کراچی(ویب ڈیسک) لاپتہ شخص کی والدہ نے بیٹے کی محبت میں اپنے اعصاب پر قابو کھوتے ہوئے کمرہ عدالت میں ہی خود سوزی کی کوشش کی، تاہم اسے بچالیا گیا۔سندھ ہائی کورٹ میں 20 سے زائد لاپتہ افراد کی بازیابی سے متعلق درخواستوں کی سماعت ہوئی۔سماعت کے آغاز میں ایک خاتون، جس کا بیٹا 2012 سے لاپتہ ہے، نے عدالت میں چیخ و پکار شروع کردی۔مذکورہ خاتون نے اپنے بیٹے کی محبت میں اپنے اعصاب پر قابو کھوتے ہوئے اپنے اوپر پیٹرول چھڑک کر ا?گ لگانے کی کوشش کی، تاہم اسے بچا لیا گیا۔عدالت کی سیکیورٹی پر مامور اہلکاروں نے بزرگ خاتون کو پکڑ لیا اور ان سے پیٹرول کی بوتل چھین لی۔خاتون نے قبلِ ازیں عدالت میں موقف اختیار کیا تھا کہ اس کے بیٹے فیصل کو حراست میں لینے والوں کو لوگوں نے دیکھا تھا۔انہوں نے مزید کہا کہ بیٹے کی بازیابی کے لیے لوگ فون کرتے رہے لیکن اس بارے میں کچھ نہیں ہوا۔سماعت کے دوران عدالت نے لاپتہ افراد کی عدم بازیابی پر برہمی کا اظہار کیا اور انسپکٹر جنرل (ا?ئی جی) سندھ کو خود تحقیقات کا حکم دیا۔جسٹس نعمت اللہ پھلپھوٹو نے برہمی کا اظہار کرتے ہوئے ریمارکس دیے کہ پولیس افسران کو لاپتہ افراد کی بازیابی کے حوالے سے کسی بات کا علم نہیں ہے جبکہ ہر سماعت پر عدالت میں اسٹیریو رپورٹ پیش کردی جاتی ہے۔عدالت نے ہدایت جاری کی کہ اعلیٰ پولیس افسران لاپتہ افراد کے معاملے میں خود دلچسپی لیں اور منیر علی، رفیق، اویس، محمد فیصل اور دیگر افراد کو بازیاب کرواکر رپورٹ عدالت میں پیش کریں۔رینجرز پراسیکیوٹر حبیب نے رپورٹ عدالت میں جمع کرادی، جس میں موقف اختیار کیا گیا کہ لاپتہ افراد کو رینجرز نے حراست میں نہیں لیا۔بعدِ ازاں عدالتِ عالیہ نے کیس کی سماعت 5 ستمبر تک ملتوی کردی۔
