لاہور( ویب ڈیسک ) صوبائی وزیر قانون رانا ثنا اللہ خان نے کہا ہے کہ نوازشر یف سپر یم کورٹ کے فیصلے کے بعد گھر آ کر بیٹھ جاتے تو ہماری پارٹی کا ہی ’’ بھٹہ ‘‘ بیٹھ جاتا‘ نواز شریف ہی ہمارے لیڈر ہیں اور سادہ سی بات ہے اگر وہ سمندر یا دریا میں بھی چھلانگ لگائیں گے تو ہم بھی ان کے پیچھے چلیں گے ۔ میڈیا سے گفتگو میں رانا ثنا اللہ خان نے کہا کہ سپریم کورٹ کا فیصلہ آنے کے بعد نواز شریف نے سیاسی رفقاء سے مشاورت کے بعد پارٹی کی صدارت کیلئے مشاورت کی تھی اور اس کیلئے سب رہنمائوں نے شہباز شریف کے نام کی توثیق کی تھی لیکن کچھ دنوں بعد قانون میں تبدیلی ہو گئی تھی ۔انہوں نے آئندہ وزیر اعظم کیلئے شہباز شریف کی نامزدگی کے بعد وزیر اعلیٰ کیلئے نام سامنے لانے بارے سوال کے جواب میں کہا کہ اس کی پریکٹس نہیں ہے ۔جہاں تک وزارت عظمیٰ کے امیدوار کی بات ہے تو سب کو معلوم ہے کہ اگر تحریک انصاف جیتتی ہے تو کون وزیر اعظم ہو گا اسی طرح پیپلز پارٹی کے بارے میں بھی سب کو علم ہے لیکن (ن) لیگ کے حوالے سے کنفیوژن تھی کہ سپریم کورٹ کے فیصلے کی وجہ سے نواز شریف اب وزیر اعظم نہیں بن سکتے ۔کیونکہ قانون اور آئین میں ترامیم موجودہ پارلیمنٹ کا مینڈیٹ نہیں اور یہ اگلی پارلیمنٹ کا کام ہے اس لئے یہ بات ہوئی کہ اگر (ن) لیگ کامیاب ہوتی ہے تو وقتی یا مستقل طور پر کون پارلیمانی گروپ کو لیڈ کرے گا اور اس کنفیوژن کو دور کرنے کیلئے نواز شریف نے پہلے سے منظور کئے گئے فیصلے کے حوالے سے بات کی جو میڈیا میں رپورٹ ہوا ۔انہوں نے کہا کہ نواز شریف ہی ہمارے لیڈر ہیں اور سادہ سی بات ہے کہ اگر نواز شریف فرض کریں سمندر یا دریا میں چھلانگ لگانے کا فیصلہ کرتے ہیں تو ہم آخری وقت تک انہیں سمجھائیں گے لیکن اگر انہوں نے چھلانگ لگائی تو ہم ان کے فیصلے یا پالیسی سے پیچھے نہیں ہٹیں گے اور ان کے پیچھے چلیں گے۔نواز شریف نے سپریم کورٹ کے فیصلے کے بعد جو بیانیہ بیان کیا ہے اگر وہ اسے نہ اپناتے تو ہم سیاسی طور پر زندہ ہی نہیں رہ سکتے تھے اور ہماری سیاسی مقبولیت ختم ہو جاتی ۔ نوازشریف کا جو بیانیہ اور موقف ہے وہ ہماری پارٹی ، ورکرز اور ووٹرز میں تسلیم شدہ ہے ۔ جب فیصلے کے بعد بابا رحمتے نے جس طرح معاملات کو ہینڈل کیا اس کے بعد یہ بیانیہ اس طرح لوگوں کے دلوں و دماغ میں گھر کر گیا ہے کہ انتخابی مہم شروع ہونے دیں اس بیانیے کو ملنے والی پذیرائی سب کے سامنے ہو گی ۔انہوں نے اس سوال کہ نواز شریف جو بیانیہ اپناتے ہیں شہباز شریف اس پر دو سطریں نہیں بولتے کا جواب دیتے ہوئے رانا ثنا اللہ نے کہا کہ میری طرف سے دوصفحے بولنے کے بعد مجھے کبھی شہباز شریف نے یہ نہیںکہا کہ آپ غلط بولتے ہیں ضروری نہیں ہوتا کہ پارٹی میں تمام لوگ ایک ہی بات کریں۔ نواز شریف کا بیانیہ ہماری سیاسی بقاء کی بات ہے اگر وہ دوسرا راستہ اپناتے اور گھر آ کر بیٹھ جاتے تو ہماری پارٹی کا ہی ’’ بھٹہ ‘‘ بیٹھ جاتا ۔ سویلین بالا دستی ، ووٹ کے تقدس کی بحالی ، عدلیہ میں اصلاحات جس میں عام آدمی اور ایلیٹ کلاس کے سامنے لرزہ نہ ہو نواز شریف کی قیادت میں ہی کریں گے۔
