گوادر میں آئل ریفائنری کیلئے سعودی شراکت داری کا معاہدہ کرنے کی منظوری

اسلام آباد(ویب ڈیسک) وزیراعظم عمران خان کی زیر صدارت وفاقی کابینہ کے اجلاس کے دوران گوادر میں آئل ریفائنری کے لیے پاک سعودی شراکت داری کے معاہدے کی منظوری سمیت کئی اہم فیصلوں کی توثیق کی گئی ہے۔ وفاقی کابینہ کے اجلاس کے دوران سرکاری اداروں میں تعیناتیوں اور معاشی حکمت عملی سے متعلق امور پر غور کیا گیا، وزیراعظم نے ضمنی مالیاتی بل منظور ہونے پر اطمینان کا اظہار کیا اور معیشت میں بہتری کے لیے اقدامات پر وزیر خزانہ اور ان کی ٹیم کو سراہا۔ذرائع کے مطابق کابینہ نے ترکی کے تعاون سے نیشنل اسکل یونیورسٹی کے معاہدے کی توثیق کی جب کہ مانٹری اینڈ فسکل پالیسی بورڈ میں ممتاز معیشت دانوں کے تقرر کی بھی منظوری دی۔ کابینہ نے ڈائریکٹر جنرل اینٹی نارکوٹکس فورس کے لیے میجر جنرل عارف کی تعیناتی کی منظوری بھی دی۔ذرائع کے مطابق کابینہ نے وزیر خزانہ کو حاصل مختلف اداروں میں از خود تقرریوں کا اختیار واپس لے لیا جس کے بعد وزیر خزانہ صرف وزیراعظم کی اجازت سے ہی تقرریوں کے پابند ہوں گے۔ ذرائع کا کہنا ہے کہ کابینہ کے فیصلے سے وزیر خزانہ کے 4 سرکاری بینکوں اور 4 ریگولیٹری اتھارٹیز کے چئیرمینوں کی تقرری کا اختیار واپس ہوگیا، گزشتہ دور حکومت میں سابق وزیراعظم نواز شریف نے اسحاق ڈار کو تقرریوں کا اختیار دیا تھا۔ذرائع کا کہنا ہے کہ وفاقی کابینہ کو 100 روزہ پلان کے اہداف کے بارے میں بھی آگاہ کیا گیا۔ وزیراعظم کے ہاو¿سنگ منصوبے سے متعلق ٹاسک فورس نے ابتدائی اقدامات سے کابینہ کو آگاہ کیا جب کہ وزیراعظم اس ماہ کے وسط میں 50 لاکھ گھروں کے منصوبے کا افتتاح بھی کریں گے۔وفاقی کابینہ کے اجلاس کے بعد وزیر اطلاعات فواد چوہدری نے پریس کانفرنس کے دوران کہا کہ سابق وزیر خزانہ اسحاق ڈار کے دور میں غیر قانونی تقرر کیے گئے افراد کو برطرف کردیا گیا ہے۔فواد چوہدری کے مطابق صدر نیشنل بینک، زرعی ترقیاتی بینک، صدر ایس ایم ای بینک، ڈپٹی گورنر اسٹیٹ بینک شمس الحسن، مسابقتی کمیشن آف پاکستان کی چیرپرسن ایس ایم واڈیا کو عہدے سے ہٹا دیا گیا ہے۔وزیر اطلاعات نے کہا کہ کابینہ نے سعودی عرب کے ساتھ گوادر میں آئل ریفائنری کے قیام کے معاہدے کی منظوری دے دی، سعودی عرب تیل و گیس کی تلاش سے متعلق 30 ارب روپے کی سرمایہ کاری کرے گا۔