اسلام آباد(ویب ڈیسک) وزیراعظم عمران خان نے کہا ہے کہ جو بھی حکمت عملی بنارہے ہیں اس میں دیہاڑی دار مزدور پہلی ترجیح ہیں، ذخیرہ اندوز کسی نرمی کے مستحق نہیں، صوبائی حکومتیں ان کے خلاف سخت ایکشن لیں۔وزیراعظم عمران خان کی زیرصدارت پی ٹی آئی کور کمیٹی کا اجلاس ہوا، اجلاس میں کورونا وائرس کی مجموعی صورتحال اور ملک میں اشیائے ضروریہ کی بلاتعطل فراہمی کے اقدامات کا جائزہ لیا گیا، جب کہ صوبوں میں کورونا سے نمٹنے کے لیے اقدامات پر بریفنگ دی گئی۔اجلاس میں حکومتی ریلیف پیکج کو مستحق افراد تک پہنچانے کے لیے رضاکار فورس کی حکمت عملی طے پا گئی اور فیصلہ کیا گیا کہ ملک بھر میں پی ٹی آئی ارکان اسمبلی کو خصوصی ٹاسک سونپا جائے گا اور ہزاروں پارٹی عہدے داروں کو کورونا ریلیف ٹائیگرز پروگرام میں شامل کیا جائے گا۔وزیراعظم عمران خان کا کہنا تھا کہ کورونا کے خلاف جنگ جیتنے کے لیے ہر شہری کو کردار ادا کرنا ہوگا، مجھے یقین ہے قوم متحد ہوکر اس آزمائش کا مقابلہ کرے گی، محدود وسائل کے باوجود ہر سرکاری ادارہ بہترین کام کررہا ہے، جو بھی حکمت عملی بنا رہے ہیں اس میں دیہاڑی دار مزدور پہلی ترجیح ہے، ہنگامی حالات میں تمام وسائل قوم پر لگائیں گے۔
وزیراعظم نے صوبائی حکومتوں کو ہدایت دیتے ہوئے کہا کہ ذخیرہ اندوز کسی نرمی کے مستحق نہیں، صوبائی حکومتیں ان کے خلاف سخت ایکشن لیں۔ وزیراعظم نے شاہراہوں پر گڈز ٹرانسپورٹ بحال رکھنے سے متعلق وفاقی وزیر مراد سعید کو ٹاسک سونپتے ہوئے کہا فوڈ چین میں کسی صورت رکاوٹ نہیں آنی چاہیے۔وزیراعظم عمران خان نے ایک بار پھر قوم کو اعتماد میں لینے کا فیصلہ کرتے ہوئے کہا کہ کل قوم کے سامنے جامع روڈ میپ رکھوں گا، مشکل وقت میں لیڈر شپ کا امتحان ہوتا ہے، گھبراہٹ میں کئے جانے والے فیصلے درست نہیں ہوتے۔

اسلام آباد(ویب ڈیسک) وزیر اعظم کے کورونا ریلیف ٹائیگرز پروگرام پر کام عمل درآمد کا آغاز کر دیا گیا ہے، وفاقی حکومت نے صوبائی حکومتوں کو لائحہ عمل سے آگاہ کر دیا ہے، 18سال سے زائد عمر کے صحتمند نوجوان سٹیزن پورٹل کے ذریعے رجسٹریشن کرائیں گے، ملک بھر سے رجسٹرڈ رضاکار ضلعی انتظامیہ اور این ڈی ایم اے کے ساتھ مل کر کام کریں گے، ڈپٹی کمشنرز، اے سی، ٹی ایم اوز اور ارکان پارلیمنٹ رضاکاروں کو سہولیات فراہم کریں گے۔ ضلعی و تحصیل انتظامیہ روزانہ کی بنیاد پر کورونا ریلیف ٹائیگرز کو ذمہ داریاں تفویض کرے گی۔کورونا ریلیف ٹائیگرز کی نشاندہی پر انتظامیہ اور پولیس فوری کارروائی کریں گی۔ وزیراعظم عمران خان کی زیر صدارت اہم مشاورتی اجلاس ہوا جس میں معاون خصوصی برائے یوتھ افیئرز عثمان ڈار,پرنسپل سیکرٹری اعظم خان، چیئرمین نیشنل انفارمیشن ٹیکنالوجی بورڈ اور سٹیزن پورٹل کے فوکل پرسن عادل سعید صافی شریک ہوئے۔اجلاس کے دوران ٹائیگر فورس کی تشکیل کا طریقہ کار طے کر لیا گیا، وزیراعظم نے ہنگامی صورت حال کے پیش نظر بروقت پیشگی اقدامات کی ہدایت کی۔ وزیراعظم خود بھی نوجوانوں کے لئے خصوصی پیغام ریکارڈ کروائیں گے۔ پروگرام کے مطابق رضاکار این ڈی ایم اے کے ساتھ ملکر گھروں میں راشن پہنچائیں گے، رضاکار اشیائے ضروریہ کے لیے جگہ اور سٹوریج کا بندوسبت کریں گے۔شہروں اور دیہات میں قائم قرنطینہ مراکز کے انتظامات میں بھی حصہ لیں گے، کورونا ریلیف ٹائیگرز گھروں میں قرنطینہ ہوئے لوگوں کی دیکھ بھال بھی کریں گے۔رضاکار ہسپتالوں اور عوامی مقامات پر لوگوں کو گائیڈ لائنز فراہم کریں گے اور بے روزگار افراد کا ڈیٹا اکٹھا کریں گے۔ کورونا کے مشتبہ مریضوں سے متعلق معلومات بھی اکھٹی کریں گے ، کورونا ریلیف ٹائیگرز لاک ڈاون پر عملدرآمد یقینی بنانے میں انتظامیہ اور پولیس کی مدد کرینگے۔ رضاکار ذخیرہ اندوزی اور زائد قیمتوں سے متعلق بھی نشاندہی کریں گے، رضاکار اعلانات اور جنازوں کے انتظامات میں بھی حصہ لیں گے۔ کورونا ریلیف ٹائیگرز کو متعلقہ سرکاری افسران روزانہ کی بنیاد پر بریفنگ دینگے۔اجلاس سے خطاب کرتے ہوئے وزیر اعظم عمران خان نے کہا کہ نوجوان ہنگامی حالات میں مدد کیلئے تیار رہیں،پاکستان کو افراتفری کی صورت حال سے بچانے کے لئے پیشگی اقدامات ضروری ہیں، امید ہے نوجوان قومی فریضہ سمجھتے ہوئے اپنا بہترین کردار ادا کرینگے، چین میں بھی لاک ڈاون کے دوران نوجوانوں نے ہی ذمہ داری سے فوڈ سپلائی بحال رکھی تھی۔

لاہور(ویب ڈیسک) پنجاب میں کورونا وائرس کے تصدیق شدہ مریض کے لوگوں سے میل ملاپ سے متعلق جاننے کے لئے کانٹیکٹ ٹریسنگ سسٹم متعارف کرادیا گیا ہے۔کورونا وائر س کے سلسلے میں انتظامی امور، طبی سہولیات کی فراہمی اور سپلائی چین کے جائزے کیلئے چیف سیکرٹری پنجاب میجر (ر) اعظم سلیمان خان کی سربراہی میں اہم اجلاس ہوا ہے۔ جس میں سینئر ممبر بورڈ اآف ریونیو،ایڈیشنل چیف سیکرٹری داخلہ، کمشنر لاہور ڈویڑن اور متعلقہ افسران نے شرکت کی۔چیف سیکریٹری پنجاب نے ہدایت کی کورونا وائرس کے سلسلے میں عوام میں اعتماد بڑھایا جائے کیونکہ کورونا وائرس کیخلاف جنگ عوام کے تعاون کے بغیر نہیں جیتی جا سکتی، آئندہ کورونا وائرس کے مشتبہ مریض کی نشاندہی پرپولیس کی بجائے صرف انتظامیہ اور محکمہ صحت کا عملہ رابطے میں رہے گا، چیک پوائنٹس پر دشواری سے بچنے کیلئے اشیاءضروریہ، ادویات اور طبی آلات کی ٹرانسپورٹیشن کرنے والے متعلقہ کمپنیوں کے لیٹر ساتھ رکھیں۔سیکرٹری پرائمری صحت کیپٹن (ر) محمد عثمان نے بتایا کہ کورونا وائرس کے تصدیق شدہ مریض کے لوگوں سے میل ملاپ سے متعلق جاننے کے لئے کانٹیکٹ ٹریسنگ سسٹم متعارف کرایا گیا ہے، اس عمل میں پی آئی ٹی بی کے علاوہ محکمہ تعلیم کی خدمات حاصل کرنے کا فیصلہ کیا گیا ہے۔سیکرٹری خوراک نے بتایا کہ تمام اضلاع میں گندم کی وافر مقدار فراہم کر دی گئی ہے،کسی بھی ضلع میں آٹے کی کوئی کمی نہیں ہے۔

کراچی(ویب ڈیسک) محکمہ داخلہ سندھ نے پیٹرول پمپس اور ٹائر پنکچر شاپس کے حوالے سے وضاحتی بیان جاری کیا ہے۔محکمہ داخلہ سندھ کے مطابق شہر میں واقع پیٹرول پمپس صبح 8 سے شام 5 بجے تک کھلیں گے البتہ ٹائر پنکچر کی دکانیں کھلی رہیں گی، پابندی کا اطلاق صوبے کے تمام شہروں اور قصبوں پر ہوگا۔محکمہ داخلہ سندھ کے مطابق پیٹرول پمپس کو بھی مقررہ اوقات کے بعد بند کرایا جائے گا تاہم ہائی ویز پر قائم پیٹرول پمپس کھلے رہیں گے، محکمہ داخلہ سندھ نے تمام کمشنرز ڈی آئی جیز کو مراسلہ ارسال کردیا۔

کراچی(ویب ڈیسک) وزیراعلیٰ سندھ سید مراد علی شاہ کا کہنا ہے کہ ہم ایسا مکنزم بنانا چاہتے ہیں کہ دیہاڑی دار تک راشن یا کوئی اور مدد پہنچائی جائے۔وزیراعلیٰ سندھ سید مراد علی شاہ کی زیرصدارت کورونا ایمرجنسی فنڈ کے حوالے سے اجلاس ہوا جس میں وزیر توانائی امتیاز شیخ، وزیر بلدیات ناصر حسین شاہ، مشیر قانون مرتضیٰ وہاب، ڈاکٹر باری، مشتاق چھاپرا اور دیگر نے شرکت کی۔اس موقع پر وزیراعلیٰ سندھ سید مراد علی شاہ نے کہا کہ 2017ءکے مردم شماری کے حساب سے سندھ میں 50 ملین آبادی ہے اور صوبہ میں 10 ملین یا 1.4 ملین خاندان روزانہ اجرت پر گزارا کرتے ہیں، میں چاہتا ہوں کہ غریب لوگوں خاص طور جو روزانہ اجرت پر کام کرتے ہیں ان خاندانوں کو راشن یا نقد رقم سے مدد کی جائے، ہمارے ہاں اوسطً 7 افراد کا خاندان ہے۔وزیراعلیٰ سندھ نے کہا کہ میرے دل پر بوجھ ہے کہ ان غریب لوگوں کی مدد کی جائے، ہم صرف ان معاملات پر غور کر رہے ہیں کہ کس طرح اصل حق دار خاندانوں کی مدد کی جائے، ہم ایسا مکنزم بنانا چاہتے ہیں کہ دیہاڑی دار تک راشن یا کوئی اور مدد پہنچائی جائے۔مراد علی شاہ نے کہا کہ سندھ حکومت نے ایک ریلیف انیشیٹو ایپ بھی بنائی ہے، اس ایپ پر شناختی کارڈ کے ذریعے دیہاڑی دار کو رجسٹر کرنے کی بھی تجویزہے۔

اسلام آباد(ویب ڈیسک) معاون خصوصی برائے صحت ڈاکٹر ظفر مرزا کا کہنا ہے کہ پاکستان کورونا وائرس کی روک تھام میں چین کی مدد کا شکرگزار ہے۔اسلام آباد میں کورونا کی وبا پر قابو پانے کے لیے پاکستان کی معاونت کے لیے آنے والے چینی ماہرین کو بریفنگ دیتے ہوئے ڈاکٹر ظفر مرزا نے کہا کہ کورونا وائرس کے خلاف چینی حکومت کے اقدامات سے متاثر ہیں، چینی حکومت نے کورونا وائرس کے خلاف بروقت اور موثر اقدامات کیے، بروقت اقدامات نہ کیے جاتے تو چین میں مزید نقصان ہوتا،چین نے 60 ملین افراد کو قرنطینہ میں رکھ کر تاریخ رقم کی، چین نے اپنے ملک سے باہر جانیوالوں کی مکمل اسکریننگ کی، دنیا کو کورونا وائرس کے خلاف چین کے اقدامات سے سیکھنا ہوگا۔معاون خصوصی نے کہا کہ پاکستان میں کورونا وائرس کے 1560کیسز ہیں، پاکستان میں چین سے کورونا وائرس کا کوئی مریض نہیں آیا، چین سے پاکستان آنے والے افراد 14روز قرنطینہ میں رہے۔ حکومت نے چین سے پاکستانی طلبہ کو واپس نہ لانے کا مشکل فیصلہ کیا، چینی حکومت نے پاکستانی طلبہ کا خیال رکھا۔ڈاکٹر ظفر مرزا نے کہا کہ چین نے مشکلات کے باوجود پاکستان کا ساتھ دیا، چین کے طبی عملے کی پاکستان آمد حوصلہ افزا ہے، مشکل وقت میں ساتھ دینے پر پاکستانی حکومت اور عوام چین کے شکرگزار ہیں، چین کے طبی عملے کو پاکستان میں خوش آمدید کہتے ہیں، چینی وفد اور امداد سے بھرپور فائدہ اٹھائیں گے اور چینی طبی عملے کی آرا سے مستفید ہوں گے۔ پاکستان میں ہیلتھ پروفیشنلز کی تربیت کا پروگرام شروع کررہے ہیں۔

لاہور(ویب ڈیسک)سوشل میڈیا پر معروف عالم دین مولانا طارق جمیل کو ایک یوٹیوب بلاگر ’ری ایکشن کڑی‘ کے ساتھ بات چیت ایک ویڈیو کے چرچے ہورہے ہیں ۔ویڈیو کے آغاز میں بظاہر بھارت سے تعلق رکھنے والی ایک یوٹیوب بلاگر اپنے سبسکرائبرز سے مخاطب ہیں۔ جو کہتی نظر آتی ہیں کہ تھوڑی دیر میں انہیں مولانا طارق جمیل کی جانب سے ایک کال موصول ہونے والی ہے اور پھر چند ہی لمحوں میں مولانا طارق جمیل کو سکرین پر دیکھا جا سکتا ہے۔ویڈیو میں ’ری ایکشن کڑی‘ مولانا کو یہ بتا رہی ہیں کہ جب ان کی ٹیم کی جانب سے ان سے رابطہ کیا گیا تو انہیں یقین نہیں آیا کہ مولانا طارق جمیل ان سے بات کرنا چاہتے ہیں۔ جس کے جواب میں مولانا طارق جمیل کا کہنا تھا کہ ‘میں نے ایک بار یوٹیوب پر آپ کی ویڈیو دیکھی جس میں آپ رو رہی تھیں تو میں نے اپنی ٹیم سے آپ کے بارے میں معلوم کرنے کو کہا۔گفتگو میں مولانا ری ایکشن کڑی کو بیٹی کہہ کر مخاطب کرتے رہے۔’ری ایکشن کڑی‘ مولانا طارق جمیل کو بتاتی ہیں کہ وہ پہلے مختلف اقسام کی ویڈیوز پر ری ایکشن یا ردعمل دیتی تھیں لیکن مولانا کی تقاریر سننے کے بعد اب وہ صرف مذہبی نوعیت کی ویڈیوز پر ری ایکشن دیتی ہیں اور انہوں نے حجاب لینا بھی شروع کر دیا ہے۔انہوں نے خواہش ظاہر کی وہ پاکستان آنا چاہتی ہیں۔ ساتھ ہی ان کا کہنا تھا کہ ان کی مادری زبان بنگالی ہے جس پر مولانا نے ان کے ساتھ بنگالی زبان میں بھی بات کی۔مولانا طارق جمیل عالمی شہرت یافتہ خطیب ہیں۔ اس سے قبل وہ بولی وڈ سٹار عامر خان سمیت پاکستان کی مشہور شخصیات جن میں جنید جمشید، وینا ملک، فلم سٹار نرگس اور فیروز خان سمیت باقی شخصیات کے ساتھ تصاویر اور ویڈیوز میں سامنے آتے رہے ہیں۔مولانا کے مطابق ان کی مذکورہ شخصیات کے ساتھ ہونے والے ملاقاتیں دعوت تبلیغ کا حصہ تھیں۔مولانا صاحب سے گفتگو میں ‘ری ایکشن کڑی’ کی مسرت کا اندازہ بخوبی لگایا جاسکتا ہے۔ تاہم ابھی یہ معلوم نہیں کہ مولانا اس طرح اکثر لوگوں کو کال کرکے بات کرتے ہیں یا یہ ایک منفرد کال تھی۔