لاہور(اے این این ) وزیر ریلوے شیخ رشید احمدنے کہا ہے کہ 6 ہزار ارب کی کرپشن پر وزیر ہو یاپیر فقیر سب ہی رگڑے میں آجائیں گے، شہباز شریف کی اپنی بھتیجی سے نہیں بنتی،مریم نواز چاہتی ہیں کہ پارٹی صدر شاہد خاقان عباسی بنا دیا جائے، موکل کہتے ہیں شہباز شریف کی بچت نہیں، آصف زرداری سمجھ دار ہیں اس لئے گھونسلے میں چلے گئے ہیں۔ان خیالات کا اظہار انہوں نے گزشتہ روزلاہور میں میڈیا سے گفتگو کرتے ہوئے کیا۔وزیر ریلوے شیخ رشید احمدنے کہا کہ میں نے پہلے ہی کہ دیا تھا کہ آٹا چینی اسکینڈل رپورٹ میں تاخیر ہوسکتی ہے، آئی پی پیز اسکینڈل پر کابینہ اجلاس میں تینوں وزیر خسرو بختیار، ندیم بابر اور عبدالرزاق داو¿د اٹھ کر چلے گئے تھے، 6 ہزار ارب کی کرپشن پر وزیر، پیر یا فقیر سب رگڑے جائیں گے، چینی،آٹے والے اور آئی پی پیز سب چور چکاراندر ہوں گے۔شیخ رشید احمدنے کہاکہ نجی بجلی گھروں (آئی پی پیز) اور دیگر رپورٹ منظر عام پر لانے کاکریڈٹ عمران خان کو دیں، انہی کی وجہ سے ہی یہ رپورٹیں منظر عام پر آئی ہیں، وہ نہ ہوتے تو یہ رپورٹس کبھی منظر عام پر نہ آسکتی تھیں۔شیخ رشید نے کہا کہ شہباز شریف کے راستے محدود نظر آ رہے ہیں، ان کا کیس سنجیدہ ہے اور بچنابھی مشکل ہے، وہ جو سوچ لے کر آئے تھے اس کا سیاسی جنازہ نکل گیا، شہباز شریف کی اپنی بھتیجی مریم نواز سے نہیں بن رہی، دونوں ایک دوسرے کے دشمن ہیں، بھتیجی کہتی ہیں کہ پارٹی صدر شاہد خاقان عباسی کو بنا دیں، شہباز شریف کا جانا ٹہر گیا اور ان کی بچت نہیں ہے، لیکن اگر دوسرا فارمولا اپنا لیں اور ہمیشہ کی طرح راستہ نکالتے ہیں تو اور بات ہے۔شیخ رشید نے مزید کہا کہ آصف زرداری کے 40 فیصد معاملات ٹھیک ہوگئے ہیں آصف زرداری سمجھتے ہیں کہ 3، 2 ماہ سیاست کیلئے نہیں ہیں، آصف زرداری گھونسلے میں چلے گئے ہیں۔ انہوں نے کہا ٹرینوں کیلئے تمام احتیاطی تدابیر اختیار کرلی گئی تھیں، لاک ڈاو¿ن، ٹرین سروس بحال کرنے کا فیصلہ 10 مئی کو ہوگا، لاک ڈاو¿ن کھلا تو 24 گھنٹے میں ٹرینیں چلا دیں گے۔شیخ رشید احمدنے کہا کہ کورو نا وائرس کی وجہ سے دنیا بھر کی معیشت تباہی کی طرف جا رہی ہے۔ پاکستان میں بھی اس کے منفی اثرا ت سامنے آرہے ہیں۔ اس مشکل وقت میں امید کی جا رہی تھی کہ شاید سیاسی جماعتیں اور حکومت ایک ساتھ مل کر کام کریں گے، لیکن نہ حکومت اپوزیشن کے ساتھ کام کرنے کو تیار ہے اور نہ ہی اپوزیشن حکومتی احکامات کی حمایت کرتی نظر آ تی ہے۔ دونوں طرف سے ایک دوسرے کی مخالفت دکھائی دیتی ہے۔

لاہور(مانیٹرنگ ڈیسک) اسسٹنٹ پروفیسر علامہ میڈیکل کالج ڈاکٹر احمد سلیم نے کہا ہے کہ پاکستان میں کرونا کی صورتحال قدرے کنٹرول میں ہے لیکن اگر لاک ڈاﺅن میں کمی کی گئی تو حالات بگاڑ کی طرف بھی جا سکتے ہیں۔پاکستان میں ٹیسٹ اتنے کم ہوئے ہیں کہ حتمی طور پر کچھ نہیں کہا جا سکتا۔حالت جنگ میں معیشت نہیں دیکھی جاتی دشمن کو شکست دینا ہوتی ہے ہم نہیں رہیں گے تو معیشت کا کیا کرنا ۔عام طور پر گرمی میں وائرس کی شدت کم ہوتی ہے لیکن یہ نیا وائر س ہے رسک نہیں لینا چاہئے کرونا کی مکمل علامات ابھی کسی کو نہیں پتہ۔ لاک ڈاﺅن جاری رہنا چاہئے دوسروں سے سبق ضرور لیں لیکن اپنے حالات ضرو ر دیکھیں ہر شخص اپنا کردار ادا کرے۔وینٹی لیٹرز پاکستان میں بننا اچھی بات ہے ہمیں اپنے لوگوں کی خود خدمت کرنی ہے۔شروع میں کٹس کم تھیں اب صورتحال بہتر ہے۔ڈاکٹرکی تربیت بہت ضروری ہے۔ باہر نکلنے والے کورونا ساتھ لیکر آتے ہیں ۔ عوام حکومتی احتیاطی تدابیر اپنائیں،سینٹائزر کا استعمال کریں پاک صاف رہیں۔ٹیسٹ کرکٹر محمد سمیع نے بتایا کہ اس وقت کرونا کا حل تلاش کریں کیونکہ اولین ترجیح لوگوں کی حفاظت ہے،کیونکہ کرونا ایک خطرناک وائرس ہے افسوس اب بھی لوگ احتیاط نہیں کر رہے۔ لوگ حکومتی ہدایات پر عمل نہیں کر رہے ہمیں حکومت سے تعاون کرنا چاہئے کہ کو ڈیل کس طرح کرنا ہے ترقی یافتہ سب کرونا کی زد میں ہیں ۔ہمیں چاہئے کہ اپنے اردگرد دیکھیں غربا ءکی دل کھول کر مدد کریں۔ سب حکومتی تدابیر پر عمل کریں فیس ماسک،گلوز اور سینیٹائزر کا استعمال کریں بلاضرورت باہر مت نکلیں۔مشکل وقت ہے لیکن گبھرائیں نہیں۔کتھک ڈانسر ناہیدصدیقی نے کہا کہ ماہ رمضان میں خصوصی دعائیں کی جائیں۔ اس وقت انتشار پیدا نہ کریں سب کی بلاتفریق رنگ و نسل مذہب مدد کی جائے ہمیں اپنی ذمہ داری نبھانی ہے لاک ڈاﺅن کو فالو کریں آئسولیشن میں ہی سب کی بھلائی ہے پاکستانی مثالی قوم ہیں ،مجھے یقین ہے قوم با شعور ہے حکومتی احکامات پر عمل کریگی۔۔ مخیر حضرات اپنے غریب رشتہ داروں، پڑوسیوں اور محلے داروں کا خیال کریں۔اپنی صفائی کا خاص خیال رکھیں۔ ریاست ذخیرہ اندوزوں کےخلاف ایکشن لے تاکہ عوام مشکلات کا شکار نہ ہو۔سبھی کو اپنی اصلاح کر لینی چاہئے کہ پہلے ہمیں بہتر انسان بننا ہے۔

لاہور(مانیٹرنگ ڈیسک)پاکستان کے مختلف شہروں میں رات گئے لاک ڈاﺅن صرف نام کا رہ گیا۔ ناکوں پر نہ پوچھ گچھ نہ چیکنگ کی جاتی ہے۔ اس حوالے سے راولپنڈی سے نمائندہ چینل فائیو نے گفتگو کرتے ہوئے بتایا کہ راولپنڈی کی شاہراہوں پر عوام بڑی تعداد میں نظر آرہے ہیںجبکہ اداروں کی جانب سے بھی عوام پر سختی کم نظر آرہی ہے۔ لاک ڈاﺅن کے شروع میں پولیس، آرمی اور ٹریفک اہلکار سڑکوں پر نظر آتے تھے مگر اب ایسا نہیں ہے۔ ائیر پورٹ کے علاقوں میں پولیس او ر آرمی کے جوان نظر آتے ہیں ، کورونا کے خلاف صرف آرمی اہلکار ہی ڈیوٹی سرانجام دیتے نظر آرہے ہیں۔ نمائندہ لاہور کا کہنا تھا کہ شہر بھر میں جزوی لاک ڈاﺅن کے اٹھائیسویں روز ہلکی بارش کیساتھ موسم خوشگوار رہا اور لاہوری اپنے مزاج کے مطابق سڑکوں پر گھومتے نظر آئے۔ مگر کورونا کٹ صرف ایک اہلکار کو دی جاتی ہے۔ پولیس میں مشتبہ کورونا کیسز سامنے آنے کے باوجود کٹس فراہم نہیں کی جارہیں۔ شہر کے بہت کے ناکوں پر بارش کے باعث پولیس اہلکار غائب نظر آئے جبکہ افسران کو سب اچھا کی رپورٹ جاتی رہی۔ نمائندہ منڈی بہاﺅالدین کا کہنا تھا کہ جزوی لاک ڈاﺅن پر شہری بھی جزوی عمل درآمد کر رہے ہیں۔

لاہور (لیڈی رپورٹر) عدنان شاہد فاﺅنڈیشن کے زیراہتمام خبریں و چینل ۵ کے رضاکاروں کی جانب سے لاہور میں دیہاڑی دار اور مزدور طبقہ میں مختلف مقامات پر مفت کھانا تقسیم کیا گیا۔ رمضان سے پہلے کھانا تقسیم کرنے پر خبریں رضاکار ٹیم کو خراج تحسین پیش کرنے کا سلسلہ نہ رک سکا۔اداکار قوی خان نے کہا کہ اب رمضان شروع ہوچکاہے کہ اس سے پہلے جو خبریں نے اپنا کردار ادا کیا ہے ان کی کاوشوں کو سلام ہے۔ ایم کیو ایم کے رہنما عامر خان نے کہا کہ خبریں کے چیف ایڈیٹر ضیاشاہد صاحب اور امتنان شاہد صاحب نے جس طرح اس مشکل گھڑی میں غریب اور مستحق افراد کی مدد کی ہے وہ قابل تحسین ہے۔ ان کی اس خدمت کو جتنا سراہا جائے وہ کم ہے۔ تحریک انصاف کی ایم پی اے سبرینا جاوید نے کہا کہ میں خبریں کو سیلوٹ پیش کرتی ہوں جنہوں نے اس وباءکی صورت حال میں آگے بڑھ چڑھ کر حصہ لیااس پر میں انہیں سلام پیش کرتی ہوں۔ سپین کے ایمبیسیڈر مینوئل دوران نے کہا کہ جس طرح خبریں نے پاکستان کے لوگوں کو ٹریٹ کیا اور غریب لوگوں تک کھانا اور راشن تقسیم کیا تاریخ میں یہ رقم ہوگا مگر اس وقت میں امتنان شاہد صاحب کو مبارکباد پیش کرتا ہوں کہ انہوں نے اس وقت لوگوں کی خدمت کرکے یہ ثابت کردیا کہ وہ اپنی قوم کے لوگوں سے محبت کرتے ہیں۔میں انہیں ان کی اس خدمات پر دل کی گہرائیوں سے مبارکباد پیش کرتا ہوں۔ماڈل ملائکہ بٹ نے کہا کہ میں خبریں کو اس نیک کام کرنے پر خراج تحسین پیش کرتی ہوں کہ اس مشکل وقت میں انہوں نے غریب اور دیہاڑی دار طبقہ کا خیال رکھا۔ جس پر وہ مبارکباد کے مستحق ہیں۔

لاہور (مانیٹرنگ ڈیسک) چینل فائیو کے پروگرام مرحبا رمضان میں میزبان صائم علی اور مائرہ خان کے ساتھ گفتگو کرتے ہوئے مذہبی سکالرمولانا ابتسام الہی نے بتایا کہ وبائیں ہمارے گناہوں کی وجہ سے اترتی ہیں ہمیں اللہ سے پناہ طلب کرنی چاہئے کہ اے اللہ جن لوگوں پر تیرا عذاب اترا ہمیں ان میں شامل نہ فرما۔ دوسرے لوگ وہ ہیں جو نیک ہوتے ہیں ان کے لئے یہ آزمائش ہوتی ہے اللہ صبر کرنے والوں سے راضی ہوتے ہیں جو مشکلات میں صبر کرتے ہیں۔ اللہ پاک فرماتے ہیں جو بھی مصیبیتں تمہارے پر آتی ہیں وہ تمہارے اپنے اعمال کے باعث ہیں لیکن اللہ پاک فرماتے ہیں اے میرے بندے مایوس نہیں ہونا مجھ سے مغفرت طلب کرو۔ رمضان میں اعتکاف بہت بڑی عبادت ہے اسے جاری رکھنا چاہئے تقویٰ اختیار کرنا چاہئے تاکہ ہماری تنگیاں دور ہوں روزہ تزکیہ نفس ہے ۔ روزہ صرف بھوک پیاس کا نام نہیں یہ ہمیں گناہوں بے حیائی اور لغو گوئی سے روکتا ہے روزہ گناہوں سے بچنے کی مشق ہے۔ نبی کریم نے ذکر الٰہی کا درس دیا تاکہ ہم مصیبتوں اور بیماریوں سے محفوظ رہ سکیں۔ روحانی تقویت کے لئے ہم اپنے ایمان کو مضبوط کریں علم حاصل کریں یہ احساس رکھیں ہم اللہ کے آگے جوابدہ ہیں ایمان داری اور عمل صالح کرنا شروع کر دیں تو ہمیں فرصت ہی نہیں ملے گی دوسروں کی خامیاں تلاش کریں۔ تا ریخ میں اللہ کی غیبی مدد سے واقعات بھرے پڑے ہیں یہ وباءاللہ کے امر سے آئی اور اسی کے امر سے جائے گی۔ روزے کی حالت میں کوشش کریں ٹوتھ پیس نہ کریں مسواک کی جا سکتی ہے۔علماءحضرات منبرو محراب کے پلیٹ فارم کے ذریعے عوام کی رہنمائی کریں۔ لاک ڈاﺅن سے مایوس نہیں ہونا چاہئے جو اللہ خزاں لاتا ہے بہار بھی وہی لاتا ہے کیونکہ ہر مشکل کے بعد آسانی ہے لیکن ہمیں اپنے اعمال درست کرنا ہیں۔ لاک ڈاﺅن کے دوران مثبت سرگرمیاں اپنائیں منفی اثرات سے بچیں۔صفائی نصف ایمان ہے اس کا خاص خیال رکھیں کرونا وبا ءکے حوالے سے صفائی کی اہمیت بہت زیادہ ہے۔ ماڈل و اداکارہ نادیہ حسین نے بتایا کہ لاک ڈاﺅن کے باعث میں وہ دسترخوان جو روزہ داروں کےلئے اپنے سیلون کے باہر لگایا کرتی تھی اس بار نہیں لگا پائی تاہم میں لوگوں کے گھروں میں کھانا بھجوا رہی ہوں۔ رمضان میں اخراجات بہت بڑھ جاتے ہیں لیکن کرونا کے باعث کاروبار بند ہیں میرا سیلون سٹاف بھی میری فیملی کی طرح ہے ان کا بھی بہت خیال رکھتی ہوں لیکن لاک ڈاﺅن کے باعث مجھے بھی مشکلات کا سامنا ہے۔انہوں نے بتایا کہ میں اپنی ڈائٹنگ کا بہت خیال رکھتی ہوں تاکہ وزن کنٹرول میں رہے زیادہ چکنائی والی غذا سے پرہیز ہی کرتی ہوں پراٹھہ کم ہی کھاتی ہوں، رمضان کے دوران بھی ایکسرسائز کرتی ہوں اپنے فینز کو بھی کہوں گی رمضا ن میں چکنی اشیاءسے پرہیز کریں۔ صحت کا بہت خیال رکھیں۔میرے خیال میں لاک ڈاﺅن کی پابندی بہت ضروری ہے سبھی سماجی فاصلہ رکھیں۔بہت جلد میرا نیا ڈرامہ آن ائر ہو گا۔ میرااداکاری جاری رکھنے کا ارادہ ہے۔مارننگ شوز دوبارہ شروع کرنے چاہئیں۔انہوں نے بتایا کہ خواتین گھر پر بھی نیچرل ریمیڈیز سے اپنی جلد بالوں سمیت ہر چیز کا بخوبی خیال رکھ سکتی ہیں۔ رمضان کے مہینے میں صبر وتحمل کا مظاہرہ کریں دوسروں کا خیال رکھیں۔اگر کسی کی مدد کریں تو اس طرح کریں کہ کسی کی عزت نفس مجروح نہ ہو۔خبریں رضاکار ٹیم شہر شہر لوگوں میںکھانا تقسیم کر کے بہت بڑا کام کر رہی ہے۔ میری دعا ہے مستحق لوگوں تک مدد پہنچے کیونکہ لوگ کئی کئی من راشن اکٹھا کر بھی باز نہیں آتے۔کرونا کے باعث سکول بند ہیں میرے بچے بھی گھر پر ہی ہیں لیکن ان کو سمجھانا پڑتا ہے وباءکی وجہ سے آپ اپنے دوستوں سے نہیں مل سکتے۔میری سات سال کی بیٹی ٹک ٹاک کرتی ہے اس میں کافی ٹیلنٹ ہے۔بچوں پر کبھی اپنی مرضی مسلط نہیں کرتی۔ میرا بیٹا اکثر گھر پر ککنگ بھی خود کر لیتا ہے۔ آج کل میں پوری رات جاگتی ہوں عبادت بھی کرتی ہوں ۔