لاہور (سپورٹس رپورٹر) سپورٹس بورڈ پنجاب کے زیراہتمام ”انٹرنیشنل کبڈی ٹاکرا“ 10جنوری بروز جمعرات کو شروع ہورہا ہے جس میں بھارت، ایران اور پاکستان کی ٹیمیں حصہ لے رہی ہیں، پہلا ٹاکرا بہاولپور میں دوپہر ایک بجے ایران اور بھارت کے درمیان ہوگا جبکہ دوسرا ٹاکرا 2بجے پاکستان گرین اور پاکستان وائٹ کے درمیان ہوگا،”انٹرنیشنل کبڈی ٹاکرا“ کے لئے تمام انتظامات مکمل کرلئے گئے ہیں، ڈائریکٹر جنرل سپورٹس پنجاب ندیم سرور کی جانب سے تشکیل دی گئی انتظامی کمیٹیوں نے بدھ کے روز انتظامات کو حتمی شکل دیدی ہے۔ کبڈی پنجاب کا مقبول اور روایتی کھیل ہے جس کو فروغ دینے کے لئے سپورٹس بورڈ پنجاب نے سہہ ملکی انٹر نیشنل کبڈی ٹاکرا کا اہتمام کیا ہے، انٹر نیشنل کبڈی ٹاکرا سے ہمارے کھلاڑیوں کی حوصلہ افزائی ہوگی اور کھلاڑیوں کے اعتماد میںبھی اضافہ ہوگا۔
انٹر نیشنل کبڈی ٹاکرا میں بھارت، ایران اور پاکستان کے کبڈی کے بہترین کھلاڑی حصہ لے رہے ہیں جن کے تجربے سے ہمارے کھلاڑی استفادہ کریں گے اور ان کے کھیل میں بہتری آئے گی۔
