لاہور(شوبزڈیسک)اداکارہ ماہرہ خان کی ” نیلی “کے کردار میں نئی تصویر جاری ، فلم ” سات دن محبت ان “عید الفطر کے موقع پر سنیماﺅں کی زینت بنے گی ۔ رومانوی کامیڈی فلم میں ماہرہ خان ہیرو شہریار منور کی کزن اور طنز و مزاح سے بھرپور شاعری کی دلدادہ لڑکی کا رول ادا کررہی ہیں۔پاکستانی فلمی صنعت کی عید الفطر پر ریلیز ہونے والی رومانٹک کامیڈی فلم ” سات دن محبت ان “نمائش سے قبل ہی فلم بینوں کی توجہ کا مرکز بن چکی ہے جس کی ایک وجہ فلم کی لیڈ فنکارہ ماہرہ خان کی حقیقت سے قریب اور دلفریب اداکاری بھی ہے ۔ ماہرہ خان اپنے روایتی انداز میں ایک سادہ مگر زندہ دل لڑکی کا کردار ادا کر رہی ہیں جس کی پہلی محبت اس کا کزن ٹیپو(شہریار منور) ہوتا ہے تاہم ٹیپوکی ماں کو اسکی اپنے بیٹے کے ساتھ نزدیکی ایک نظر نہیں بھاتی ۔لیکن ماہرہ اور شہریار کا رومانس تمام تر مشکلات کے باوجود منطقی انجام تک پہنچ جاتا ہے ۔ ڈائریکٹر مینو فرجاد کی زیر نگرانی فلم کی سٹار کاسٹ میں شامل ان دنوں فلم کی تشہیر کیلئے پاکستان کے مختلف شہروں کا دورہ کررہے ہیں ، دوسری جانب نیلی کے کردار میں ماہرہ خان کی نئی تصویر سوشل میڈیاپر شائقین کی توجہ کا مرکز بن چکی ہے جبکہ معروف قوال فرید ایاز اور ابو محمد کی جادوئی آواز سے سجی قوالی ” کاہے کو بیاہی بدیس“ گذشتہ ہفتے ریلیز کی گئی جسے شائقین کی بھرپور پذیرائی حاصل ہوئی ہے ۔ فلمی حلقوں کے مطابق ” سات دن محبت ان “ عید کی چھٹیوں میں شائقین کیلئے پیسہ وصول فلم بن کر سامنے آئے گی ۔
