ، اس وقت ماحول بہت شاندار ہے ، مجھے کسی کی تعریف کرنے کا شوق نہیں لیکن جو کام کرتا ہے اس کی کوششوں کو سراہنا چاہئے ۔
