وزیر مملکت اطلاعات و نشریات فرخ حبیب نے کہا کہ ن لیگ کے دور میں 2 کروڑ سے زائد بچے اسکولوں سے باہر تھے۔
تفصیلات کے مطابق وزیر مملکت اطلاعات و نشریات فرخ حبیب نے مریم نواز کی گفتگو پر ردعمل دیتے ہوئے کہا کہ مریم صفدر اور انکے ابو نواز شریف اور مودی کے بیانیے میں کوئی فرق نہیں ہے۔
انہوں نے کہا کہ نواز شریف کا بیانیہ اقتدار میں آکر لوٹ مار کرنا ہے، منی لانڈرنگ اور جعلی اکاؤنٹس انکی پہچان ہے، نواز شریف کا بیانیہ صرف شریف خاندان کی دولت میں ترقی ہے۔
فرخ حبیب نے کہا کہ ان کا بیانیہ یہ ہے کہ پیسہ لگا کر اقتدار میں آؤ، اقتدار میں آکر پیسہ ڈبل کرو، جب کوئی پوچھے تو اسے انتقامی کارروائی قرار دے دو، کھاتا ہے تو لگاتا ہے کا پیغام انہوں نے ہی ملک میں دیا، عوام ان کے اس بیانیے کے ساتھ نہیں ہے۔
وزیر مملکت اطلاعات و نشریات نے کہا کہ بیانیہ وہ ہوتا ہے جو ملک کے اندر بیٹھ کر ملکی سالمیت اور ترقی کا ہو اگر ملک میں کوئی بیانیہ چل رہا ہے تو وہ عمران خان کا بیانیہ ہے، عمران خان نے ملکی مفاد میں ایبسولوٹلی ناٹ کہا، عمران خان کشمری کے سچے وکیل اور سفیر بنے ہیں، مودی اور آر ایس ایس کی ہندوتوا سوچ کو بے نقاب کیا ہے۔
انہوں نے کہا کہ بھارت ملک کے اندر حملے کروائے یا کلبھوشن یادیو پکڑا جائے تو ن لیگ کی طرح خاموش نہ رہیں بلکہ کھل کر دنیا کو بتائیں کہ بھارت ہمارے ملک کے اندر حملے کروا رہا ہے، ان کے گھر شادی پر مودی آتے ہیں، آج کشمیری عوام ان سے پوچھ رہی ہے کہ انہوں نے حریت رہنماؤں کو بھی شادی پر بلایا؟
فرخ حبیب نے کہا کہ مریم صفدر آج کشمیر کی چمپیئن بنی پھرتی ہیں، کبھی پنجاب، سندھ، سوات کی بیٹی بن جاتی ہیں، ان بہروپیوں کا ایک روپ ہی نہیں، مریم سرٹیفائیڈ جھوٹیں ہیں جو کہتی تھیں کہ لندن تو کیا پاکستان میں بھی کوئی جائیداد نہیں ہے، آج کس منہ سے عمران خان پر تنقید کرتی ہیں، ملک کے اندر ڈان لیکس کی خالق مریم صفدر ہے۔
انہوں نے کہا کہ نواز شریف کے بھارت نواز بیانیے کو ملک کے اندر مریم آگے بڑھا رہی ہے، اداروں اور انکے سربراہوں کو نشانہ بنایا جارہا ہے، نواز شریف لندن میں بیٹھ کر الطاف حسین بنے ہوئے ہیں۔
وزیر مملکت اطلاعات و نشریات فرخ حبیب نے مزید کہا کہ سرحدوں پر شہید ہونے والے کتنے لوگوں کے گھروں میں گئے ہیں، افواج پاکستان کے جوانوں نے قربانیاں دی ہیں، ان قربانیوں کو سلام پیش کرتے ہیں۔
