لاہور (مانیٹرنگ ڈیسک) پارلیمنٹ سے استعفوں کے معاملے پر تحریک انصاف میں بھی اختلاف پایا جاتا ہے۔ ترین گروپ استعفے دینے کا حامی جبکہ شاہ محمود مخالفت کر رہے ہیں۔مال روڈ کے مین آف دی میچ تو نشست چھوڑنے کا اعلان کر کے نکل لئے لیکن اب تک
ان کا استعفیٰ قومی اسمبلی سیکریٹریٹ کو موصول نہیں ہو سکا۔ لاہور کی مال روڈ پر متحدہ اپوزیشن کے احتجاج کے دوران عمران خان، آصف زرداری اور طاہر القادری سمیت سبھی گرجے برسے لیکن ہیوی ویٹس کی موجودگی میں میلہ تو لوٹا شیخ رشید نے۔ مگر ایک روز گزرنے کے باوجود ان کا استعفیٰ سپیکر ایاز صادق تک نہیں پہنچ پایا۔دوسری جانب، استعفے دیں یا نہ دیں؟ اس سوال پر تحریک انصاف کے رہنما بھی تقسیم ہو گئے ہیں۔ جہانگیر ترین گروپ سینیٹ الیکشن سے پہلے پارلیمنٹ سے باہر آنے کا حامی ہے۔ شاہ محمود قریشی گروپ نے میدان چھوڑنے کی مخالفت کر دی ہے۔ حتمی فیصلہ عمران خان کی دبئی سے واپسی پر ہو گا۔
