لاہور (ویب ڈیسک) حکومتی اتحادی جماعت مسلم لیگ ق کے مرکزی رہنماءچودھری مونس الٰہی نے کہا ہے کہ پیسا ضائع کرنےکی بجائے مفت ٹیسٹ کی سہولت فراہم کی جائے، بےروزگاری کا شکارغریب عوام 5000 سے 8000 روپے کا کورونا ٹیسٹ کروائیں یا بچوں کو2 وقت کی روٹی کھلائیں؟ جبکہ ہسپتالوں میں ٹیسٹ کی سہولت دستیاب نہیں۔ انہوں نے ٹویٹر پر اپنے ٹویٹ میں کہا کہ کورونا ٹیسٹ کٹس کی بیشتر سرکاری ہسپتالوں میں عدم دستیابی ہے۔ جس سے بےروزگاری کا شکارغریب عوام 5000 سے 8000 روپے فی کس کا پرائیویٹ کورونا ٹیسٹ کروائیں یا بچوں کو دو وقت کی روٹی کھلائیں؟ انہوں نے کہا کہ بےجا پیسہ ضائع کرنے کے بجائے حکومت غریب عوام کو فوراً مفت کورونا ٹیسٹ کی سہولت دے۔ دوسری جانب وفاقی وزیر منصوبہ بندی اسد عمر نے معاون خصوصی صحت ڈاکٹر ظفرمرزا کے ہمراہ میڈیا بریفنگ میں بتایا کہ رواں ماہ ٹیسٹ کرنے کی استعداد میں 30 گنا اضافہ ہوگا۔ اپریل کے آخر تک ٹیسٹ کی صلاحیت 20 سے 30 ہزار ہوجائے گی۔ کورونا ٹیسٹنگ کی ایک لاکھ کٹس کراچی پہنچا دی گئی ہیں۔ ان کٹس میں 50 ہزار کٹس سندھ اور 25 ہزار بلوچستان کو دی جائیں گی۔ انہوں نے کہا کہ وینٹی لیٹرز پر مریضوں کی تعداد بڑھ گئی ہے۔ آج کے ریکارڈ کے مطابق 50 مریض وینٹی لیٹرز پر ہیں۔ 26 ،27 لیب فعال ہو چکی ہیں اور14 مشینیں بھی فنکشنل ہوگئی ہیں۔ آئی سی یو عملے کیلئے 10ہزار فیس شیلڈ دی جا چکیں۔ انہوں نے کہا کہ این ڈی ایم اے کی جانب سے17 لاکھ ماسک تقسیم کیے جا چکے ہیں۔ ایک لاکھ 37 ہزارسرجیکل کیپس تقسیم کی جاچکی ہیں۔ اب تک 6 لاکھ گلوز تقسیم کیے جا چکے ہیں۔ اب تک ساڑھے 6 لاکھ گلوز تقسیم کیے جا چکے ہیں۔ انہوں نے کہا کہ احساس پروگرام کے تحت11 لاکھ افراد کو 13 ارب روپے مالی امداد فراہم کرچکے ہیں۔ احساس پروگرام کے تحت 144 ارب روپے مستحقین تک پہنچائیں گے۔ متحد ہوکر کورونا سے نمٹنا ہے۔ انہوں نے کہا کہ ٹیکس وصولی میں ایک تہائی یعنی 1400سے 1500 روپے کمی کا اندازہ ہے۔ پچھلے مارچ کے مقابلے میں ترسیلات میں 9 فیصد اضافہ ہوا ہے۔ کل وزیراعظم کو اپنی سفارشات پیش کریں گے۔
