لاہور(نیوزایجنسیاں) پاکستان کرکٹ بورڈ(پی سی بی)نے گرانٹ بریڈ برن کو آئندہ تین سال کے لیے اسٹیو رکسن کی جگہ قومی کرکٹ ٹیم کا نیا فیلڈنگ کوچ مقرر کردیا۔قومی ٹیم کے سابق کوچ اسٹیو رکسن کا پی سی بی سے معاہدہ رواں سال ختم ہو گیا تھا جس کے بعد وہ مزید یہ ذمے داری نبھانے میں دلچسپی نہیں رکھتے تھے۔انہوں نے قومی ٹیم کے مسلسل سفر اور ذاتی مصروفیات کی وجہ سے پاکستان کرکٹ ٹیم کے ساتھ مزید ذمہ داری نبھانے سے معذرت کرلی تھی جس کے بعد گرانٹ بریڈ برن کو قومی ٹیم کا نیا کوچ مقرر کیا گیا ہے۔رکسن کی معذرت کے بعد آسٹریلین اسٹیٹ ٹیم کے سابق کرکٹر ڈیرن بیری کو فیلڈنگ کوچ بننے کی پیشکش کی گئی تھی لیکن انہوں نے یہ پیشکش مسترد کردی تھی۔سابق وکٹ کیپر بلے باز اس وقت پاکستان سپر لیگ (پی ایس ایل) کی ٹیم اسلام آباد یونائیٹڈ کے لیے اپنی خدمات انجام دے رہے ہیں البتہ ان کا کہنا تھا کہ وہ ابھی بیرون ملک کل وقتی ملازمت کے لیے تیار نہیں ہیں۔نئے فیلڈنگ کوچ پاکستان کرکٹ ٹیم کو متحدہ عرب امارات میں شیڈول ایشیا کپ کے دوران جوائن کریں گے۔گرانٹ بریڈ برن نے اپنے بیان میں کہا کہ پاکستان کرکٹ ٹیم اور بہترین کوالٹی کے کوچنگ سٹاف کے ساتھ کام کرنے کا موقع ملنا ایک اعزاز کی بات ہے۔انہوں نے کہا کہ ہیڈ کوچ مکی آرتھر کی کوچنگ میں پاکستان ٹیم میں کافی بہتری آئی ہے اور جون میں دورہ اسکاٹ لینڈ کے دوران پاکستانی ٹیم کی فزیکل اور فیلڈنگ میں مثبت تبدیلی نظر آئی تھی اور میری بھی کوشش ہوگی کہ پاکستان ٹیم کی فیلڈنگ میں بہتری لاں۔52سالہ بریڈ برن نیوزی لینڈ کے سابق کرکٹر ہیں اور 7 ٹیسٹ اور 11 ون ڈے میچوں میں اپنے ملک کی نمائندگی کر چکے ہیں۔پیشہ ورانہ کرکٹ سے ریٹائرمنٹ کے بعد انہوں نے کوچنگ کے شعبے کو اپنایا اور 2008 میں ناردرن ڈسٹرکٹ کے کوچ مقرر کیے گئے۔اس کے بعد انہوں نے نیوزی لینڈ کی انڈر19 اور اے ٹیم کی بھی کوچنگ کی جس کے بعد 2014 میں اسکاٹ لینڈ نے ہیڈ کوچ کی حیثیت سے ان کی خدمات حاصل کیں جو انہوں نے 2018 تک انجام دیں۔
