کراچی: (ویب ڈیسک)وزیر اعظم عمران خان کی جانب سے صوبائی حکام کو تمام ضروری اشیا کی قیمتوں میں استحکام کی یقین دہانی کرانے کی ہدایت دیتے ہی سندھ ملرز نے اس ہی دن آٹے کی قیمتوں میں 2 روپے فی کلو اضافہ کردیا۔نجی اخبار کی رپورٹ کے مطابق 15 اگست کے بعد سے یہ تیسری مرتبہ آٹے کی قیمتوں میں اضافہ ہوا، اس سے قبل یہ اضافہ 15 اگست، پھر 22 اگست کو کیا گیا تھا۔صوبائی حکام کی مداخلت نہ ہونے کی وجہ سے سندھ ملرز نے آٹے کی قیمت میں اپریل کے ماہ سے نویں مرتبہ اضافہ کیا ہے اور اس کی وجہ گندم کی قیمت میں اضافہ بتایا ہے۔اپریل سے اب تک صارفین نے آٹے کی قیمت میں 11 روپے فی کلو اضافہ دیکھا۔ملوں سے پیدا ہونے والے 10 کلو آٹے کی قیمت جو اپریل کے ماہ میں 340 تھی، اب 450 روپے کی ہوگئی ہے۔چیئرمین پاکستان فلور ملز ایسوسی ایشن (پی ایف ایم اے) سندھ زون، محمد جاوید یوسف کا کہنا تھا کہ اوپن مارکیٹ میں 100 کلو گندم کا تھیلا 4 ہزار روپے کا ملتا ہے جو چند روز قبل ہی 3900 روپے کا تھا کہ جبکہ اپریل کے مہینے میں اس کی قیمت 3 ہزار روپے تھی۔
