اسلام آباد(ویب ڈیسک) وزارت داخلہ نے سابق وفاقی وزیر برائے خزانہ اور مسلم لیگ (ن) کے رہنما اسحٰق ڈار کے ریڈ وارنٹ جاری کردیئے جس کے بعد انہیں انٹرپول کے ذریعے وطن واپس لایا جائےگا۔واضح رہے کہ 9 جولائی کو چیف جسٹس سپریم کورٹ آف پاکستان میاں ثاقب نثار نے چیئرمین پاکستان ٹیلی ویڑن (پی ٹی وی) کی تعیناتی سے متعلق کیس کی سماعت میں سابق وزیر خزانہ اسحٰق ڈار کو مزید 3 دن کی مہلت دیتے ہوئے جمعرات (12 جولائی) کو عدالت میں پیش ہونے کا حکم دے دیا تھا۔چیف جسٹس میاں ثاقب نثار نے ریمارکس دیے تھے کہ ‘اسحٰق ڈار عدالت کے بلانے پر نہیں آئے، سابق وزیر خزانہ اسحٰق ڈار عدالت کی بے توقیری کررہے ہیں اور وہ نوٹس گھر کے باہر چسپاں کرنے کے باوجود پیش نہیں ہو ئے‘خیال رہے کہ اسحٰق ڈار پاناما پیپر سے متعلق فیصلے کے چند ماہ بعد ہی علاج کی غرض سے لندن روانہ ہو گئے تھے جس کے بعد وطن واپس نہیں آئے۔اس حوالے سے بتایا گیا کہ وزارت داخلہ کی جانب سے عدالت عظمیٰ میں جواب جمع کرادیا گیا تاہم سابق وزیر خزانہ کے ریڈ وارنٹ انٹر پول کو ارسال کیے جا چکے ہیں۔اس سے قبل الیکشن کمیشن نے 29 جولائی کو سپریم کورٹ کے احکامات کے پیش نظر اسحٰق ڈار کی سینیٹ کی رکنیت معطلی کا نوٹی فکیشن جاری کیا تھا۔واضح رہے کہ احتساب عدالت نے 21 نومبر 2017 کو قومی احتساب بیورو (نیب) کی جانب سے دائر ریفرنس میں اسحٰق ڈار کو مفرور قرار دیا تھا۔
