دبئی(ویب ڈیسک) متحدہ عرب امارا ت اور پاکستان دونوں ممالک کی جانب سے کورونا وائرس پر قابو پانے کی خاطر پروازیں بند کر دی گئی ہیں۔ پروازوں کی ان بندش کے نتیجے میں سینکڑوں پاکستانی بھی متحدہ عرب امارات میں محصور ہو کر رہ گئے تھے۔ ان پاکستانیوں کی جانب سے حکومت پاکستان سے اپیل کی گئی تھی کہ انہیں خصوصی پرواز کے ذریعے واپس وطن لایا جائے۔آخر کار دبئی میں پاکستانی قونصل خانے کی جانب سے بھی ان مصیبت میں پھنسے پاکستانیوں کے لیے کی جانے والی کوششیں رنگ لے آئی ہیں۔ دبئی ایئرپورٹ سے فلائی دبئی ایئر لائنز کی خصوصی پرواز 101 مسافروں کو لے کر پاکستان روانہ ہو گئی ہے۔ پاکستانی قونصل جنرل اورقونصلیت کے افسران پچھلے چوبیس گھنٹوں سے کوشش کر رہے تھے کہ مسافر کسی طرح پالستان پہنچ جائیں ، جن کی کوششوں کے نتیجے میں اماراتی حکام سے خصوصی اجازت لی گئی۔ اس فلائٹ کے ذریعے ان پانچ مسافروں کو بھی واپس بھجوایا گیا ہے جو ابوظہبی ایئر پورٹ پر پھنسے ہوئے تھے۔جبکہ 26 ایسے مسافر بھی شامل ہیں جو ایمرجنسی میں ملک واپس جانا چاہتے تھے۔ پاکستانی قونصلر جنرل احمد امجد علی نے بتایا کہ پاکستانی مسافروں کو ایئرپورٹ پر کھانا پینا اور ہوٹل میں رہائش فراہم کی گئی۔ اس پرواز کی روانگی کے بعد امارات میں اب کسی بھی ایئر پورٹ پر کوئی پاکستانی وطن واپسی کا منتظر نہیں ہے۔ احمد امجد علی نے اس موقع پر کہا کہ وہ پاکستانی مسافروں کی واپسی کے لیے انتظامات کرنے پر اماراتی ایئر لائن اور حکومت کے مشکور ہیں۔
