تفصیلات کے مطابق چیف الیکشن کمشنر سکندر سلطان راجہ کا کہنا ہے کہ الیکشن کمیشن نے ای وی ایم اور آئی ووٹنگ سے متعلق سفارشات کے لیے 3 کمیٹیاں تشکیل دی ہیں۔ کمیٹیوں کو سفارشات تیار کرنے کے لیے 4 ہفتے کا ٹائم دیا گیا ہے، الیکشن کمیشن حکومتی ہدایات کی بجائے اپنی تشکیل کردہ کمیٹیوں کی سفارشات پر عمل کرے گا۔
چیف الیکشن کمشنرنے کہا کہ ای وی ایم کی خریداری اور سٹاف کی تربیت کی ٹائم لائن الیکشن کمیشن خود دے گا، پر امید ہوں کہ آئندہ عام انتخابات صاف اور شفاف کرائیں گے، الیکشن کمیشن نے صدر کے قانون پر دستخط سے پہلے ہی ای وی ایم کے استعمال پر کام شروع کر دیا تھا۔
خیال رہے کہ وفاقی کابینہ نے گزشتہ اجلاس میں ای وی ایم سے متعلق اپنی ٹائم لائن دی تھی۔
سکندرسلطان راجہ کا کہنا ہے کہ الیکشن کمیشن آئین و قانون کے مطابق کام کر رہا۔قبل ازوقت انتخابات کے لیے تیار ہیں، قومی اسمبلی اور صوبائی اسمبلیوں کے انتخابات مرحلہ وار کرانے کی کوئی تجویز زیر غور نہیں ہے، الیکشن کمیشن کے پاس اتنا سٹاف نہیں کہ پورے الیکشن میں اپنے ریٹرننگ افسران تعینات کرے۔
