سوہائے کی چھٹی‘نیلم منیر ” رانگ نمبر “ کے سیکوئل میں کاسٹ

لاہور(شوبزڈیسک)ڈسٹری بیوشن کلب اور پروڈیوسر حسن ضیاءسپر ہٹ پاکستانی فلم ” رانگ نمبر“ کا سیکوئل مل کر بنائیں گے ۔سٹار کاسٹ میں جاوید شیخ ،سمیع خان، نیلم منیر ، دانش نواز، محمود اسلم شامل ، ہدایات یاسرنواز ہی دیں گے ۔ دو ہزار پندرہ میں ریلیز ہوئی پاکستانی سنیما کی بلاک بسٹر فلم ” رانگ نمبر“ کے سیکوئل تیار کرنے کیلئے معروف ادارے ڈسٹری بیوشن کلب ، پروڈیوسر حسن ضیا ءاورڈائریکٹر یاسر نواز نے معاہدے کی حتمی شکل دے دی ہے ۔ فیملی اینٹرٹینمنٹ کے مد نظر بنائی جارہی اس فلم کی پری پروڈکشن کا کام مکمل کرلیا گیا ہے اور لیڈ کاسٹ دانش تیمور ، سوہائے ابرو کی جگہ سمیع خان اور نیلم منیر کو کاسٹ کیا گیا ہے جبکہ سینئر فنکار جاوید شیخ ، یاسر نواز، شفقت چیمہ ، دانش نواز، احمد حسن اہم کرداروں میں فلم کی رونق بڑھائیں گے ۔دوہزار پندرہ میں ریلیز ہوئی فلم کے پہلے حصے نے باکس آفس پر کروڑوں کا بزنس کرکے پاکستانی فلمی صنعت کی ترقی کے عمل میں اہم کردار ادا کیا تھا جبکہ پروڈکشن ٹیم نے سیکوئل کو مزید بہتر بنانے کیلئے ڈسٹری بیوشن کلب کے ساتھ ڈیل فائنل کی ہے ۔
جس کے مطابق فلم کی عکسبندی کا آغاز آئندہ ماہ نومبر سے ہوگا جبکہ اس کی شوٹنگ اندرون ملک دلفریب لوکیشنز کے ساتھ ساتھ بیرون ملک بھی کی جائے گی۔ ” رانگ نمبر2 “کو ڈسٹری بیوشن کلب کے بینر تلے آئند ہ سال ملکی اور بین الاقوامی مارکیٹ میںبیک وقت نمائش کیلئے پیش کیا جائے گا۔