اسلام آباد: وزیراعظم عمران خان نے وزیر اعلیٰ گلگت بلتستان کے لیے ایڈووکیٹ خالد خورشید کے نام کی منظوری دے دی۔
اس سلسلے میں چیف آرگنائزر سیف اللہ نیازی نے وزیر اعظم عمران خان سے ملاقات کی جس میں مشاورت کے بعد وزیر اعظم نے وزیر اعلیٰ گلگت بلتستان کے لیے ایڈووکیٹ خالد خورشید کے نام کی منظوری دی۔ چیف آرگنائزر سیف اللّٰہ نیازی کے مطابق گلگت بلتستان کی وزارت اعلیٰ کی کرسی پر پی ٹی آئی کی طرف خالد خورشید کو بیٹھایا جائےگا۔
خالد خورشید ایڈووکیٹ ضلع استور سے رکن گلگت بلتستان اسمبلی منتخب ہوئے ہیں۔ انہوں نے 2018ء میں پاکستان تحریک انصاف (پی ٹی آئی) میں شمولیت اختیار کی تھی۔ دوسری جانب وزیراعظم عمران خان کے زیر صدارت ترجمانوں اور پارٹی رہنماؤں کا اہم اجلاس ہوا جس میں ملکی سیاسی اور معاشی صورتحال پر غور جبکہ گلگت بلتستان حکومت سازی اور کورونا کے بڑھتے خطرات بارے غور کیا گیا۔ذرائع کے مطابق اجلاس کے دوران اپوزیشن بیانیہ اور ممکنہ تحریک سے متعلق حکمت عملی پر مشاورت بھی کی گئی جبکہ مہنگائی کے خلاف اقدامات اور معاشی اہداف کے حصول پر بھی بات چیت کی گی۔
واضح رہے کہ گلگت بلتستان اسمبلی کے حالیہ انتخابات میں حکمران جماعت پاکستان تحریک انصاف نے 10نشستوں پرکامیابی حاصلی کی۔ اپوزیشن کی جماعتیں پاکستان پیپلز پارٹی نے 3 جبکہ مسلم لیگ ن نے 2 نشستوں پر کامیاب ہوئی ، 7 جبکہ انتخابات میں آزاد امیدوار جیتے جن میں سے 6 نے پی ٹی آئی میں شمولیت اختیار کرلی جس کے بعد پی ٹی آئی کی کل نشستیں 16 ہوگئیں۔
