قومی ویمنز ٹیم دوسرے ون ڈے میں بھی ناکام

شارجہ (اے پی پی) نیوزی لینڈ نے آئی سی سی ویمنز چیمپئن شپ کے دوسرے ون ڈے میچ میں پاکستان کو 7 وکٹوں سے شکست دے کر تین میچوں کی سیریز میں 2-0 کی فیصلہ کن برتری حاصل کر لی۔ بلیک کیپس نے 148 رنز کا ہدف 24 اوورز میں 3 وکٹوں کے نقصان پر حاصل کر لیا۔ سوفی ڈیوائن میچ کی بہترین کھلاڑی قرار پائیں۔ جمعرات کو شارجہ میں کھیلے گئے دوسرے ون ڈے میچ میں پاکستان ویمن ٹیم پہلے بیٹنگ کرتے ہوئے 49.1 اوورز میں 147 رنز بناکر آﺅٹ ہوگئی، ناہیدہ خان 39، بسمعہ معروف 36 اور ثناءمیر 31 رنز کے ساتھ نمایاں رہیں، امیلا کیر نے تین جبکہ ہینا رو اور لی کیسپیرک نے دو، دو وکٹیں حاصل کیں۔ جواب میں نیوزی لینڈ ویمن نے ہدف 24 اوورز میں 3 وکٹوں کے نقصان پر حاصل کر لیا، سوفی ڈیوائن نے 62 رنز کی اننگز کھیل کر ٹیم کی جیت میں اہم کردار ادا کیا۔ جویریہ خان نے 2 اور سعدیہ یوسف نے ایک کھلاڑی کو آﺅٹ کیا۔آئی سی سی ویمنز چیمپئن شپ میں پاکستان اور نیوزی لینڈ کی کرکٹ ٹیموں کے درمیان تیسرا اور آخری ون ڈے میچ 5 نومبر کو شارجہ میں کھیلا جائے گا۔ مہمان ٹیم نیوزی لینڈ کو سیریز میں 2-0 کی فیصلہ کن برتری حاصل ہے۔ پہلے ون ڈے میں بلیک کیپس نے 8 رنز اور دوسرے میں 7 وکٹوں سے کامیابی حاصل کی۔