ٹرمپ کا گرین سگنل جے ڈ ی وینس کا جنگ خاتمے کیلئے براہ راست ایرانی حکام سے ملاقات پر غور

واشنگٹن، تہران ( نیوز ایجنسیاں) امریکی نائب صدر جے ڈی وینس نے ایران جنگ کے خاتمے کیلئے براہ راست ایرانی حکام سے ملاقات پر غور شروع کردیا ہے جبکہ امریکی صدر ڈونلڈ ٹرمپ نے انہیں مذاکرات کا اختیار بھی دیدیا ہے۔ ادھر آبنائے ہر مز میں 2سپر ٹینکرز میں زوردار دھماکے کے ساتھ آگ لگ گئی۔ امریکی اخبار نے دعویٰ کیا ہے کہ امریکہ ایران کے ہمسایہ ممالک کو سرحدیں بند کرنے پر آمادہ کرنے میں ناکام رہا، جبکہ تہران نے یورپ اور ہمسایہ ممالک کو وارننگ دی ہے کہ ناکہ بندیوں میں معاونت اعلانِ جنگ تصور ہوگی۔ ایران جنگ کے خاتمے کیلئے امریکی نائب صدر جے ڈی وینس ایرانی رہنما کے ساتھ براہِ راست ملاقات پر غور کر رہے ہیں،جبکہ صدر ڈونلڈ ٹرمپ نے انہیں ایرانی حکام سے مذاکرات کا اختیار بھی دے دیا ہے۔ امریکی اخبار وال اسٹریٹ جرنل کی رپورٹ کے مطابق جے ڈی وینس ایران جنگ ختم کرنے کیلئے ایران کی قدامت پسند قیادت سے ملنے پر آمادہ ہیں۔ صدر ٹرمپ بھی کہہ چکے ہیں کہ وہ ایران سے مذاکرات کی بحالی پر تیار ہیں اور جے ڈی وینس کو معاملے پر اختیارات دیدئیے ہیں۔ رپورٹ کے مطابق صدر ٹرمپ نے اپنے معاونین اور بعض عالمی رہنمائو ں کو بتایا ہے کہ انہوں نے جے ڈی وینس کو ایران کے ساتھ مذاکرات کرنے کی اجازت دے دی ہے۔امریکی حکام کا کہنا ہے کہ وینس کو ایرانی عہدیداروں سے براہِ راست ملاقات کے لیے بھیجنے سے متعلق بات چیت ابھی ابتدائی مرحلے میں ہے۔دریں اثناء امریکا کو ایران کے ہمسایہ ممالک کو سرحدیں بند کرنے پر آمادہ کرنے میں ناکامی کا سامنا ہے، واشنگٹن کی کئی ہفتوں کی سفارتی کوششیں بھی کامیاب نہ ہوسکیں۔امریکی اخبار نیویارک ٹائمز کی رپورٹ کے مطابق امریکا نے ایران کو ہتھیاروں کی منتقلی روکنے کیلئے ٹاسک فورس آئرن گیٹ قائم کردی، امریکی ٹاسک فورس خود فوجی کارروائیاں نہیں کرے گی، امریکا پڑوسی ممالک کو اپنی افواج استعمال کرنے پر آمادہ کرے گا۔رپورٹ کے مطابق امریکی کوشش ہے کہ ہمسایہ ممالک اپنی افواج کے ذریعے ایران کی غیرقانونی تجارت روکیں مگر ایران کے پڑوسی ممالک کو سرحدی تجارت بند کرنے سے اندرونی بدامنی کا خدشہ ہے۔نیویارک ٹائمز کے مطابق عراق اور ترکیہ ایران کے ساتھ زمینی تجارتی راستے بند کرانے کی امریکی کوششوں کا مرکز ہیں، ترکیہ نے ایران کے ساتھ سرحدی پالیسی تبدیل کرنے سے بڑی حد تک انکار کردیا۔ادھر آبنائے ہرمز میں گزشتہ رات غیر مجاز راستے سے گزرتے ہوئے 2سپر ٹینکرز میں زوردار دھماکے کے ساتھ آگ لگ گئی۔ عالمی میڈیارپو رٹس کے مطابق ایرانی پاسداران انقلاب بحریہ کی جانب سے جاری کردہ بیان کے مطابق دونوں سپر ٹینکرز میں 4 ملین بیرل سے زائد تیل لدا ہوا تھا، دونوں ٹینکرز نے متعدد بار دی گئی وارننگز کو نظر انداز کیا۔ٹریفک کنٹرول سینٹر نے ٹینکرز کو خبردار کیا تھا کہ آبنائے ہرمز کا جنوبی راستہ غیر مجاز اور غیر محفوظ ہے، تاہم جہازوں نے اس پر عمل نہیں کیا اور اب دونوں جہازوں میں آگ لگی ہوئی ہے۔ایرانی پاسداران انقلاب بحریہ نے اس واقعے کا ذمے دار امریکہ کو ٹھہراتے ہوئے کہا ہے کہ یہ جہاز لوٹ مار کرنے والی اور جارح امریکی فوج پر بھروسہ کرنے کی وجہ سے جل رہے ہیں۔ جو بھی بحری جہاز اپنا نیوی گیشن سسٹم بند کرے گا اور امریکی فوج کے ساتھ تعاون کرتے ہوئے جنوبی راستہ اختیار کرنے کی کوشش کرے گا، اس کا انجام بھی ایسا ہی ہوگا۔دریں اثناء ایرانی سپریم لیڈر کے مشیر محمد مخبر نے خطے کے ہمسایہ ممالک اور دیگر بین الاقوامی فریقوں کو خبردار کیا ہے کہ ایران کے خلاف کسی بھی قسم کی بحری یا معاشی ناکہ بندی میں معاونت کو اعلانِ جنگ تصور کیا جائے گا۔محمد مخبر نے سماجی رابطے کی ویب سائٹ ایکس پر جاری اپنے بیان میں کہا کہ ایران کے مخالفین کی جانب سے عائد کردہ محاصرے میں شامل ہونے والے ممالک کو اس کے سنگین نتائج بھگتنا ہوں گے۔قبل ازیںایرانی پارلیمنٹ کے اسپیکر باقر قالیباف نے کہا ہے کہ آبنائے ہرمز جنگ سے پہلے والی حیثیت میں واپس نہیں آئے گی قطری ٹی وی کو انٹرویو میں باقر قالیباف نے کہا کہ امریکی حکام نے ماسکو کے دورے کے دوران روسی صدر پوتن سے ایران اور امریکاکے درمیان مذاکرات میں ثالثی کی درخواست کی تھی۔
جے ڈی وینس