اسلام آباد (اے پی پی) سکواش کے سابق عالمی چیمپئن جان شیر خان نے کہا ہے کہ ملک میں کھیلوں کی ترقی کےلئے بنیادی ڈھانچے کا ہونا بہت ضروری ہے۔ ان خیالات کا اظہار انہوں نے گذشتہ روز ”اے پی پی“ سے گفتگو کرتے ہوئے کیا۔ انہوں نے کہا کہ اگر کسی کھیل کا بنیادی ڈھانچہ نہ بنایا گیا ہو تو ملک میں کھیل کیسے ترقی کر سکتے ہیں۔ انہوں نے کہاکہ ملک میں کھیلوں کا بے پناہ ٹیلنٹ موجود ہے جس کو بروئے کا لانے کےلئے حکومت ٹھوس اقدامات کرنے ہونگے ۔
اور تمام کام چیک اینڈ بیلنس کی بنیاد پر ہونے چاہئے۔ ایک سوال کے جواب میں جان شیر خان نے کہا کہ وزیراعظم پاکستان عمران خان خود ایک سپورٹس مین رہ چکے ہیں اور ان کی قیادت میں پاکستان کرکٹ میں عالمی چیمپئن بنا۔ وزیراعظم کو چاہئے کہ وہ ذاتی دلچسپی لے کر کھیلوں کی ترقی کےلئے اقدامات کروائیں۔ انہون نے کہاکہ ہمارے دور میں سہولیات بھی موجود نہیں تھیں لیکن پھر بھی میں نے دس سال تک سکواش کے میدان میں دنیا پر حکمرانی کی تھی حکمرانی کرنے کی سب سے بڑی وجہ یہ تھی کہ ہمارے اندر ایک ملک کےلئے جذبہ تھا۔ ایسا مقام حاصل کرنے کےلئے جذبے اور سخت محنت کرنے کی ضرورت ہوتی ہے، میرے نزدیک انٹرنیٹ نے ہماری نوجوان نسل کا ماحول کافی حد تک خراب کردیا ہے۔ ایک اور سوال کے جواب میں انہوں نے کہا کہ تعلیمی اداروں میں کھیلوں کے انعقاد کو یقینی بنایا جائے جو کہ نہ ہونے کے برابر ہے۔
