کوالالمپور (اے پی پی) متحدہ عرب امارات اور ہانگ کانگ کی ٹیمیں ایشیا کپ کوالیفائر کرکٹ ٹورنامنٹ فائنل میں پہنچ گئیں، فائنل (کل) جمعرات کو کھیلا جائے گا اور فاتح ٹیم رواں ماہ شیڈول ایشیا کپ ٹورنامنٹ میں شرکت کرے گی جو کہ 15 ستمبر سے متحدہ عرب امارات میں شروع ہو گا۔ ملائیشیا میں جاری ایشیا کپ کوالیفائر ٹورنامنٹ میں منگل کو کھیلے گئے آخری لیگ میچز میں متحدہ عرب امارات (یو اے ای) نے اومان اور ہانگ کانگ نے نیپال کو شکست دے کر فائنل میں جگہ بنائی، یو اے ای نے پہلے کھیلتے ہوئے مقررہ اوورز میں 8 وکٹوں پر 208 رنز بنائے، کپتان روہن مصطفیٰ 71 رنز بنا کر نمایاں رہے، عبدالشکور 21 اور محمد نوید 12 رنز بنا کر ناٹ آﺅٹ رہے، فیاض بٹ اور ذیشان مقصود نے 2، 2 وکٹیں لیں، جواب میں اومان کی ٹیم ہدف کے تعاقب میں 48ویں اوور میں 195 رنز بنا کر آﺅٹ ہو گئی، عاقب الیاس 45 رنز کے ساتھ نمایاں رہے، نسیم نے 27 رنز بنائے اور ناٹ آﺅٹ رہے، محمد نوید، عامر حیات اور روہن مصطفیٰ نے 2، 2 کھلاڑیوں کو پویلین کی راہ دکھائی، یو اے ای نے چوتھی فتح کے ساتھ ہی فائنل کیلئے کوالیفائی کیا، ایک اور میچ میں ہانگ کانگ نے نیپال کو 3 وکٹوں سے زیر کر کے تیسری کامیابی کے ساتھ ہی فائنل میں پہنچنے کا اعزاز حاصل کیا۔، نیپال کی ٹیم پہلے کھیلتے ہوئے 37.5 اوورز میں صرف 95 رنز پر ڈھیر ہو گئی، 6 کھلاڑی دوہرا ہندسہ بھی عبور نہ کر سکے، عارف شیخ 18 رنز بنا کر نمایاں رہے، احسن خان نے 4، اعزاز خان اور تنویر افضل نے 2، 2 وکٹیں لیں، جواب میں ہانگ کانگ نے مطلوبہ ہدف 33ویں اوور میں 7 وکٹوں پر حاصل کیا، کپتان انشومان راتھ نے 52 رنز کی اننگز کھیل کر ٹیم کو فتح دلائی، سندیپ لیمی چن نے عمدہ باﺅلنگ کی لیکن وہ ٹیم کو شکست سے نہ بچا سکے، انہوں نے 27 رنز کے عوض 5 وکٹیں لیں۔
