لاہور(شوبز ڈیسک)گلوکار‘اداکار‘فلمسازاور ہدایتکار عنایت حسین بھٹی کی 19ویں برسی 31مئی کو منائی جائیگی ۔عنایت حسین بھٹی کو شوبز کی ہمہ جہت شخصیت کہا جائے توغلط نہ ہوگا۔ 12جنوری 1928ءکو گجرات میں پیدا ہونے والے اس عظیم فنکار نے اپنا سفر ریڈیو سے شروع کیا۔ رفیع پیر نے اسٹیج پر موقع دیا جس کے بعد وہ فلم نگری میں آن پہنچے۔ 1949ءمیں ہدایت کار نذیر کی فلم ”پھیرے” کے لئے پہلا گیت گایا۔ عنایت حسین بھٹی نے سیکڑوں مقبول فلمی اورغیر فلمی گیت گائے، جو کہ ان کے منفرد لہجے کی بناء پر آج بھی لوگوں کو یاد ہیں۔مرحوم کے رومانوی گیت تو زبان زد عام ہوئے ہی مگر مداحوں نے ان کی آواز میں تصوف کی شاعری کو سنا تو ایک جہاں ان کا گرویدہ ہوگیا۔ عنایت حسین بھٹی نے اپنے کیرئیر میں”بھٹی پکچرز“ کے بینر تلے 30فلمز بنائیں ‘100سے زائد فلمز میں اداکاری کے جوہر دکھائے۔
اور 500سے زیادہ فلمز میں اپنی آواز کا جادو جگاتے ہوئے اڑھائی ہزار سے زائد گیت گائے۔عنایت حسین بھٹی کچھ عرصہ علالت کے بعد 31مئی 1999ءکو 71برس کی عمر میں اس جہانِ رنگ و بو سے رخصت ہو گئے۔
