نوازشریف نے مجھ سے بے وفائی نہیں دشمنی کی، چوہدری نثار

راولپنڈی(ویب ڈیسک) سابق وزیر داخلہ چودھری نثارعلی خان کا کہنا ہے کہ نوازشریف نے مجھ سے بے وفائی نہیں بلکہ دشمنی کی اور مجھے اس کا جواب دینا آتا ہے لیکن یہ جواب میرے حلقے کے ووٹرز دیں گے۔راولپنڈی کے علاقے چکری میں جلسے سے خطاب کرتے ہوئے چودھری نثارعلی خان کا کہنا تھا کہ تقریر وہاں کی جاتی ہے جہاں لوگوں کو قائل کرنا ہوتا ہے لیکن یہاں موجود لوگوں نے تو الٹا مجھے قائل کرلیا ہے کیوں کہ یہ غیرت مندوں کا علاقہ ہے یہاں لوگ پرچیوں سے نہیں ضمیر سے ووٹ دیتے ہیں۔چودھری نثار نے کہا کہ نوازشریف سے 34 سال وفاداری نبھائی، نوازشریف سے ایسی وفاداری نبھائی جیسے بھائی بھائی نہیں نبھا سکتا لیکن نوازشریف نے بے وفائی نہیں بلکہ مجھ سے دشمنی کی جب کہ مجھے اس کا جواب دینا ہے لیکن اس کا جواب میرے حلقے کے ووٹرز دیں گے۔ انہوں نے کہا کہ مجھے اگر سیٹ کی لالچ ہوتی تو چپکے سے ایک درخواست لاہور بھیج دیتا جب کہ عمران خان نے بھی کہا کہ نثار ہماری طرف آئیں ٹکٹوں کی لائن لگا دیں گے لیکن چودھری نثار نہ پہلے کبھی بکا ہے نہ آیندہ بکے گا۔سابق وزیر داخلہ نے کہا کہ میرا مقابلہ کسی وزیر یا ایم این اے کے حلقے سے نہ کریں بلکہ میرے حلقے کا مقابلہ نوازشریف ،شہبازشریف، زرداری، عمران خان کے حلقے سے کریں جب کہ میرے مخالفین کوئی نئے نہیں، یہ 8 سال مشرف کی وردی کے پیچھے آپ پرمسلط رہے لیکن ا±س کے باوجود میں نے کسی کی خوشامد نہیں کی بلکہ اصولوں کی سیاست کی ہے، 34 سال آپ کو شرمندہ نہیں کیا آیندہ بھی نہیں کروں گا۔