برسٹل(ویب ڈیسک) کرکٹ ورلڈ کپ میں بارش کے باعث پاکستان اور سری لنکا کا میچ مسلسل بارش کے باعث منسوخ کردیا گیا، میچ منسوخی کے بعد دونوں ٹیموں کو ایک ایک پوائنٹ دے دیا گیا ہے۔کرکٹ ورلڈ کپ کا گیارہواں میچ آج پاکستان اور سری لنکا کے درمیان برسٹل کے گراﺅنڈ میں کھیلا جائے گا، میچ پاکستانی وقت کے مطابق دوپہر ڈھائی بجے شروع ہونا تھا تاہم میچ بارش کی وجہ سے تاخیر کا شکار ہوگیا ہے۔تیز بارش کا سلسلہ تھم گیا ہے تاہم میدان میں پانی موجود ہے ، میدان سے پانی نکالنے کا عمل بھی جاری ہے، اگر بارش رک گئی اور میدان سوکھ گیا تو پاکستانی وقت کے مطابق 6:30 بجے تک میچ ممکن ہو گا، اس دوران پاکستان اور سری لنکا ٹیموں کو ہوٹل سے اسٹیڈیم آنے کی ہدایت کی گئی اور بارش تھمنے کے بعد قومی ٹیم اسٹیڈیم پہنچ چکی ہے۔امپائرز نے ایک بار پھر میدان کا دورہ کرتے ہوئے پچ کا معائنہ کیا ہے جب کہ وکٹ سے تاحال کورز نہیں ہٹائے گئے۔اس سے قبل محکمہ موسمیات کا کہنا تھا کہ برسٹل میں اگلے 2 گھنٹے تک مسلسل بارش ہوگی تاہم بعد میں موسم بتدریج بہتر ہونے کی توقع ہے جب کہ رولز کے مطابق بارش کی وجہ سے میچ 20،20 اوورز تک محدود کیا جا سکتا ہے اور ٹی ٹونٹی میچ ممکن نہ ہوا تو دونوں ٹیموں کو ایک ایک پوائنٹ ملے گا۔دونوں ٹیموں نے اب تک ایونٹ میں دو، دو میچز کھیلے ہیں جس میں سے ایک ایک میں شکست کا سامنا کرنا پڑا، آخری میچ میں پاکستان نے ورلڈ کپ کی ہاٹ فیورٹ انگلینڈ کو شکست دی اور افغانستان کو سری لنکا کے ہاتھوں ہار کا مزہ چکھنا پڑا تھا۔
