وزیر اعظم کے مشیرِ قومی سلامتی ڈاکٹر معید یوسف کا کہنا ہے ریاست اپنے شہریوں کو کسی بھی قسم کے تشدد سے بچانے سے کبھی پیچھے نہیں ہٹے گی۔
تفصیلات کے مطابق وزیر اعظم عمران کان کے مشیرِ قومی سلامتی ڈاکٹر معید یوسف نے سماجی رابطے کی ویب سائٹ ٹوئٹر پر ایک پیغام جاری کیا ہے ، جس میں ان کا کہنا ہےکہ وہ تمام افراد اور گروہ جو یہ سمجھتے ہیں کہ وہ پاکستانی ریاست کی رٹ کو چیلنج کر سکتے ہیں، تو وہ یہ جان لیں کہ قومی سلامتی کے بنیادی اصول کے طور پر، ریاست اپنے تمام شہریوں کو کسی بھی قسم کے تشدد سے بچانے سے کبھی پیچھے نہیں ہٹے گی۔
ڈاکٹر معید یوسف نے اپنی ٹوئٹ میں مزید کہاکہ ریاست کے صبر کا پیمانہ لبریز ہو گیا ہے، انہوں نے پولیس اہلکاروں کو شہید کیا، سرکاری املاک کو تباہ کیا اور بڑے پیمانے پر عوامی خلفشار کا باعث بنتے رہے۔ ان میں سے ہر ایک کے لیے قانون اپنا راستہ اختیار کرے گا اور دہشت گردوں کے ساتھ کسی نرمی کے بغیر دہشت گردوں جیسا ہی سلوک کیا جائے گا۔
