نئی دہلی: اردو کے معروف شاعر اور مصنف شمس الرحمن فاروقی 85 سال کی عمر میں انتقال کر گئے،وہ گذشتہ کچھ عرصہ سے کورونا وائرس کا شکار ہونے کے باعث شدید علیل تھے۔
تفصیلات کے مطابق اردو کے معروف شاعر اور مصنف شمس الرحمن فاروقی نومبر میں کورونا وائرس کا شکار ہوئے تھے تاہم انہوں نے کورونا وائرس کو شکست دے دی تھی لیکن کورونا وائرس کے بعد ہونے والے کچھ مسائل کے باعث شدید علیل ہوگئے تھے جس کے دوران بیماری سے انہیں ایک آنکھ بھی گنوانا پڑی تھی۔
اردو کے معروف شاعر اور مصنف شمس الرحمن فاروقی آج صبح ہی دہلی سے پرواز کے ذریعے الہ آباد پہنچے تھےتاہم وہ آج ہی شدید علالت کے باعث انتقال کر گئے،ان کی عمر 85 سال تھی۔
شمس الرحمن 30 ستمبر 1935 کو پیدا ہوئے تھے اور انہوں نے 1960 میں ادبی دنیا میں قدم رکھا۔ 1960 سے 1968 تک وہ انڈین پوسٹل سروسز میں پوسٹ ماسٹر رہے اور اس کے بعد چیف پوسٹ ماسٹر جنرل اور 1994 تک پوسٹل سروسز بورڈ، نئی دہلی کے رکن بھی رہے۔وہ الہ آباد میں ’شب خوں‘ میگزین کے ایڈیٹر رہے۔ ان کی تصنیف ’کئی چاند اور تھے سرِ آسماں‘، ’افسانے کی حمایت میں‘ اور ’اردو کا ابتدائی زمانہ‘ کو اردو ادب میں قدر کی نگاہ سے دیکھا جاتا ہے۔انہیں ’سرسوتی ایوارڈ‘ کے علاوہ 1986 میں اردو کے لئے ’ساہتیہ اکیڈمی ایوارڈ‘ سے بھی نوازا گیا تھا۔ سال 2009 میں انہیں پدم شری ایوارڈ سے بھی نوازا گیا تھا۔
