لاہور (مانیٹرنگ ڈیسک) چینل فائیو کے پروگرام ”ہاٹ لنچ“ میں گفتگو کرتے ہوئے نمائندہ دیپالپور شہزاد وٹو نے بتایا کہ انتخابات قریب ہیں۔ سیاسی جماعتیں مکمل تیاری کے ساتھ اکھاڑے میں اتر چکی ہیں۔ آزاد امیدوار بھی کسی سے کم نہیں امیدواروں کے حامی بھی بہت پرجوش ہیں۔ نمائندہ ساہیوال عمران چودھری نے بتایا کہ خواتین بھی انتخابی مہم میں بھرپور حصہ لے رہی ہیں اور اپنے اپنے امیدوار کو سپورٹ کررہی ہیں۔ این اے 148 میں چودھری اشرف نون لیگ اور غلام کاٹھیا پیپلزپارٹی کے امیدوار ہیں جبکہ محمد یار تحریک انصاف کے امیدوار ہیں۔ خواتین نے کہا ہم معاشرے کا اہم ترین حصہ ہیں۔ 70فیصد ووٹ خواتین کے ہیں۔ 25جولائی کو ثابت کرینگے کہ این اے 148نون لیگ کا حلقہ تھا اور رہے گا۔ نمائندہ سرگودھا امبر رضا نے بتایا کہ ملک بھر کی طرح این اے 91 میں بھی نون و جنون کے درمیان کانٹے دار مقابلہ ہے۔ نون لیگ کے ذوالفقار بھٹی اور تحریک انصاف کے عامر سلطان چیمہ اپنی پارٹی کی نمائندگی کررہے ہیں۔ شہریوں نے کہا کہ نون لیگ نے بڑے ترقیاتی کام کئے ہیں لیکن ماضی کو مدنظر رکھتے ہوئے سوچ سمجھ کر ووٹ کاسٹ کریں گے۔ دعا ہے کہ اس بار کوئی ملک و قوم کا خیر خواہ ہی آئے۔ نمائندہ سکھر ندیم سرکی نے بتایا کہ الیکشن کے قریب آتے ہی سیاستدان گلی محلوں اور سڑکوں پر نظر آنے لگے۔ امیدوار جلسے جلوس اور کارنرمیٹنگ کرنے میں مصروف ہیں۔ سکھر پیپلزپارٹی کا گڑھ مانا جاتا ہے لیکن اس بار پی پی امیدواروں کو جگہ جگہ کہیں پتھراﺅ، کہیں احتجاج تو کہیں سوالوں کے جواب دینا پڑ رہے ہیں۔ خورشید شاہ کے آبائی حلقہ این اے 206 پر کافی توجہ دی جارہی ہے کیونکہ وہ 2 مرتبہ اسی حلقے سے منتخب ہوئے تھے۔ لیکن اس دفعہ خورشید شاہ کا پی ٹی آئی کے طاہر علی شاہ سے ٹکر کا مقابلہ کیا جارہا ہے۔ خورشید شاہ کے علاقے میں بھی جگہ جگہ مزاحمت کے بینرز لگے ہیں اور احتجاج کیا جارہا ہے۔ اس سے لگتا ہے کہ پی ٹی آئی سکھر میں پیپلزپارٹی کو ٹف ٹائم دے گی۔ نمائندہ شیخوپورہ شاہد جاوید نے کہا کہ ملک بھر کی طرح یہاں بھی سیاسی سرگرمیاں عروج پر ہیں۔ تمام پارٹیوں کے امیدوار اپنی جیت کیلئے ایڑھی چوٹی کا زور لگارہے ہیں۔ جلسے، جلوس و ریلیوں کا سلسلہ جاری ہے۔ نمائندہ جڑانوالہ یاسر گل نے بتایا کہ شہر میں تمام سیاسی جماعتوں کی جانب سے انتخابی مہم عروج پر ہے ہر امیدوار اپنی جیت کیلئے پوری طرح متحرک ہے۔ ووٹرز عرصہ دراز سے اقتدار میں رہنے والوں سے نالاں دکھائی دیتے ہیں۔ نمائندہ پنڈی گھیب آصف صابری نے بتایا کہ شہر میں الیکشن کی گہما گہمی شروع ہوچکی ہے تمام سیاسی جماعتیں اپنی بھرپور انتخابی مہم چلارہے ہیں۔
