آرمی چیف جنرل قمر جاوید باجوہ نے سیالکوٹ کے علاقے چونڈہ کے قریب چنوکی کا دورہ کیا ہے۔
پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل بابر افتخار نے سماجی رابطے کی ویب سائٹ ٹویٹر پر اپنے ایک پیغام میں کہا کہ آرمی چیف جنرل قمر جاوید باجوہ نے سیالکوٹ کے علاقے چونڈہ کے قریب چنوکی کا دورہ کیا جہاں انہوں نے گوجرانوالہ کور کی جنگی مشق کوٹری شیلڈ کا مشاہدہ کیا۔
ڈی جی آئی ایس پی آرکے مطابق دورے کے دوران آرمی چیف کو فارمیشن کی آپریشنل تیاریوں کے مقصد سے جاری مشقوں پر بریفنگ دی گئی۔
ڈی جی آئی ایس پی آر کا کہنا ہے کہ مشق کا مقصد فارمیشن کی آپریشنل تیاریوں کو بڑھانا، دشمن کی طرف سے کسی بھی مہم جوئی کے جواب میں دفاعی اور جارحانہ کاموں کو شامل کرنا ہے۔
ڈی جی آئی ایس پی آر کا مزید کہنا ہے کہ دورے میں آرمی چیف نے فوجی دستوں کے تربیتی معیار اور پیشہ وارانہ اہلیت پر اطمینان کا اظہار کیا جبکہ سپہ سالار نے میدان میں حقیقت پسندانہ اور سخت تربیت پر زور دیا۔
