لاہور(ویب ڈیسک )سپریم کورٹ نے ملک بھر کے نجی کالجز میں داخلے روکنے کا حکم دے دیا۔سپریم کورٹ لاہور رجسٹری میں نجی میڈیکل کالج کی فیسوں میں اضافے کے خلاف درخواست کی سماعت چیف جسٹس پاکستان کی سربراہی میں 2 رکنی بینچ نے کی۔سماعت کے آغاز پر چیف جسٹس پاکستان نے تمام نجی میڈیکل کالجز کی تفصیلات اوراسٹرکچر طلب کرلیا۔عدالت نے فیسوں میں اضافے پر سخت برہمی کا اظہار کرتے ہوئے نجی میڈیکل کالجزکےمالکان کےبینک اکاو¿نٹ کی تفصیلات فراہم کرنے کا بھی حکم دے دیا۔دوران سماعت چیف جسٹس پاکستان جسٹس میاں ثاقب نثار نے اپنے ریمارکس میں کہا کہ صاف پانی کیس بھی اسی کیس کے ساتھ سنا جائے گا، صاف پانی منصوبے میں ساڑھے 3 کروڑ کی گاڑی خریدی گئی، ایڈووکیٹ جنرل تفصیلات فراہم کریں، ہوسکے تووہ گاڑی یہاں بلوالیں۔چیف جسٹس پاکستان نے ایڈووکیٹ جنرل سے استفسار کیا کہ عدالت کو آگاہ کیا جائے کیسی گاڑی خریدی گئی۔چیف جسٹس کا کہنا تھا کہ ذاتی نمائش کے لیے نہیں، جذبے کے لیے کیس کی سماعت کررہے ہیں، عوامی مفاد کے کیس کی سماعت ہفتے اور اتوار کو بھی ہوگی۔جسٹس میاں ثاقب نثار نے کہا کہ چھتوں اور گیراجوں میں کالج بناکر چلائے جارہے ہیں، بتایاجائے میڈیکل کالج کا اسٹرکچر کیا ہے، ہم ڈاکٹر پیدا کررہے ہیں لیکن ہمیں نہیں پتا کہ ہمارا ٹول ٹھیک ہے کہ نہیں۔معزز جج کا کہنا تھا کہ میو اسپتال کا دورہ کیا تو تنقید کی گئی، جہاں بچوں کی صحت کا مسئلہ ہوگا وہاں جاو¿ں گا۔چیف جسٹس نے سماعت کے دوران تاحکم ثانی ملک بھر میں نجی میڈیکل کالجز میں داخلے روکنے کا حکم دے دیا۔چیف جسٹس کا کہنا تھا کہ اگر پرانی تاریخوں پر کالجز میں داخلے کیے گئے تو کالج مالکان اور داخلہ کرنے والوں کے خلاف سخت کارروائی ہوگی۔جسٹس ثاقب نثار نے ینگ ڈاکٹرز کو بھی تنبیہ کرتے ہوئے کہا کہ ینگ ڈاکٹرز نے اس معاملے پر کوئی ہڑتال کی تو عدالت سخت کارروائی کرے گی۔چیف جسٹس پاکستان جسٹس ثاقب نثار نے کل تمام میڈیکل کالجز کے مالکان کو بیان حلفی کے ساتھ طلب کرلیا۔چیف جسٹس نے کہا کہ مفاد عامہ کے اس معاملے کا چار ہفتوں میں فیصلہ کیا جائے۔عدالت نے کیس کی مزید سماعت کل تک ملتوی کردی۔

لاہور (تجزیہ نگار ) ن لیگ کے قریبی ذرائع کے مطابق پنجاب کے وزیراعلیٰ میاں شہباز شریف کو آئندہ انتخابات کے بعد ملک کا وزیراعظم بنائے جانے کا معاملہ ابھی تک حتمی شکل اختیار نہیں کرسکا، اس لئے فی الحال نوازشریف کی طرف سے اس کا باقاعدہ اعلان نہیں کیا جارہا، کیونکہ اس کی راہ میں بعض مسائل درپیش ہیں، ذرائع بتاتے ہیں موجودہ صورتحال میں ن لیگ کو مکمل یقین نہیں کہ وہ اگلی حکومت بناسکے گی یا نہیں، اگرچہ میاں نوازشریف نے نجی محفلوں میں انہیں وزیراعظم بنانے کی خواہش کا اظہار کیا ہے لیکن اسکے ساتھ ہی وہ پنجاب کی قیادت اپنی صاحبزادی مریم نواز کو سونپنا چاہتے ہیں، انہیں یقین ہے کہ ن لیگ کسی وجہ سے وفاقی حکومت نہ بھی بنا سکی تو وہ پنجاب میں بہر صورت کامیاب رہے گی، ایسی صورت میں مریم نواز کے وزیراعلیٰ پنجاب بننے کیلئے راستہ صاف ہوگا، یہ اسی صورت میں ہوسکتا ہے کہ میاں شہبازشریف پنجاب سے مکمل طور پر دستبردار ہوجائیں اور اپنی ساری توجہ قومی اسمبلی میں کامیابی کی طرف دیں، ذرائع بتاتے ہیں شہبازشریف سے کہا گیا ہے کہ وہ پنجاب اسمبلی کیلئے کسی بھی حلقے سے امیدوار نہ بنیں البتہ قومی اسمبلی میں جن حلقوں سے چاہیں انتخاب لڑلیں لیکن شہباز شریف اسکے لئے رضا مند نہیں ، وہ ہرصورت میں پنجاب اسمبلی کی نشست حاصل کرنا چاہتے ہیں ، ان کے قریبی ذرائع کا کہنا ہے کہ وفاق میں ن لیگ حکومت بناتی نظر نہ آئی تو وہ پنجاب میں حکومت بنالیں گے، ایسی صورت میں مریم نواز کو اس عہدے سے محروم ہونا پڑیگا ، جس کے وہ شدت سے خواہشمند ہیں ، اسی وجہ سے مسلم لیگ ن کے صدر میاں نوازشریف اپنے بھائی کی وزیراعظم کیلئے نامزدگی کا معاملہ نجی محفلوں اور قریبی ساتھیوں کے ساتھ مشاورتی اجلاسوں سے آگے نہیں لے کر گئے اور باقاعدہ اعلان بھی نہیں کرپارہے، سیاسی حلقے بتاتے ہیں کہ نوازشریف نے اپنی نااہلی کے بعد شہباز شریف کو پہلے وزیراعظم اور پھر پارٹی صدر بنانے کا اعلان کیاتھا مگر دونوں بار یہ معاملہ سرے نہ چڑھ سکا، وزارت عظمیٰ کیلئے شاہد خاقان عباسی کو ہی مستقل حیثیت دیدی گئی اور پارٹی صدر کیلئے نوازشریف نے قانون میں ترمیم کراکے خود اپنا انتخاب کرلیا، اگرچہ نجی محفلوں کو شہباز شریف کی نامزدگی پر رضامندی ظاہر کی جاچکی ہے لیکن ممکن ہے کہ اس بار بھی سابقہ صورتحال ہی پیش آجائے ، اسی حوالے سے سیاسی حلقے گذشتہ روز کے دوبیانات کو بڑی اہمیت دے رہے ہیں، ایک بیان پیپلزپارٹی کے رہنما اور معروف قانون دان اعتزاز احسن جبکہ دوسرا وفاقی وزیراور ن لیگ کے سیکرٹری اطلاعات مشاہد اللہ کی طرف سے ہے ، اعتزاز احسن کا موقف ہے کہ حدیبیہ منی لانڈرنگ کا کیس ہے ، اس میں اسحق ڈار کی طرف سے دیا جانے والا اعترافی بیان شہبازشریف کے وزیراعظم بننے کی راہ میں رکاوٹ ہوسکتا ہے ، ان کا موقف ہے کہ یہ کیس چونکہ فوجداری ہے اسلئے اسے بند نہیں کیاجاسکتا اور شہبازشریف اس کے ملزموں میں سے ہے، سنیٹر مشاہد اللہ نوازشریف کے انتہائی قریبی سمجھے جاتے ہیں اور کہا جاتا ہے کہ وہ نوازشریف کی زبان ہی بولتے ہیں ، انکا موقف ہے کہ سنا ہے کہ نوازشریف نے شہبازشریف کو وزارت عظمیٰ کیلئے نامزد کیا ہے مگر اس طرح کا کوئی معاملہ پارٹی کی سنٹرل ایگزیکٹو میں نہیں آیا ، اگر کوئی فیصلہ وہتا ہے تو وہ سنٹرل ایگزیکٹو میں ہی ہوگا، اس بیان کو انتہائی معنی خیز قراردیاجارہاہے، سیاسی حلقے اس سے یہی اندازہ لگا رہے ہیں کہ فی الحال سارا معاملہ ہوا میں ہے ، پنجاب حکومت کے ترجمان ملک احمد خان نے بھی کسی باقاعدہ اعلان کی عدم موجودگی کی بات کی ہے ، ایک اور معاملہ حمزہ شہباز شریف کی ایڈجسٹمنٹ ہے، جنہیں ایک وقت میں نوازشریف نے اپنا سیاسی جانشین قرار دیاتھا اور پرویز مشرف کے دور میں سارا خاندان سعودی عرب بھیج دیاگیا تو وہ پاکستان میں تنہا سارا پریشر برداشت کرتے رہے ہیں ، وہ بھی پنجاب چھوڑ کر مرکز میں نہیں جانا چاہیں گے ، لیکن عزیزداری کے باوجود وہ پنجاب میں مریم نواز کے ساتھ کام نہیں کرپائیں گے ، متعلقہ حلقے بتاتے ہیں کہ ان تمام معاملات کی وجہ سے ن لیگ کی قیادت سخت شش و پنج میں ہے اور کوئی حتمی فیصلہ اس کے لئے مشکل ثابت ہورہاہے ۔