لہنگا چولی اور پٹھانی شلوار کُرتہ، برائیڈل شو میں سلمان خان کی کترینہ کیساتھ انٹری نے سوشل میڈیا پر دھوم مچا دی

ممبئی(ویب ڈیسک)بالی وڈ کے دبنگ اسٹار سلمان خان اور خوبرو اداکارہ کترینہ کیف نے ایک ساتھ منیش برائیڈل کوچیور میں جلوہ گر ہوکر اسے چار چاند لگادیئے۔گزشتہ روز ممبئی میں مشہور بھارتی ڈیزائنر منیش ملہوترا کے برائیڈل کوچیور شو میں سلمان خان اور کترینہ کیف نے بطور شو اسٹاپر ریمپ واک کی اور مداحوں سے خوب داد سمیٹی۔منیش برائیڈل شو میں کترینہ کیف نے خوبصورت لہنگا چولی کے ساتھ دوپٹے کے بجائے کیپ زیب تن کی اور منیش ملہوترا کی نئی عروسی کلیکشن ’زوئن‘ کی نمائش کی۔جب کہ دبنگ خان شو میں پٹھانی شلوار اور کرتا زیب تن کیے جلوہ گر ہوئے۔دونوں کی ریمپ واک کی ویڈیوز سوشل میڈیا پر بھی وائرل ہورہی ہے جس پر تبصرے کیے جا رہے ہیں کہ آخر کب سلمان خان شادی کی نوید سنائیں گے۔ ؟واضح رہے کہ سلمان خان اور کترینہ کیف کی جوڑی ایک مرتبہ پھر فلم ’بھارت‘ میں جلوہ گر ہوگی جس کا اعلان سلمان خان سوشل میڈیا پر کر چکے ہیں۔منیش برائیڈل شو میں سلمان اور کترینہ سمیت دیگر بھارتی اسٹارز نے بھی شرکت کی جن میں مادھوری ڈکشت، لارا دتا، سارہ علی خان، جھانوی کپور شامل ہیں۔